¹ Ɛlambo lo bokati boiti la bote, ikatomo mbo Ɛlambo lo lieti, lokamba tina. ² Kanga ifi iya Mungu la basoni bakalinga kanda mbo baite Yesu; la'anibakambaka la bowa loka lo baito. ³ Kumbi Satana akaota ambe Yuda ono atomoko mbo Mokeliota, ambaka amoi ta liou la baele. ⁴ Yuda akaokoma la kanga efi la bokota bee bachungi, ta baenyeli baoita ye. ⁵ Bakambaka ta liomali la bakaokana mbo bafe ye falanga. ⁶ Akaimila, la akalinga kanda emoi mbo a'anele bo Yesu ta linginda li baito. ⁷ Lisiyo li bokati boiti la bote, oko imbaka mbo baite bokoko loka lo Ɛlambo lo lieti, likakoma, ⁸ la Yesu akatoma Petelo la Yoani, akabeka mbo: Kakai okakomanyele'su bieka bi Ɛlambo lo lieti, loka mbo tole. ⁹ Bakabeka linde: Olangi mbo tokomiye bio endei? ¹⁰ Akabinoisela bo mbo: Tene, ta mbile oto'otai ta boki bofi, oto'oshai buto amoi atoli baye ta bonyongo; tutakai ye ta ene mbele ato'ota, ¹¹ la enu kobekai la ngene a mbele mbo: Ngene aobeka lao mbo: Loni eseke lombolaka Ɛlambo lo lieti la baeki bange? ¹² La atoenise'nu mbele efi ee likolo, elo ndjo etokomiye'nu Ɛlambo lo lieti. ¹³ BAkaka, la bakaosha mbeko ani abekelaka bo; la bakakomanya Ɛlambo lo lieti. ¹⁴ Ta mbile ekaya, bakangala ta mesa, la batomomu linde eseke lomoi. ¹⁵ Akabeka libo mbo: Lombe la yeme iyola lee Ɛlambo lo lieti lino, felo mbo loene bomusi; ¹⁶ loka, lotobeka lino, loimbola ale ango, kota kani itoenganisomo ta bokota boya Mungu. ¹⁷ La, akaosa kobo la akasembola licholomu, akabeka: Osakai ene kobo, anakai amo ambenu; ¹⁸ loka, lotobeka lino mbo, loimbomwa'ale kowakola laboni yuma iye vinyo, tiii kani etoya bokota boya Mungu. ¹⁹ La mbisa akaosa bokati; akasembola licholomu, akabuna la akafa libo, akabeka: Yeke imbe bindo biange, bikafomo loka lino; kelakai ani loka loenyelisei. ²⁰ Akaosa aleko kobo, mbisa ilikolase, la akafa bo, akabeka mbo: Kobo ene imbe liokani li kanikani ta ngelo yange, yeke ikautomose loka lino. ²¹ Enaka, boo boya ono atoungisei bombe lange eseke lomoi ta ene mesa. ²² Wana a Buto atoka ani embe ongoma. Ndjo ngandi la buto ono atokesa ye. ²³ La baka'akola ofelana bo'angene ndai atokela ongoma! ²⁴ Ikamba aleko ambe baeki la fiye imoi: Ndai ambe bo aengani omba bofi? ²⁵ Yesu akabeka libo mbo: Bekota be tchese batoinyamela bo, la beke batomba tolonge batomo baito balo. ²⁶ Oiwakai kee bo. Ono ambe bofi ambe'nu ambe kee ono bokikelike, la ono atokendisa ambe kee ono atokuwa. ²⁷ Ndai ambe bofi, ono ambe ta mesa, lamba ono atokuwa? Oiluwi kembo ono ambe ta mesa? La imbe ei, ani embei aiteni lombe kee ono atokuwa. ²⁸ Enu, ombei beke bakamba la bofilili lange ta bemusi biange; ²⁹ kolayamo lo'ota bokota loka lino, ani ekatika Ise ange, ³⁰ loka mbo olei la omwei ta mesa ange ta bokota wange, la loka ongali aleko ta keka loka lo'osambisa befindi liou la biele bee Isalaele. ³¹ Ngene akabeka: Simona, Simona, Satana ambe la yeme lao, loka lokendisowe kee yuma ibakoke ta bonyongo. ³² Lotosombola loka lao, loka liimeli liao liei seisamaka; la owe, ta mbile otokikowa, owangemisa banduku bao. ³³ Ngene, Petelo akabeka linde mbo: Lombe kani mbo loke lao ta bonyololo lamba ta lingba. ³⁴ La Yesu akabeka mbo: Petelo, lotobeka lao, koko eitota loko-loko ko laboni ani oitaka'anganyei mala isaso mbo loiluwi ye. ³⁵ Akabeka libo aleko mbo: Ani lotomeke'nu ndoena litanga, ndoena bilato, loni leka oenokoi? Toitieno leka, bakabinoisela ye. ³⁶ La akabeka libo mbo: Kani kani, ono ambe la litanga, aoseke, ono ambe la etelo aoseke aleko, la ono aiti la bopanga, aungiseke