¹ Yavfia angili ánga Kilisito, indje vfiami ebhela, dyoi lami la mpumatima l'isambola na mpumatima wa kengo: ² Ina bhukuku ta dhene, ka na iyoka bhukali bha mbese iibha á mpumatima. ³ Mungusa iondhue igwali ku bhanene n'tunane ka igwala dhomu na Kilisito dyulu dya la bha monima, bha bhutia bhami iyekana na mobhi, ⁴ Bhaa bha bha Isalaeli, anga bhaa bha na tiko, ka ba obibo, ka na malonga, ka na selia, ka na inekambila Mbali, ⁵ Ka na malaki, ka na bhidje bhabho, anga bhaa Kilisito ú idjana mobhi, undjo ú ikulu la minguso mitopa, Mbali m'bhalikiane masi matopa. Inôô. ⁶ Indjese na ivfia taa livfia la Mbali litikala mbese koko. Mungusa bhatopa bhaa bhueka á Isalaeli bhandje abho bha Isalaeli, ⁷ Ka, dyulu la igwala á libhoti la Abhalayama, bhandje abho bhatopa bhana bhese, nge ivfiana: anga Isaaka libhoti lai livfundue, ⁸ Evfi vfele taa indjese bhana bha mobhi bhaa bha bhana bha Mbali, nge ibhana bha ilaki bhaa bha bhabhonane toku libhoti. ⁹ Ena, na iyo, livfia la ilaki: iidji á evfumbu aiyo kuio, ka Sala ú odhue mana mulume. ¹⁰ Ka, kaamo ibhia dyokuto anga Lebheka, undjo ú owana lila na Isaaka idja wasu kutomoi. ¹¹ Mungusa imbi ese bhana bhandje abho bha bhutale, ka bhandje abho bha kie ekima ao obhibhi, ambusa taa igwali iakisane mawazo ma Mbali, na mbese ibhona mekambo, ka na iyonda kulimoi ya undjo ú bhisie. ¹² Lebheka ú sowana: n'dumanga ú kambilie n'dhadhu toku ikpaluana: ¹³ E munda Yakobho ka m'bhilia Esau. ¹⁴ Tuvfie kotiyo indje? i na mbese indjini anga Mbali? mbese! ¹⁵ Mungusa uvfia na Musa: emugu bhu kuku anga undji emululie bhukuku, ka e samie undjo yoonduwe inesamea. ¹⁶ Na iyo kotiyo, iyo idje bhoniese undjo ú ondue, ao undjo u ondue isame ana, nge anga Mbali undjo ú ugue bhukuku. ¹⁷ Ngo ma kpalua muvfia na Falao: inetemia á bhubhi bhku bhuwo mungusa wa ivfanisia lokulu lami ligwali likpolane á kisi n'topa. ¹⁸ Na eyo, ú muguli bhukuku undjo ú mundue ka ukpingbi manisie n'tima anga undjo ú ondhue. ¹⁹ Nesauwe: mungusa wa endje uvfamie kaamo? ngo owe undjo ú n'kane á iyonda lese? ²⁰ Hôôô mushe, owe, owe neni undjo ú tuwani nganyi na Mbali? ndiko ya n'kondubha ivfie na undjo ú kamba: mungusa wa endje wa ikia dyito? ²¹ Amadja ndiko andjese mukula n'kondubha, na ikamba na bhutiti namuna temoi ndiko ya obibo ka na ndiko ya mbese obibo? ²² Ka tuvfi titani, ani Mbali, na iyonda ivfanisia bhusungu bhese ka na ivfanisia lokulu lese, udjelia ibhelia la liete ndiko dja bhusungu djio dji kambana dyulu dya ituka, ²³ Ka ani ú onda ivfanisia bhu gumia bhese bha obibo á ndiko dja bhukuku djio utayalisia, dyulu la obibo? ²⁴ Na eyo útu bhisia, mbese ku bhayudha, nge kaamo anga bhapano, ²⁵ Iyekana na iyo uvfia á Oseya: ibhisie bhushe bhami undjo sa bhiese mushe waami, ka mu ondusia wami undjo sa bhese mu ondusia wami; ²⁶ Ka dyaa bhubha sowa: nundjanu bhushe bhami! nugwalie bha bhisiane bhana bha Mbali wa m'bike. ²⁷ Isaya, ngambo yese, uvfama dyulu la Isalaeli: dyaa esabho ya bhana bha Isalaeli igwalie toku iseke la obhingi la dhene, bhaa bha tikalie bha gwalie bha bhike. ²⁸ Mungusa Bhwáná, ú malie mungusa wese ka na itina ku endjini; ngo Bhwáná ukiie ema ta bhua dyulu la kisi. ²⁹ Ka, toku Isaya uvfia apele: ani Bhwáná wa bhukali sa tutiki lese libhoti, amba tubhia bha óúwe toku Sodhomo, amba tubhia bha vfilane na Gomola. ³⁰ Tuvfi kotiyo titani? Bhapagano, bhaa bhavfungale abho bhu endjini, bhu udha bhu endjini, bhu endjini bhuo bhu idja á idjelia, ³¹ Na dyokuto Isalaeli, uvfungala salia ya bhu endjini, sa kianiese á selia iyo. ³² Mungusa wa endje/ mungusa Isalaeli úvfungala, mbese na idjelia, nge toku á mekambo. Bhututalana á libhoi la likia, ³³ Iyekana na iyo ikpaluana: bhonai, ya avfisia á Siyona libhoi la likiya ka la ikosiana, ka undjo un'djelie andje gwaliese na bhutshoni.