¹ Mbisa iyosilisa linangoli litotina felo ii baito beke bambaka bato'oka, Yesu akaota ta Kapelanaume. ² Bokowa boya Kapiteni amoi a basilikani ambaka la wale tinatina la lingba. Kapiteni asamaka ye likama, ³ La ekaokaka ye mboli iya Yesu, akatomela ye batolioso ba Bayuda olengila linde mbo aye oyauwisa bokowa winde. ⁴ Bo bakaya ambe Yesu la bakalombokola likama mbo, Aengani mbo okelele ye ongoma, ⁵ Loka mbo ambe la losamo ta bofindi wiso, aoshwelesu Esongamelo. ⁶ Yesu, akaka libo, ani aitakaka esika la mbele, mbile bokota bo basilikani miya akatoma basau loka babeke linde mbo: Ngene oiyenaka ango wale bofi; loka loiyengani lokambo o'ote ta mbele ange. ⁷ La loka lo'ongoma aleko ndjo loikaimila loke eiyangane ambe owe. La bekaka ango lioi limoi, la bokowa wange atouwa. ⁸ Loka, ei ono lombe sekala ii beke bambe likolo liange, lombe la basilikani sekala ii toshosha chuange; lotobeka la amoi: Kaaka! La atoka; la ono moi: Yo'oko! La atoya; la bokowa wange: Kelaka ani! La atokela. ⁹ Mbile Yesu akaoka bo baoi, akamwala bokota bo basola, la, akatimba elo ta linginda lieke batutaka ye, akabeka mbo: Lotobeka lino, imbe ende ta Isalaele loiyoshi liimeli lifi ani. ¹⁰ Ekabinowaka ye ta mbele, baito beke bokota bo basola miya atomaka bo bakaosha bokowa ono ambaka la bomusi akafouwa. ¹¹ Lisiyo li mbisa, Yesu akaka ta boki bomoi bokatomo mbo: Naina, baeki binde la linginda lifi bakakenda linde ndoleemoi. ¹² Mbile ekomaka ye tinatina la boindabo boki, tene, bakatolaka ta nyele boliyo bomoi, wana ko'amoi ainango inde, ono angbeloko bolome, la akambaka la baito ba bule ba boki. ¹³ Ngene, akaena yee, akaoka ngandi loka linde, la akabeka lindembo: Oilelaka! ¹⁴ Akaka tina, la akaunda sanduku, beke batolaka bakaemala. Akabeka mbo: Wainenge, lotobeka lao emalaka! ¹⁵ La boliyo akangala'se, la aka'akola obeka, Yesu akakesa ye ambe inango inde. ¹⁶ Batotina bakambaka la bowa, la bakasimola Mungu, obeka mbo: Bonangoli bofi afoenena ambe'su, la Mungu aokendela baito binde. ¹⁷ Lioko lioi loka loya Yesu likameyana ta Yudeya itotina la ta beki betotina be tina-tina. ¹⁸ Yoani akabeisomo tayo mbeko itotina la baeki binde. ¹⁹ Akata baele, la akatoma bo ambe Yesu, loka lo'obeka linde mbo: Ombe ono atoya, lamba toumbakele asiya? ²⁰ Bakakoma tina la Yesu, bakabeka mbo: Yoani Bolufii akatome'su ambowe, loka tobeka mbo: Ombe ono atoya lamba toumbakele asiya? ²¹ Kota mbile amo, Yesu akauwisa baito ba bule ba biale, bitukulu, la belimo bebe, la akalikola baiso ba betuku be bule. ²² Akamutoela bo mbo: Kakai okabeisa la Yoani yeke okaenai la yeke okaokai: Betuku bafoena, bitukulu baokenda, baito ba baandi baotanisomo, beoko bafooka, bangbei baofufuka, mboli itanu iyonangolomo ta tobube. ²³ Liomali ambe ono loikamba likula loka linde. ²⁴ Mbile ekaka batomomu baya Yoani, Yesu akabeka la linginda, loka loya Yoani mbo: Okei okaena ndai ta liombele? Lokoli leke lotoyeyemo la lofofo? ²⁵ Ndjo, okei okaena ndai? Buto ono abati tulu