tulu inde loka lo'osomba emoi. ³⁷ Loka, lotobeka lino, iyenga mbo lioi liye likasonomo lienganisomo ambei mbo: Atomo ta baito bobe. La yeke imoili ei imbe oko mbo ikome. ³⁸ Bakabeka: Ngene, Tene, bepanga biele. Akabeka libo mbo: Yoko ifoengana. ³⁹ Mbisa iyotomowa, akaka, otutana la asili inde, ta Longo lo Bilaya, baeki binde bakatuta ye. ⁴⁰ Ta mbile ekomaka ye ta eseke lamo, akabeka libi mbo: Sembolakai, loka oikpakaise ta lipimomu. ⁴¹ La akaseyamana libo ta esika lolisase liokusa, la, akasuluwa la baluwi, akasembola, ⁴² akabeka mbo: Afa, okaolanga loyelekei ene kobo! Tinga mbo lisangi liange likelomoko, kanga ndjo lisangi liao. ⁴³ La bokitomo amoi akaenamana linde loka lofaye bofoka. ⁴⁴ Mbile embaka ye ta bowa bofi, akasembola likama, la tokoka chwinde tokamba kee bambimbilika ba ngelo, tokakpase ta nyele. ⁴⁵ Mbisa iyo-sembola, akaemala, la akaka ambe baeki, akaosha bo bambe ta ilo ii ngandi, ⁴⁶ la akabeka libo mbo: Loka loingi ombei ta ilo? Emalakai la sembolakai, loka mbo oiyotakai ta lipimomu. ⁴⁷ Mbile ebekaka ye lisiya, tene linginda likaya; la ono aomoko Yudasi, amoi ta liou la baele, akambaka felo ii linginda. Akaya tina la Yesu, loka lo'oloma ye likeka. ⁴⁸ La Yesu akabeka linde mbo: Yudasi, ta ndole ee kalibo ndjo otoungisa Wana a Buto. ⁴⁹ Beke bambaka linde, bakaena yeke ikomaka bakabeka: Ngene, tokpeteke bo bopanga? ⁵⁰ La amoi ibo akakpeta bokowa bo kanga efi, la akatena ye litoi li boo bolome. ⁵¹ La Yesu, akabeka libo: Tikakai, oiwakai! La, akaunda litoi li buto amo, akauwisa ye. ⁵² Yesu akabeka la botolioso, la bekota be mbele ee Mungu, la bato'olo, beke bayaka oyaemaela ye mbo: O'oyai, kee ambe wiba, la bepanga, la tosandu. ⁵³ Lokambaka basiyo batotina lino ta esondjamelo, la oikatakai boo wino ambei. Ndjo eke mbile ino, la bofoka bo balima. ⁵⁴ Mbisa iyounda Yesu, bakaka linde, la bakaotisa ye ta mbele ee bokumi bofi. Petelo atotuta la esika. ⁵⁵ Baka ba'anisa litundulundu li imbe aiteni ii loya, la bakangala se. Petelo akangala aleko eseke lomoi libo. ⁵⁶ Bokuwi bomoi botaali, akaena ye angali se felo ii imbe, akamoila ye, la akabeka: Botolome ono akambaka aleko linde. ⁵⁷ Aka'anganya ye, akabeka mbo: botaali, loi liwii ye. ⁵⁸ Mbisa ionga, asiya, akaena ye, akabeka mbo: Ombe aleko ta bo baito. Petelo akabeka mbo: Botolome, loiti libo. ⁵⁹ Ikawa mbile emoi mbisa, asiya akabeka, mbo: Ta omongo botolome ono akambaka aleko linde, loka ambe buto a Galilaya. ⁶⁰ Petelo akamutoela mbo: Botolome, loiluwi ango ani otobeka. Kota mbile amo, ani ebekaka ye, koko ekata loko-koloko. ⁶¹ Ngene, akabinowa, akamoila Petelo. La Petelo akaenyellisa lioi lieke Ngene abekelaka ye: Felo ii koko ota lokoloko laboni, otowanganyei mala isaso. ⁶² Ekatomowaka ye, akalela likama fafo. ⁶³ Baito beke baundaka Yesu bakaseola ye la bakauma ye. ⁶⁴ Bakaufa ye bombo, la bakaiyola ye, bakabeka mbo: Nangolaka, ndai akaumo we. ⁶⁵ Bakamola ye bimolo likama. ⁶⁶ Ta mbile bose bokaandja, linginda li bekota be baito, bekota, bekota befi, ba'andiki bakaoshamana eseke lomoi, la bakaaka la Yesu ta beimo bino befi. ⁶⁷ Bakaiyola mbo: Yomba mbo ombe Kilisito, beiseke'su, Yesu akamutoela bo mbo: Lokaobeise'nu, oitoimilai; ⁶⁸ la, lokafele'nu, oimbo binoisai. ⁶⁹ Kanikani, Wana a Buto atongala se ta boo bolome bo'ofoka boya Mungu. ⁷⁰ Batotina bakabeka linde mbo: Ombe Wana a Mungu? La akamutoela bo mbo: O'obekai, lombe ye. ⁷¹ Kola yamo bakabeka mbo: Tokombe ale la yeme ii libekolomu? Tofo'oka ye atobeka la bonoko winde angene.