¹ Yesu akaila baiso binde likolo la akaena bafoka batota bafaefi bibo ta lisele. ² Akaena aleko botaali amoi ono angbeloko bolome ono ataka ango bakute baele. ³ La akabeka: Lotobeka lino, ta wewe mbo, ono botaali ibube aota koeta baito atotina; ⁴ loka baese yeke ikambaka libo ibube ta lisele, ndjo ye ate yeke akambaka layo ii litina, itotina inde yeke ambaka lamo loka lo'louwelo. ⁵ Ani bamoi babekaka loka lo esondjamelo, la yeke imbaka la tongeli-ngembe ta batale balo biongo bitolomoko loka lo bafaefi, Yesu akabeka mbo: ⁶ Ta basiyo batoya, ta yeke otoenai, yeitotikala ango litale likolo li litale lieke lieitofoyomo. ⁷ Bakafela ye mbo: Boekesi, eni mbile itokoma, la ingi itomba ndembe iyo mbeko? ⁸ Yesu akabinoisa mbo: Moilakai kembo oiseselakai. Loka likama batoya la lina liange la batobeka mbo: Imbei, la mbile eomba tina. Oitutakai bo. ⁹ Ta mbile oto'okai elundi lo bitumba la bayeye, oimbakai la bowa, loka yoko itoya koni felo. La yeitakamba liko. ¹⁰ La akabeka libo mbo: "Yese imoi itoemaela yese isiya, la bokota botoemaela bokota bosiya". ¹¹ Itomba la lobilimo lofi lo wenda, la biseke likama, la semba la tofalala totoenena, mbeko ii tale itokelomo la ndembe ii tale itoenena ta lobola. ¹² La felo ii itotina, batounde'nu, la bato'okise'nu wale. batokese'nu ta bisondjamelo, batokuse'nu ta bonyololo, batoka lino felo ii bekota, la felo ii bekota befi, loka lo lina liange. ¹³ Yoko itofe'nu ndole ee libekelomu. ¹⁴ La mbakai la limeli kembo oitibekai enu'angene, ¹⁵ loka lombofeke'nu bonoko bosiya la liwawi loka kembo baiyani bino batotina baimbo'engana oemaele'nu. ¹⁶ Otokesomoi ango la baise bino, banduku, kendisani la bangani, la baitoita likama ambe'nu. ¹⁷ Otoiyanai la batotina, loka lo lina liange. ¹⁸ La oitobungisai ango losowe lomoi lo bochwe wino; ¹⁹ ta ndole ee bofilili wino otouwisai belimo bino. ²⁰ Ta mbile otoenai lingida li basola ta Yelusaleme, luwakai mbo liseisomu line liomba tina. ²¹ Tikaka bangali ba Yudeya bakimbiye ta fongo. Beke batomba ta Yelusaleme batomowe mangu; beke batomba ta bilanga baitobinowa ta boki bofi. ²² Basiyo bo, batomba basiyo ba likuchi ta itotina yeke ikabeka tosiyo itoenganisomo. ²³ Ngandi, ta basiyo bamo, la bataali ba baeme la beke batomwesa bana! Loka itomba la ngandi ta boki, la lisomi loka lo baito. ²⁴ Batopkase la lowelo lo kembe, batomba bakandomu ta yese itotina, la Yelusaleme itomatekelomo ta bakolo ba yese, tiii kani mbile ee yese etoengana. ²⁵ Itomba la ndembe ta lowa, ta bondofa la tolonge. La ta nyele, itomba la bowa ta befindi baimbo luwa ango batowa isai, ta iyeli ii libande. ²⁶ Baito likama batongba loka lo bemusi bieke bitomba wenda bototina, loka bofoka bo likolo botokpase. ²⁷ La totena Wana a Buto atoya ta bose la bofoka la talaa efi. ²⁸ Mbile etokoma yo mbeko, ilaka bochwe la mbakai la bofoka; loka lolikolomo lino lo'omba tina. ²⁹ Akabeka libo we bombila: Tene isandu ii loduke la tosandu tosiya. ³⁰ Ta mbile etotomowa ngoto, otoluwai enu'angene, la loeno mbo mbile ee mbula efoakola. ³¹ Kolaongoma, mbile etokoma ye mbeko, luwakai mbo bokota boya Mungu boomba tina. ³² Lotobeise'nu ta wewe mbo, fetcho ene eitosila ango, ani yeke mbeko yeitaka koma. ³³ Lobola la nyele itoeta baoi bange baimboeta ango. ³⁴ Kebakai enu angene loka betema bino beimbaka la bolito loka loetisela lili la limwi, la baenyeli ba liwawi, loka lisiyo liamo lieimbaka futuku; ³⁵ loka itoya kee wengo ta bangali batotina ta bombo bo wenda. ³⁶ Moilakai la sembolakai mbile etotina, loka o'oshei bofowi ta yo mbeko imbokomaka, la loemalo felo iya Wana a Buto. ³⁷ Ta lisiyo, Yesu akaekisa aiteni ee mbele eya Mungu, la akaka okakpa ilo ta longo lokatomo mbo Longo lo Bilaya. ³⁸ La baito batotina, nongo-nongo, batoka elo embe ye ta esodjamelo loka lo'oka ye.