¹ Elileke'su, mbisa iyotikana libo, tokaka mala emoi ta Kosiya, elengo ta Lodesiya, ye lino ta Palata. ² La toka'anya lisuwa lieke lieolekisaka mbale ee Fenikiya, tokalila la tokaka. ³ Oko e'eneke'su bosanga bo Sipuliya, tokatika boo boali, tokatuta ndole iso fangi ee Siliya, la toka sikama ta Tuliya, bofelo lisuwa likambaka la biongo biosuluwisa. ⁴ Toka'osha baeki, la tokangala libo basiyo bosambale, baeki, bakatomomo la Bolimo, bakabeisa Paulo aikomaka ta Yelusaleme. ⁵ La, oko ekomeke'su ta lisiyo li tunga li basiyo bosambale, tokakundja bolenga bo'oka, la baito batotina bakaya liso oya tike'su la baali la bana kota lousa lo boki bofi. Tokashwa bakulusembe ta bo'onga, la tokasembola. ⁶ La mbisa, bakasyena bee la basiaya, esu tokalila ta lisuwa, la libo bakainowa elo ambe bo. ⁷ Esilaka lokendo lo lisuwa, tokaka ta Tuliya ta Ptolemaisiya, elo tokafana kalibo la banduku, la tokangala libo lisiyo limoi. ⁸ Tokaka elengo, la tokakoma ta Kaisaliya. Eoteke'su ta mbele eya Filipo bonangoli, ono ambaka amoi ta bosambale, akasele'su se ambe ye. ⁹ Ambaka la baseka banati baitaka luwa batolome la bambaka banangoli. ¹⁰ Ani engaleke'su basiyo likama, botondoli, la lina Angabusiya, akasuluwa ta Yudeya, ¹¹ la akaya oya'oshe'su. Akaosa bokawa boya Paulo, akakanda ta bakolo la bao, la akabeka: Moilaka ani ekabeka Bolimo Botanu: Buto ono ambe la we bokawa, Bayuda batokanda ene ekawei ta Yelusaleme, la batokesowe ta bao ba Bapakano. ¹² Oko eokeke'su ongoma, esu la bangene ba eseke, tokasembola la Paulo mbo aikomaka ta Yelusaleme. ¹³ La ongoma akainoisa limutoli: Otowa ye ngi, la lolelo la lobuno botema? Lombe tina, yeiti ango mbo bakandekei, la mbisa longbo ta Yelisaleme ta lina liya Ngene Yesu. ¹⁴ Ani eitoimula ye, toisami ongoma, la tokabeka: lisangi liya Ngene likelomoko. ¹⁵ Mbisa ii lisiyo liamo, tokakundja bolenga, la tokalila ta Yelusaleme. ¹⁶ Bamoi ba baeki ba Kaisaliya bakaya aleko liso, la bakakomise'su ambe buto la lina Munasona, buto a bosanga bo Sipilo, boeki bo kwala, ambe ye etongale'su. ¹⁷ Oko ekomeke'su ta Yelusaleme, banduku baka'oshe'su la liomali. ¹⁸ Elengo lamo, Paulo akaka liso ambe Yakobo, la bato'olo tokangala eseke lomoi. ¹⁹ Mbisa iyofa bo kalibo; bakabeka itotina ye Mungu awaka ta munga ee Bapakano la lotomo linde. ²⁰ Mbile eokakak bo ongoma, bakakesa basimoli ambe Mungu, la mbisa bakabeisa ye: Otoena nduku, Bayuda bangalaka onga bakaimila, la batotina baimilele bikela bibo. ²¹ Kembo, bakata munga ii Bapakano ye ibekaka Mose, ye ibekaka ye mbo bana baitenemoko totombe la oitutakai sili. ²² Lowe ase ingi? Ndoena fiye batoya baike, la batoluwa mbo o'okoma. ²³ Ta yamo waka ye itobeke'su. Imbe ta munga iso baito banati bafoesa ekano; ²⁴ osaka bo ambowe, ombe la botanu libo eseke lomoi, oenganise yeme ibo, la mbisa batene sowe. La baito batotina batoluwa ye ika'okaka bo batobeka ta lina lio imbe lolanga, la owe aleko okende la otutela bikela. ²⁵ Ta Bapakano bee bakaimilela, tokabeisa bo la losonelo bo baluwe lofecho nama ye itofekomo la bikeko, la ngelo, la nama ene eitonomu ngingo, la bolefe. ²⁶ Kola ongoma Paulo akaosa baito bamo, akasela bo la botanu, la elengo akaota ta tepelo libo, loka iyobeisa lini liiyo litotanisomo lito enganisomo la lifaefi li buto la buto. ²⁷ Ta tunga ee lisiyo li bosambale, Bayuda ba Asiya, bakaena Paulo ta tepelo, bakasomisa baito, la bakaunda ye, ²⁸ la lomamao: Baito ba Isalayele, yaokoii! Tene buto ono atonangola biseke bitotina la ta baito batotina ndosamana la baito, ndosamana la bikela la ndosamana la lee eseke; afo'otisa ba Keleke ta tepelo; la aoseisa eseke lotanu. ²⁹ Kembo baenaka felo Tolofimo a Efeso linde ta boki bofi, la bakaenyelisa kee Paulo aka'otisaka ye ta tepelo. ³⁰ Boki bofi bototina boka mwala, la baito bakaya mangu fangi la fangi. Bakaunda Paulo, la lotomoiso ta tepelo, kola onga beinda bekakandomo. ³¹ Ta ongoma bakaya baite ye, esongo lokaya ta bekota la baito la Yelusaleme bakaota ta lofindi. ³² Ta kani kani, bakaosa basilikani la bekota, la bakaka mangu ambe bo. E'enaka bekota la basilikani ongoma, bakatika loumo Paulo. ³³ La ongoma bokota akakoma tina, akaosa ye, la akafela ye ombe ndai, la awe ase ingi. ³⁴ La ta embili bamoi batomama kanda esiya bamoi kanda esiya; yeiti iyoluwisa ta bamoi, loka lo liyembu, bakafa ishosha bake linde ta ikokonda. ³⁵ Ta ongoma akalilisomo, bakatola ye la basilikani, litina li liyembu lo embili. ³⁶ La embili lo baitobakatuta, batomama: Itakai ye! ³⁷ Oko eotisaka bo ye ta ikokonda, Paulo akabeka la bokota: Loiti la fofe lobeisowe lioi limoi? Bokota aksanola: Oluwi lobeko la ki Keleke? ³⁸ Oiti buto a Ejipito ono akasomaka kani kani, labee bakafowaka ta liombele baito elefu inati ba baito babe? ³⁹ Lombe Moyuda, ebekaka Paulo, a Talasisi la Kilikiya, buto a boki bofi we bombe la litina. Lo'olengila lao, samisekei, lobeko ii lioi lioi like ta baito. ⁴⁰ Bokota akafaye ishosha, Paulo akaemala ta etumbelo akawa bofono boi ta bao binde ambe baito. Mbile bo bakaosila ongala kimia, Paulo akafa bo lioi la libeki li Baebele, akabeka: