¹ Ei paulo botomomu boya Kilisito Yesu loka lo ishosha iya Mungu bouwesi wiso la Kilisito Yesu ono ambe lilendelu liso, ² losonelo'we Timoté, wana ange a wéwé ta limeli. Tikaka ngbengbele la ngandi la haï ofowa ambe Mungu ise la Kilisito Yesu, Ngene iso imbe lao. ³ Ekekei ta Makedoniya lokafa lao boimo mbo otikalé ta Efeso yeiti loka lonangola mbeko ye imbe la litchuanelo. ⁴ La ndota botema wao ta bembila bule la tokoko titi ango la litina. yamo itotomoisa amboko yiye yeitosunga lisangi liya Mungu ta limeli. ⁵ Tunga e boimo bototina bombe losamo le lotofowa ta botema botani, la liluwi lilo la limeli lieti la lilimbi. ⁶ Basiya baosila ofowa ta yo mbeko bafoota ta lobekobeko. ⁷ Balangi omba Baekesi ba bikela, imbe ende ani eitoluwa bo mbeko ye batobeka, la mbeko ye batoekisa. ⁸ Toluwi mbo bikela bimbe boolo yomba mbo buto atokelisa itotina likuwa ta ndolé ene engani. ⁹ Eke oluwi mbo bikela biyeikelomu loka lo be baengani, ndjo ikelomo ndjo loka lo baito be baotolitisa bikela la baito ba liyeye, baito be baitosembolaka baito ba bobe baito baiti la liyengani. la baito baitolitisa Mungu, baito be batokutcha baise la bainango bibo, baiti ba baiti, ¹⁰ Baito ba bolefé, baito be batolala la batolomé lemo, beke batolapa ndoenganisa la mbeko isiya yeke itoemaela tonango to omongo. ¹¹ Tonango tchuamo kanda emoi la Mboli ilo ii talaa eya Mungu la lokuku yeke ikafomo lange loka lokuka yo. ¹² Lotobinoisa kelekele ambe Bouwesi wange ye Kilisito Ngene iso, loka aotei mbo loengani la aotei ta likuwa. ¹³ Imbe ende ani embekei felo bomoli boya Mungu la boenisi wale la boseoli. akaokelei ngandi, lokelaka yo oko eituluwei litina la oko ani loitaka imila. ¹⁴ Ngbenbgele eya Ngene iso ifoutama lioko liange likama loka lange eseke lomoi ta limeli la losamo le lombe ambe Kilisito Yesu. ¹⁵ Lioi liye limbe wéwé la liyengani oimilomo mbo Kilisito akayaka ta wenda loka louwisa baito ba bobe, ei aleko lombe a felofelo ambe bo. ¹⁶ Afokelei ngandi ta litina mbo Yesu Kilisito afooena botema boosa, ambei loka loenisa kee ta ambe be batoimila ye loka lo liwawi li layalaya. ¹⁷ Ambe Bokota bo layalaya, ono Mungu aitongbaka, ono aitoenenaka, lkuku lombe latalaa layalaya koongoma! ¹⁸ E wanange Timoté, lofa lao le ekela ta bao bao, kanda emoi kee baoi ba kwala beke bakafowa ta banangoli loka lao, mbo onane etumba loolo ta bomuna bolo, ¹⁹ La ombe la limeli la liluwi lilo li botema. Basiya baiti ale lamo, labaosila olindisa limeli libo. ²⁰ Umenaï la Alesandala bambe ongoma, lokusa bo ta bao baya Satana loka baeke otika lomoliso.