¹ La mbo ye itotina imbe sekala ii bakuwa, moilakai baekisi bibo kee olitisa ye, la mbo lina liya Mungu la bikela biengbaka. ² La bɛɛ bambe baiimeli, loka loota baimbo'osa ye; sekala litina liye ikaosonomo ii mbaka basamomu linde; ango imbe baiimeli la basamomu, bee baundani loka bakele bolo. Ɛkisa ye mbeko la obekela bo. ³ Yomba buto amoi afokisa bikela aitoundana la lie lioi liya Ngene iso Yesu Kilisito la ta bikela oengana la bobe. ⁴ Akabangisomo la lofolo, ailuwi leka la ambe la wale bofelo ta touwa, la bobekabeka baoi, bakatikela ye loka lo lisomi, baito ba litongi tongi, la ba weli bobe. ⁵ Lolutakano la baito, ekanyaka mbo aoka, ofekila ye la wewe, la oenya mbo la bobe imbe efowe'elo lo bataliya. ⁶ Imbe, kolaongoma, ekende lomoi lofi lo botaliya, la bobe bo liokmani; ⁷ mbile ango emoi loitoli leka ango lomoi ta wenda la bakasila mbo toikatola leka. ⁸ Yomba mbo, tombe la bieka la tulu, yamo yokosila. ⁹ La bɛɛ bambe la yeme ioanya atopka ilingila ta batchanilo, ta ilonga, la ta ibule bee bambe seka a bɛɛ basamomu ba batotila aiteni ii baito bakaoseisama la obunga. ¹⁰ La losamo lo falanga imbe litina li boili bo bobe, la baito la amoi, umbakelaka owanya, baokaesika la liimeli, la bakakusomo bo angene ta eseke lo bomusi. ¹¹ Loka lao buto aya Mungu, kimbiyaka ye la lukaka (liengani) omongo, bobe, liimeli, losamo, botema bosa, la ɛyaii. ¹² Nanamaka bitumba bilo ta liimeli, lieke limbe liwawi li layalaya, ambe ono akatowe lioi la ambe ndai ono akelaka otondola feo ii baito ba bule la lilendelu. ¹³ Lototikowe, felo iya Mungu ono atosa liwawi ta biongo bitotina, la felo iya Yesu Kilisito, ayambolaka la weli felo iya Pilato. ¹⁴ Tchungakai likela, la louwo ndoena litchwanelo, ndoena loseiso, teee kota lieneni liya Yesu Kilisito. ¹⁵ Amboenisaka ta mbile inde la basamomu balo engene Bouwesi, Bokota ta bekota la mbo Ngene aba ngene. ¹⁶ Ango amoi amboanyaka bobe, oko eto'owa liangangi liye lieti la litina, mbo ango buto amoi akaena la aimboena ambe ono ambe la lokuku la bofoka bo layalaya. Ongoma! ¹⁷ Obeka la baito la falanga onga layalaya toomba baito ba lofolo, la aitaka botema ta bieka biye beiyengani, la otaka ye ambe Mungu, la atofaye'su la likama bieka bitotina loka lo'omale. ¹⁸ Bakata ye la okela bolo, ombe buto a falanga la bakuwa balo, owanyaka eyaii, ¹⁹ loka lo'anya likuwa ta liako li ofoka, mbisa owanya liwawi li omongo. ²⁰ Timote, botchungi bo mbele ee biongo, la ofeka bangali ba bulebule la ailuwi lie likuwa; ²¹ la lobekobeko bobe ta kalasi ene embe likuwa la baito bamoi, beke batobinoela liimeli. Tikaka mbo ngbengbele embe lino!