¹ na igwala bha bhandané na idjelia, tu na bhuguwé anga Mbali na bhwáná bhasu Yesu Kilisito. ² anga undjo tu udha na pakiya idjelia lokowa lúwo, a semele na iyo tu nao bhasimé, ka tadji bibisia a ikpalia a obibo la Mbali. ³ Kaamo kotiyo tudji bibisie à mipuli, na idjibha taa mipuli mibhutùé ibhélià. ⁴ Ibhelià là kiya itoka, kà itoka là kiyà ikpalia. ⁵ Ngo ikpalià lindjé kombièse, mungusà bhu ondusia bha Mbali bhù akà à mipumatimamasú na Mpumatima wa Kengo úwo ubhià mùtú owé. ⁶ Mungusa dyaa túbhià ka àmo mbèse lokulu, Klisto, à ogwa dyulu la bhàa bhà na djambi. ⁷ I kpingbi ta mushé à ogu ikulu la mushé wa endjini. Mushé upasi i ugwa dyulu là mushé wà n'kima. ⁸ Ngé Mbali avfanisià bhu ondusia bhèse dyulu lasú, na iyo, dyàa tubhià bhushé bha djambi, Klisto uogwà dyulu làsú. ⁹ Na iéta iyo, ketetino tóuwà bha bhanda né na manyika mèse, tugwaliè bha bhi ké nànà à bhusungu. ¹⁰ Ngo ani, dyaa tubhia bha akodhu, tubhia bhalongané na Mbali, na ligwa là monà èse, idyokuto, na igwala bhalongané tugwaliè bha bhikisiané na ibhikà lèse. ¹¹ Kà mbèse kuna éyo, nge kaaamo tu dji bibisiè angà Mbali na Bhwáná bhasu Yesu klisto na undjo ketitino tubhà bha údhé i longana. ¹² Na iyo, toku i anga mushé tomoi iyo djambi dji lumilà à kisi, kà na djambi ilumila ligwa, ká na iyo ligwa li áka anga bhushé bhatopa mungusá bhatopá bhú kià djambi! ¹³ Ngo mpáká à selià djambi djibhá á kisi. Ngo djambi dji indjèse dyàa selia indjèse. ¹⁴ Na dyito, ligwa litabhálá tangià Adhamu mpaka kú anga Musa, kuna anga bhàaa bhakiabho djambi dja mbèse i ésimia selià évfilané na dja Adhamu, iyo i bhosio bhá undjo ú idjiè. ¹⁵ Nge sibhaèse na liowa la ketiti toku là djambi; mungusá, ani na djambi dja mushé tomoi i na bhagi bháabhu ogwa na iyéna taa lokowa là Mbali kà na liowa la lokowa li idjé anga mushé tomoi, Yesu Klisto, djibhia dji àké anga bhagi. ¹⁶ Ká sibhià èse na liowá tuko liyo likianà na tomoi undjo úkiya djambi, ngo kisha djambi ku djimoi iyo isambia li ouwaa okúmú, kamo kotiyo liowa là ketiti luowà libhandané à djambi djigi. ¹⁷ Ani à djambi dja tomoi ligwa li tabhala na idji kalesi, ina dyokuto bhàa bhu udhˆè lokowa lúgi kà liowa lá bhuéndjini bhatabhalie à ibhaka na Yesu Klisto idji kalesi. ¹⁸ Na éto kotiyo, toku na djambi ku djimoi okumu lu gbokábhushé bhatopa, i namuna temoi na kosà ku temoi ya selia ibhandana liyo li disiè ibhika là áká anga mushé n'topá. ¹⁹ Mungusa na ikanda iesimià lá mushé tomoi bhagi bhu ouwá na djambi, inamuna ku témoi i esimia lá tomoi bha gwaliè endjini. ²⁰ Ngó selia i idja mungusá djambi dji étà, ngé dyaà djambi djiéta djigi, lokowa luétilà. ²¹ Na éyo, toku djambi dji tabhalà na ligwá, dyokuto lokowa lú tabhalà na bhu endjini dyulu là ibhika là masiku matopa, na Yesu Kilisito Bhwáná wasu.