¹ Ta mbile amo, baeki bakaya tina la Yesu, la bakabeka: Ndai ambe aeti bofi ta Bokota bo bose? ² Yesu, akata wana bokikelike akatae tina katikati ibo, la bakabeka mbo: ³ Lotobeka lino ta wewe mbo, yomba mbo oitokikowai loka lamba kee bana bakikelike, oitootai ta bokota bo bose. ⁴ Ye ndai atosuluwase kee wana bokikelike, ye atoeta omba bofi ta bokota bo bose. ⁵ Ye ndai atokuamela wana ta ene bomuna la lina liange, atokuamelei. ⁶ La ye ndai atokelisa amoi ta beke bakikelike bobe, beke batoimielei, ifondo inde mbo litale lifi likandomu ta ngingo inde la akusomoko aiteni ee bolundu bo libande. ⁷ Ngandi la wenda loka lo ndjaso ii soni. Ndaso ii soni yeitooeno, la ngandi la buto ono atoesa yo! ⁸ Yomba mbo boo wao lamba likolo liao itokelisowe bobe, tenaka yo, la kusaka yo esika lao. Ifoengana ango laoo ote ta liwawi kuelema ao etukulu la okusomo ta imbe ii layalaya ani ombe la bao baele la bakolo baele. ⁹ La yomba aleko mbo liso liao litokelisowe bobe, tenaka lio, la kusaka lio esika lao. Iyengani ango laoo oota ta liwawi la liso limoi la mbo okusomo ta imbe ii Geyena ani ombe la baiso baele. ¹⁰ Kebakai mbo oienakai bule amoi ta beke bakikelike; Loka lotobeka lino wewe mbo bakeitomo bibo ta bose batoena mbile etotina bo mbo boya Afa ange ono ambe ta bose. ¹¹ Loka mbo Wana a Buto aye ndjo oyauwisa beke bakasesela. ¹² Otoenyela ingi? Yomba mbo buto ambe la bekoko mia, la amoi inde aosesela, oitotika tuku-libwa la libwa ta longo loka looka luka ono akaoosesela? ¹³ Yomba mbo afoena ye, lotobeka lino ta wewe mbo atoomala loka linde koeta liomali li tuku libwa la libwa beke baikasesela. ¹⁴ Kola ongoma, yeiti lisangi liya Afaino ono ambe ta bose mbo amoi ta beke bakikelike asesele. ¹⁵ Yomba mbo nduku ao atokelowe bobe, kaaka okabekana linde loka lo bobe winde, enu linde eseke lomoi. Akao'okowe, otoosa nduku ao. ¹⁶ Yomba mbo aitookowe, osaka buto amoi ao baele loka mbo lobeko lamo loimilomo loka ta bonoko bo baeni baele ao basaso. ¹⁷ Yomba mbo aitooka bo, bekaka ta mbele Mungu; Akaofeka ooka mbele Mungu, ambeke kee mopakano la ono atokongolaka Pako (Bingbendele). ¹⁸ Lobeke lino wewe mbo, itotina ye oto kandai eke ta wenda, itokandomo aleko ta bose, la itotina ye otofungolai eke ta wenda, itofungolomo aleko ta bose. ¹⁹ Lotobeka aleko lino basiya mbo, yomba mbo baele bino batoimilana ta wenda loka lo'olengila leka lomoi, Afa ange ta bose atofa bo. ²⁰ Oko embe baele ao basaso eseke lomoi loka lo lina liange, lombe aiteni ibo. ²¹ Petelo akaya la akabeka linde, Ngene, mala yanga loengani omesila nduku ange yomba mbo akaowei bobe? Mala basambale ii? ²² Yesu akabeka linde mbo, loibeki lao kota mala bosambale, kanga mala tuku bosambale la bosambale. ²³ Bokota bo bose bombe kee bokota ono akani baka atokomanya mbeko ii bekowa binde. ²⁴ Ekaakolakae otanga, bakayela ye la buto ono ambaka la bolima bo talata elefu liou. ²⁵ Ani eikambakae lolipo, ngene inde akalakae mbo baungise ye la boali inde, la bana binde la biongo bitotina bikambaka linde loka balipe bolima. ²⁶ Kola ongoma, bokowa akasuluwelae, akabeka mbo, fekei mwa mbile lotolioelowo itotina. ²⁷ Ngene inde akaokelae ngandi la akmesilae bolima wamo. ²⁸ Bokota wamo akatomowa la akaosha bokowa bosia, la kendisani linde, ono ambaka linde la bolima bo lopata miya. Akaundae ta ngingo, akabeka mbo, lipaka bolima wao! ²⁹ Ani kendesani linde akasuluwase, akalengila linde mbo: Fekei komi mwa mbile lotolipowe. ³⁰ Ndjo ye akafeka, la akaka okatika ye ta bonyololo tii kani elipaka ye bolima winde. ³¹ Ekaenaka bekowa kendisani linde le lobeko, bakaoka betema wale, la bakaka okabeisa Ngene ibo ye mbeko itotina ikawomo. ³² La Ngene inde akatae la akabeka linde mbo, eeh bokowa bobe! Lomesilowe bolima bototina loka mbo olengilei limeeli. ³³ Eikaenganaka aleko laoo okela kendisani lao ngandi kanda emoi ani ekaokelekei owe? ³⁴ Ngene inde akasoma fafo, la akakesa ta baito baofoka tii kani akalipa blima winde bototina. ³⁵ Embowaka Afa ta bose ongoma loka lino yomba mbo otomesila ta betema bino buto la buto nduku inde.