¹ Bekaka la banduku bao batolome! La bataali lokambo baokelomo ngandi. ² Somboelakai inango ino, sombolakai; lokambo aiti bwali ange, la loiti bolome inde! Lokambo afoye ilelefe inde felo yange, la bolefela bo balome ba baito! ³ Yeiti ongoma, lotosela ye lofona, lototika ye lofona kee lisiyo li libotomu, lotoselaye bofono bo loimbele, kee nyele iofoka, kolaongoma lotoita ye la tchweme; ⁴ Kwani loimbomba la limesila ta bana binde, lokambo bambe bana ba likuwa li bofefe. ⁵ Lokambo inango ibo aokela bolefe, baeme beke batoila ye baiti la litina, lokambo: Lotoka ambe baemo bange, la fou ii nama, la kongele, baina bange la baana bange. ⁶ Yamo yoko enakai, lotokanda nddole ibo la keke ii talee yokolila ta bitutu, lokambo ai'anyaka indolendole io'weta. ⁷ Ye kotuta ba baemo binde, la baemo aimbo umbakela ye; ye koakola lolukano libo, la aimbo anya bo. Kwani ye kobeka mbo: Lotoka, la lotoinowa ambe bolome ange a felo-felo, lokambo lokambaka lalokku felo ko'eta koni ango laboni. ⁸ Aitiluwa mbo ei ndjo lotofaka bakoke, la baina; kola ongoma bakatcha ta likuwa liya Bala bakute la mbela ii loketi yeke ikakomielekei bo. ⁹ Yamo yoko loto'sa bakoke bange ta mbile inde la baina ta tengai inde, kolaongoma eikofoya fuu ii nama la bekongele yeke iyengani loufo lofona. ¹⁰ Ongoma kani lotolembela bowa winde ta baiso ba baemo binde, yamo buto ango amoi aimbo foya bo ta bao bange. ¹¹ Lotosilisa liomali linde, ba nyengina, lo'omalo tengai, tchwenga la banengina batotina bakomanyomu linde. ¹² Lotoseisa tosandu to miwiti la mesuke. Yekoako obeka mbo: Imbe lilipomu likafayomo la baeno bange, yamo lotoama bo la lo'okanda, la nama ii lokonda itoshaya bo. ¹³ Lotofa bo bemusi loka lo'osilisa bakumi baya Bala, oko efetchaka ye baina ba loketi. Kakai mbisa baemo, oselekei, Mungu akabeka ongoma. ¹⁴ Yamo yoko enakai, loto'onola bo la okendisa bo ta liombele, kwani ei kobekana libo ta betema. ¹⁵ Oko, lotofa libo bilanga bi miwiti la katikati ii fongo iya Akolo, kee boinda bo lilendelelu, onga, bokoakola lothwo beele kee mbile embaka ye litenga, la kanda emoi kee lisiyo litomoaka bo ta bokowa bo Ejipito. ¹⁶ Ta lisiyo liamo, Mungu akabeka, ombotekeni baoi: Bolome ange! Ongoma oimbotekei ale: Boekesi wange! ¹⁷ Loto'osa ta benoko bino lina liya Bala, lokambo baisonaka ango lisiyo limoi lina liya Bala. ¹⁸ Ta lisiyo liamo, lotokomia liokamani lao la nama ii lokonda, la noli ii lobola, la tchwekeka tototina totolandalanda, loto buna ta wenda lokembe lo lokoko, bopanga la bitumba; kani ei kotika bo bangale ta likukomu. ¹⁹ Lotomba baemo bao mbile etotina; lotomba aleko baemo ba momongo, liomali lotchango bobe, la losamo la ngbengbele; ²⁰ lotomba baemo bao baomoilelowe ango, kola ongoma owe kolembela Mungu. ²¹ Ta lisiyo liamo lotoinoisa baoi, Mungu akabeka ongoma, lotoinoisela lobola bonoko, kolaongoma yeko'oka aleko nyele. ²² La nyele yokoinoisela bakoke bonoko, la baanala baina, kani bokoinoisela Yijelele bonoko. ²³ Lotoloba ei angene touma ta wenda kani ei ko'okela ye ngandi; ei kobeka la Lo-Ami mbo: aaaaaombe buto ange! Ye aleko koinoisa bonoko mbo: Ombe Mungu ange.