¹ Ta lisiyo li sabata akaeta ta bilanga bi bakoke. Baeki binde bembaka batobuna bakoke lani batola, lani bato finya yo la bao bibo. ² Bamoi ta Bafalisai baka beka mbo, loka loingi otokelai yeke yeiyengani lisiyo li sabata? ³ Yesu aka binoisela bo mbo, osilai osomai yeke ikelaka Dawidi oko eokaka ye semba la beke bembaka linde eske lomoi? ⁴ mbo akaota ta mbele Mungu, akasa bolia boke ndjomomo, akala, la akafa la beke bambaka linde eske llomoi, ene embaka mbo buto asiya ailaka, sakolo ko bakanga. ⁵ Akabeka aleko libo mbo, Wana a buto ambe Ngene a sabata. ⁶ Ta sabata esiya akaota ta esongamelo la akaekisa, la buto amoi ambaka onga, boo winde bo bolome bokafomela. ⁷ Bandiki la Bafalisai batokuka ye, oena lamba atouwisa ye ta sabata, loka banye ndole eositaka ye. ⁸ Ye akalembela baenyeli bibo la akabeka la bltolome ono aomeli boo mbo, Emalaka la katikati! La akaemala ongoma. ⁹ Yesu akabeka libo mbo, lotofelenu mbo, iyengani okela likuwa libe ao lilo lisiyo li sabata? Iyengani ouwisa liwawi, lamba oseisa lio? ¹⁰ Mbisa iyo moila bo batotina, akabeka libo mbo, Ilaka boo wao likolo! Akakela kongoma, la boo winde bokauwa. ¹¹ Bakawala la lisomi kofu, la bakabekamana lamba batokelela Yesu loni lobeko. ¹² Ta basiyo bamo akatomoa la akaka ta longo oka sembola. Akakolo elo lotiyo lototina losembolo Mungu. ¹³ Ekandjaka nongo akata baeki binde elo embe ye, la akachakola liou la baele katikati ibo, la akata bo mbo Baeki. ¹⁴ Simona ono atomoko mbo Petelo, la Andelea nduku inde, la Yakobo, la Yoani, la Filipo, la Balatelemi, ¹⁵ la Matayo , la Toma, la Yakobo wana a Alafai, la Simona ono atomoko mbo Moselote, ¹⁶ la Yuda wana a Yakobo, la Yuda buto a Keliota ono aungisaka ye. ¹⁷ Akasulua la be eseke lomoi, la akaemala ta eseke lo fololo, la linginda lifi li baeki binde bembaka, la likama li baito beke bafoaka ta Yuda, la Yelusaleme, la wenda bo bomongo bo Tulo la Sidona. Bakaya oya okaye la louwisomo la biale bibo. ¹⁸ Beke bambaka la belimo bebe bakauwisomo. ¹⁹ likama li baito bakatokta ounda ye, loka bofoka bokambaka botofoa ye la louwiso bo batotina. ²⁰ Akaila baiso binde ambe baeki binde la akabeka mbo, Liomali lino tobube, loka mbo Bokota boy Mungu bombe wino. ²¹ Liomali lino baito otokai semba kanikani, loka mbo otokumai solo. Liomali lino baito otolelai kanikani, loka mbo otosekai. ²² Liomali lino oko otoiyana baito lino, la oko bato kilenu, la oko etofoya bo lina lino kee lina libe loka loya wana a buto. ²³ Omalakai ta lisiyo liamo la tilakai la liomali, loka mbo lilipi lino limbe lifi elo ta Lobola, loka mbo bangau bibo bekelaka kongoma ta banangoli. ²⁴ Ngandi lino bafoka loka ofomoi bofoka wino. ²⁵ Ngandi lino baito beke okaokumai solo kanikani, loka mbo ombo kakai semba. Ngandi lino baito beke otosekai kanikani, loka mbo otombai la ngandi la otolelai. ²⁶ Ngandi lino yomba kembo baito batotina batobeka bolo loka lino, loka bangau bibo bekelaka banangoli la lolanga kongoma. ²⁷ Ndjo lotobeka lino