ilo? Tene, beke batobata tulu ilo, la batouwa ta bolo, bambe ta ba mbele ii bekota. ²⁶ Okeiase okaenai ndai? Botondoli amoi? Iiih, lotobeka lino, lamba ono aiti botondoli: ²⁷ Loka linde, ani ikaosila osonombo ta litina linde mbo, Tene, lotoma botomomu wange felo yao, la ye atokomanya ndole ao felo yao. ²⁸ Lotobeka lino mbo ta beke bakabotomo la bataali, buto aoeta Yoani aiti, ndjo ono aeti boke ta bokota noya Mungu aeti ye la bofi. ²⁹ Baito batotina, kola bokongoli bo lindjandja, beke baokaka ye, bakalongisa Mungu, eke elufiomoko-bo la lilufi liya Yoane. ³⁰ Kola Bafalisai, la Baekisi ba bikela bakafeka lisangi liya Mungu ta liitna libo, loka baitilufiomo linde. ³¹ Loenganise baito ba Bofindi we la loni leka? Bambe kee ingi? ³² Bambe kee bana be bangalise ta liongo, batoota baito libo mbo, Tokaumelekenu filimbi, ndjo oikabinakai; tokalela bongbei, oika lelakai. ³³ Loka Yoani bolufi akaya, aitila boila la aitimwa vinya, la okabekai mbo, Ambe la bolimo bobe! ³⁴ Wana a buto aoya, aola la aomwa, la obekai mbo, Tene bolei la bolewi, botcthaki bo bakongoli ba lindjandja la baito ba bobe! ³⁵ Weli aolonga loka lobana binde batotina. ³⁶ Buto amoi ta Bafalisai akata Yesu mbo ale linde bieka eseke lomoi. Akaota ta mbele eya Bofalisai wamo la akangala ta mesa. ³⁷ Botaali amoi ta boki, botaali bo bobe, akaluwa mbo Yesu angalise ta mbele eya Bofalisai, akaya la bonyongo la baina ba liesa. ³⁸ Akaemala mbisa inde ta bakolo binde akalela, akakola otokisa bakolo binde la baye babaiso, la akaombula yo la sowe i bakolo binde, la ouwa la baina ba liesa. ³⁹ Oko eenaka Bofalisai, ono ataka ye ongoma, akabeka ta botema winde mbo, loka lo buto ono, amba koimbu Bonangoli, ani aoluwa mbo ono botaali akaunda ye ambe boni bomuna, loka ambe botaali bo bobe. ⁴⁰ Yesu akbeka linde mbo,Simona, lombe la lobeko lomoi lobeka lao. Akabeka mbo, bekaka bao, Boekesi. ⁴¹ Bokopisi amoi ambaka la baito baele ba bolima. Amoi a bolima ambaka la bieto mia liondo, asiya bieto tuku yele. ⁴² Baitimba la leka lo lipa, la akamesila bo batotina baele.Kolaongoma, ndai kati ibo oni buto atosama ye? ⁴³ Simona akabinoisa bonoko mbo, lofoenyela kembo ono akamesila bolima afoeta bofi. Akabeka linde mbo, otena wéwé. ⁴⁴ Kolaongoma, akakikowa ambe botaali akabeka la Simona mbo, otoena botaali ono? losiota ta mbele ao oikafei baye loka losoola bakolo bange; ye aotokisa bakolo bange la foo inde la afoomba yo la sowé inde. ⁴⁵ Oikafei litukumeli, ndjo ye kota lioti liange eke ye aitiki otukumaeli bakolo. ⁴⁶ Okauwa botchwé wandela baina, ndjo ye afouwa bakolo bange la baina baliesa. ⁴⁷ Yamo yoko lotobeka lao mbo, bobe winde likama yo mesilomo, loka ambe la losamo likama. Ndjo ono akamesilomo iniyo ambe la losamo loke. ⁴⁸ Akabeka la botaali mbo bobe wao bomesilomo. ⁴⁹ Beke bangalaka linde eseke lomoi, bakakola obeka mbo, ono ambe ndai, ono atomesila batchwanilo? ⁵⁰ Ye akabeka la botaali mbo, limeli liyao liosila ouwiso we; kaaka yao la lilatemi.