¹ Mbile esilaka-bo iyeli Paulo akasondja Baeki, mbisa iyonangola, akatika-bo, la akaka ta Makedonia. ² Akaeta ta boki wamo la akafa-bo boimo ta mbeko lokama, lambisa akakoma ta Ela, ³ La akaumowa elo tengai isaso. Baenyeli babe ba Bayuda bembaka loka linde eko elangaka ye mbo aote ta lisuwa loka loka ta Sulia, kolaongoma akata ta botema loka lobinowa tandole e Makedonia. ⁴ Be bakendaka linde bambaka: Sopatele,wana a Pulu, buto a Beloya; la Alisitalaka la Sekundu, baito ba Tesaloniki; la Gayo, buto a Delebe; la Timote; la Tukiko la Tolofimi, baito ba Asia. ⁵ Beke bakaka felo iso, baumbaklelekesu ta Toloa. ⁶ Ndjo esu tokaota ta lisuwa li Filipi mbisa i lisiyo li bolia boiti la bote, la mbisa i basiyo liondo tokaoshamana libo ta Toloa. Tokaumowa onga basiyo bosambale. ⁷ Ta lisiyo li yenga tokasondjamana loka lobuna bolia, la Pauloakaekisa-bo. akalingo otomoa ta lisiyo li mbisa, la akaluta liekisomu linde kota katikati e lotiyo. ⁸ Tala imbaka likma ta mbele e likolo, elo totoamanaka. ⁹ Wana botolomé amoi, lina linde mbo Yutuku, angalakase ta lililisa, la ilo ikaunda ye likama. Embaka Paulo atoekisa bosa fafo, wana botolomé ono ambe kota ilo, la akapkasé ofoa ta wenda bo isaso, la bakaemalisa ye boliyo. ¹⁰ Paulo akasulua, akalila lokolo linde, la akaunda ye ta bao, la akabeka mbo, ndobangai, loka akombe la liwawi. ¹¹ Akalila lisiya, akabuna boila la akala. Akalembela mbile esa, ti kani endjaka bose, la akafoa. ¹² Bakaka la wana la liwawi, la bakaosha bofoka likama. ¹³ Esu ndjo tootaka felo ta lisuwa, la tokakenda kota Aso, elo tokamanaka mbo toose Paulo ta lisuwa; loka engene akacthakola ndole e boili. ¹⁴ Akashamana lisota Aso, takaosa ye ta ngonge tokaaka ta Mitulene. ¹⁵ Tokaaka elo, la botombale tokamoilana la Kio; ta botombale bosiya tokaleka fangi e Samo; la ta lisiyo limbisa tokabamasé ta Milete. ¹⁶ Paulo aikamba la yeme iyobamasé ta Efese loka aiyetisaka mbile esa ta Asia, loka yeme inde imbaka mbo ambe ta Yelusaleme ta lisiyo li tuku liondo, yomba mbo itoengana linde. ¹⁷ Ta Milete ndjo atomaka ete ta Efese oota batoolo ba mbele Mungu. ¹⁸ Ekasilaka-bo okoma ambe ye, akabeka libo mbo: enu oluwi bomuna wange katikati ino mbile etitina, kot lisiyo lifelo eko esawekei eke ta Asia. ¹⁹ Lokuwelaka Ngene la lisuluwise li botema, la bileli la bakoteli yeke bitomwelei loka lo baenyeli babe ba Bayuda. ²⁰ Loikabanga onangoelenu mbeko iyengani osungenu, la oekisenu katikati i Esongamelo la mbele la mbele. ²¹ Lobele Bayuda, la Baela lobeko lokikola botema ambe Mungu, la loimielo Ngene iso Yesu Kilisito. ²² Kanikani, ei bokandomu ta bolimo, looka yange ta Yelusaleme; loiluwi lamba ini mbeko imbokomelekei elo, ²³ Sakolo ko ani bolimo botanu ambobeisekei ta boki la boki mbo lokanio, la bomusi biumbakeli ei. ²⁴ Ndjo ta baiso bange liwawi liange lieti loka lo bofi, sakolo ko losilise ndole ange la lotomo leke lokaosha ambe Ngene Yesu, loka lobekele tandole e mboli itanu ingbengbele eya Mungu. ²⁵ Kanikani ei loluwi mbo enu batotina, beke lokaisila onangola Bokota, oimboenai ale bombo wange lisiya. ²⁶ Yamo yoko lombe botanu ta ngelo ino batotina; ²⁷ Loka loikano onangoelenu lobeko loya Mungu ango lomoi. ²⁸ Kebakai loka lino angene la loka lo mbele mungu etotina ene Bolimo botanu aosila otenu bakuki loka lo yamo; mbakai bakuki ba mbelemungu ene ekasombaka ye ta ngelo inde angene. ²⁹ Ei loluwi mbo mbisa i lofoo lange nkoi iyokale batoota katikati ino, la bambotika mbelemungu. ³⁰ Katikati ino batolome batoemala oekisa tonango to lilimbi loka mbo balute Baeki mbisa ibo. ³¹ Yamo yo moilakai, la enyelakaimbo miaka isaso lotoyo ke lowa loikatika obeisenu amoi la amoi la foo ta baiso. ³² Kanikani lototikenu ta baoo baya Ngene la ta lioi linde li ngbengbele. Ye aengani oshenu la ofenu bondanda katikati i be ba bondanda. ³³ Loilengeli buto ango amoi bieto lamba wolo lamba liwati. ³⁴ Enu angene oluwi mbo bao bange baenganisaka yeme yange, la be bembaka lange. ³⁵ Tambeko itotina lofenu eikiselo mbo iyengani lino okela ongoma loka losunga be babolelamu, la oenyela aleko baoi baya Ngene Yesu mbo, liomali lioesa lifoeta liomali liowanya. ³⁶ Ekasika ye obeka ongoma, akasuwa ta baluwi la akasombola libo batotina eseke lomoi. ³⁷ Batotina bakalela likama, la bakalila ta ngingo eya Paulo bakatoamela ye. ³⁸ Bembaka la ngandi i likama loka lo ani ebekaka ye mbo oimboenai ale bombe winde lisiya.Kolaongoma bakaaka okatika ye ta lisuwa.