baito be otokai mbo, samakai baiyani bino; kelaka bolo ta beke batoiyana lino; ²⁸ Simolakai beke batolakelenu bobe. ²⁹ Yomba mbo buto aka foumowe lobaka ta likeka limoi, enisaka ye likeka lisiya. Yomba mbo buto akaopko lowe tulu ao, oifekilaka ye la mokoto wao. ³⁰ Faka libo yeke batolengilo we. Ndo lingale biengo biao ta bakpoliki. ³¹ Kanda emoi embenu la yeme mbo baito bakelelenu, kelelaka bo kongoma. ³² Yomba mbo otosamai basamomu bino, ombei la lini lilipomu? Loka mbo baito ba bobe batosama basamomu bibo. ³³ Yomba mbo otokelai bolo ta beke baka kelelenu bolo, ombei la lini lilipomu? Baito ba bobe batokelaka aleko ongoma. ³⁴ Yomba mbo okao kopishai bieka bi baito, beke ombei la lilendelu lionya bieka bibo, ombei la lini lilipomu? Baito ba bobe batokopisha bieka mbo loka banye bieka kanda yamo la mbisa. ³⁵ Ndjo samakai baiyani bino, la kelaka bolo la kopishakai baito,ndjo oitakai botema mbo otoanyai leka, la lilipomu lino litomba lifi, la otombai bana baya Ono-Aeti likolo, loka kembo ye ambe la botema bolo ambe be baenu losamo la baito babe. ³⁶ Mbaka la ngandi kani embe Ise ino la ngandi. ³⁷ Ndo tongai buto loka mbo oitongomokoi aleko. Ndosuluwisai loka mbo oisuluwiso mokoi. Mesilakai loka mbo omesilomoi aleko. ³⁸ Fayakai la itofomo lino aleko. katikati ibao bino otofai ipimo ilo i keni ikasila loamomo la loyeyemo la loutomose. Loka mbo bato pimelenu ta ipimo yeke oka pimakai. ³⁹ Akabekela bo bombila mbo, buto a botuku aengani okendisa botuku lemo? Batotina baele baitokpase ta likemba? ⁴⁰ Boeki aiyeti boekisi winde, ndjo buto la buto, ono akaosila; oeka itotina, atomba kee boekesi winde. ⁴¹ Otomoila litoko ta liso liya nduku ao ndjo oitoena lofututu ta liso liao angene loka loingi? ⁴² Oengani obeka la nduku ao mbo, nduku, tikaka lofoye lofututu ta liso liao, ani koni oitakaena litoko ta liso liao? Buto a lolanga! foyaka koni lofututi ta liso liao, ndjo lambisa otoena fololo otomoisa litoko ta liso liya nduku ao. ⁴³ Loka mbo isandu ilo yeito bota touma tobe, la isandu ibe yeitobota touma tolo. ⁴⁴ Isandu la isandu itoluamana kota yuma inde. Loka mbo baimbo buna suke ta bekeke, la baimbo buna miwiti ta liwa koliokolio. ⁴⁵ Buto bolo atotomoisa ko bolo ta mbeko ilo isami ta botema winde, la buto bobe atotomoisa ko bobe ta mbeko ibe, loka bono winde bobeka mbeko yeke iwali ta botema winde. ⁴⁶ Loka loingi ototei Ngene, Ngene ani oitokelai mbeke yeke loka beka? ⁴⁷ Loka lo buto la buto ono akaya ambei la afoka mbeko yange la ye kolitisa yo, lotoenise nu lamba ambe kee ndai. ⁴⁸ Ambe kee buto akaswa mbele, ono akabusha bakemba, akalinda la bolundu, la akata liako likoo li batale. Tambile ekaya fela, libande lika tomboka ta mbele amo, ndjo yeikangana oyeyisa yo , loka kembo ishomo la weli. ⁴⁹ Ndjo ono aitoka baoi bande, la ailitisi yo, ambe kee buto ono akashwa mbele ndoena liako, likolo li nyele; libande likaya fela likolo linde, la likaukowa la mangu lobunowo lo mbele amo lombaka lofi fafo.