¹ Indjese kotio ketetino na ukumu anga bhaa bha ánga Yesu Kilisito. ² Na eyo, selia ya mpumatima wa ibhika ánga Yesu Kilisito i ndesisia á selia ya djambi ka na ya ligua. ³ Ngo ema iyo indje wezekaniese á selia, mungusa mobhi ú avfisia mbese lokulu, Mbali ú okumua djambi á mobhi, na ituma, mungusa wa djambi, monaese ku bhanene á semele na mobhi muvfilane na úwo wa djambi, ⁴ Ka iyo ambusa taa bhuendjini bha selia bhugwali bhu akisiane angasu, bhaa tu luvfue mbese iyekana na mobhi, nge iyekana na mpumatima. ⁵ Na eyo, bhaa, bha bhikie na mobhi, bha ekie minguso ma mibhi, ka bhaa bha bhikie iyekana na mpumatima, bha ondhuwe minguso ma mpumatima. ⁶ Ka kulu ya mobhi, i ligwa, ka kulu ya mpumatima i ibhika ka na bhuguwe; ⁷ Mungusa kulu ya mobhi i bhuakodhu na Mbali, mungusa undjese á itshi ya selia ya Mbali, ka undje pasiese á ta bhuwa. ⁸ Ngo bhaa bhabhikie na kulu ya mobhi Mbali andje seiese nabho. ⁹ Nuwe, nundjebhikianu na kulu ya mobhi, nge kulu ya mpumatima, ani mpumatima wa Mbali ú mugwale anganu. Ani mushe andjese na mpumatima wa Kilisito, andjese mushe wa Kilisito. ¹⁰ Ka ani Kilisito ú anganu, mobhi, iekima, ú mubhike dyulu la bhuendjini. ¹¹ Ka ani mpumatima wa undjo ú úmusia Yesu anga bhaa bhogwa ú mugwale anganu, undjo ú umusia Kilisito anga bhaa bhuogwa ú iganisie dyokuto ibhika á mebhi manu mamiogwe na mpumatima wese úwo ú mugwale anganu. ¹² Na eyo kotiyo, bhamonima, túndje asu ma vfute ya mobhi, taa tubhiki dyulu la mobhi. ¹³ Ani nu bhikie na kulu ya mobhi, nu úguwe; nge ani na nubhikie na kulu ya mpumatima, na olusia kulu dja mobhi, nu bhikie, ¹⁴ Mungusa bhatopa bhaa bha luvfusianie na mpumatima wa Mbali bha bhana bha Mbali. ¹⁵ Ka nupateanu mpumatima wa bhukobhe, mungusa nugwali kaamo á bhuwa; nge nutapata mpumatima wa idjelia na úwo tu lilie: Abha! Tita! ¹⁶ Mpumatima úwo mukulu aao atusambola á mpumatima wasu taa tu bhana bha Mbali. ¹⁷ Ngo, ani tu bhana, tu dyokuto bhana bha tiko: bhana bha tiko ya Mbali, ka bhana bha tiko mulungo na Kilisito, ani tueni mpuli nana ambusa taa tu gwali bha bibisiane nabho bhatopa. ¹⁸ Ywaza taa mipuli ma evfumbu ino indje gwaliese namuna temoi na obibo luwo lú idjie luwo bhatuvfanisie. ¹⁹ Dyokuto bhushe bha sibhie na kulu etopa iyenisiana la bhana bha Mbali. ²⁰ Mungusa bhushe bhubhia na bhisiú, mbese na ionda labho, nge mungua wa undjo ú avfisia, ²¹ Na ikpalia liyo ligwali dyokuto lusisiane á bhukobhe bha kanyaka, dyulu la iudha uhulu la obibo la bhana bha Mbali. ²² Ngo, tudjibhi taa, mpaka bhusi bhuno, bhushe bhatopa bha teseka ka na iyena mpuli wa ibhuta. ²³ Ka indjese ku idje; nge djuwe dyokuto bhaa tuna malumbuko ma mpumatima, djuwe dyokuto tu tesikie ku bhanene, na isibhaka idjelia, iesisiana la djambi dja mobhi wasu. ²⁴ Mungusa tugwalie bhabhike dyulu la ikpalia. Ngo, ikpalia lio tu enie indje tese ikpalia: liyo tu enie, tupasi ili kpalia kaamo? ²⁵ Nge ani takpalia liyo tundje eni asu, tu lisibhie na ibhelia. ²⁶ Inamuna ku emoi dyokuto mpumatima wa tu vfulia na bhulelu bhwasu, mungusa tundje djibhiasu iyo tupasi ivfema á ivfema lasu. Nge mpumatima úwo mukulu aao útú vfemilie na mpuli úwo tundje djibhiasu tumba, ²⁷ Ka undjo ú vfungalie idjibha á mipumatima iyo i mawazo ma mpumatima, mungusa i Mbali undjo utu vfemilie dyulu la bhaa bha kengo. ²⁸ Tudjibhie, na eyo, taa bhima bhitopa bhikambie á bhukima bha bhaa bha mundu Mbali, na bhaa bha bhabhisiane iyekana na iyonda lese. ²⁹ Ngo bhaa ubha djibha pikilie, ubha dyokuto sa bha minula bha gwali bha vfilane na akuvfe wa mona wese, ambusa taa mona wese agwali wa pikilie á ibhutala anga bhaa bha wanyinya. ³⁰ Ka bhaa ubhaminulu, ubha dyokuto mubha bhisie, ka bha ubha bhisia ubha bhanda endjini; ka bhaa ubha bhanda endjini, ubha biba dyokuto. ³¹ Tuvfikotiyo titani na iyena bhima bhino? Ani Mbali ú dyulu lasu, neni undjo ú sikie? ³² Idje, undjo sa sikeese na mona wese idje mukulu aao, ngo uowa mome wese dyulu lasu bhatopa mungusa endje andje tu owe asu bhima bhitopa nana? ³³ Neni undjo ú sitakie bhaa bhu minulana na Mbali? I Mbali undjo ú bha bhandilie bhu endjini. ³⁴ Neni undjo úbha okumuwe? Kilisito ú ogwa, kaamo, ú ómuwa, ú á ilume la Mbali, ka únevfema dyulu lasu! ³⁵ Neni undjo utu avfisie dhomu na bhuundhusia bha Kilisito? igwalie mipulu, ao mateso, ao isagiana, ao egwa, ao bholumbo, ao ligwa, ao abanda? ³⁶ Toku bhusi, liyo bhatubhonie toku mekoko miyo mitinani bha enyi. ³⁷ Nge miyo mitopa ta toka dyulu la undjo utuonda. ³⁸ Mungusa edjibhi taa imbi ligwa imbi ibhika, imbi bha tambia, imbi bhakota bha kisi, imbi bhima bha masi mano imbi bhio bhi idjie, ³⁹ Imbi djokulu, imbi bhu ikongo, imbi bhu dhou, imbi iyomo ema, indje pasiese itukenisia dhomu na bhu ondusia bha Mbali bhu asemele na Kilisito Bhwáná bhaasu.