¹ Tuvfie titani isua la abalayama, idjasu, uudha iyekana na mobhi? ² Ani Abalayama udjikiana isua la mekambo, ubha na koko ya idjilombishia, nge mbese apele na Mbali. ³ Ngo bikpalua la vfia titani? Abalayama udjilia Mbali, ka eyo ilomba taa u endjini. ⁴ Anga, anga undjo ukiiye mokambo tomoyi, evfindo yese ilimbie, mbese tuku lokowa, nge tuku ema temoyi ya vfute; ⁵ ka anga undjo sakiese mokambo, nge undjo adjelia mushe wa mbese ne mondua Mbali, idjelia lese lilombisie a bhwindjini. ⁶ Namna temoyi Daudi avfia aisua la busumba bha mushé undjo Mbali ulombisia bwendjini mbese mekambo: ⁷ iseya lii anga bhaa mabhii mabho bhasemehana, ka bhaa djambi djabho bhoundana! ⁸ Iseya lii anga mushé undjo Bhwáná salombishe ese djambi djese! ⁹ Iseya liyo yese ku isua la bhagbega, au ii dyukuito isua la bhadjudhe? ngo ta vfia taa idjelia ilombisiana bhwendjini anga Abalayama. ¹⁰ Ilombisiana angese titani? iy'ambusha, au apele na dhudha lese? subhese sa kuwe dhudha, ubha n'djudhe. ¹¹ Ka uu udha epi ya dhudha, tuku linya ya bhwendjini iyo u udha isua la idjilia evfumbu iyo ubha n'djudhe, munguso agwali idja bhatopa bhaa bha bhadjudhe bhaa bhadjelia, isua la bhwendjini ilombisiana nabho dyukuito. ¹² Ka idja bhagbega, bhaa bhanjabho bhagbega, nge bhaa bhaluvfu kaamo a molulu wwa idjelia ya idjasu Abalayama evfumbu iyo ubha n'djudhe. ¹³ Mbese isua la bhutumbu iyo bhotiko bha kisi ilakiana mono anga Abalayama au a libhoti lese, iyi isua la bhwendjini bha idjelia. ¹⁴ Ngo, ani bha bhutikala na tiko isua la bhutumba, idjelia indje gwaliese ka ilaki la lugwa. ¹⁵ Munguso taa bhutumba bhudishakie bhusungu, ka dya bhutumba bhundjese bhubhi bhundjese. ¹⁶ Na koko taa bhaa bhutikala na tiko bha munguso wa idjelia, isua la na taa igwali isua la lokowa, na taa ilaki ligwali la menemene a libhoti litopa, mbese kwa anga bhaa bha ichi la bhutumba, nge dyukuito anga bhaa bha na idjelia anga Abalayama, idja asu bhatopa, iyekana na eyo ikpaluana. ¹⁷ Yane avfishia idje wa bhikita ta bhigii u idje ase apele na anga undju un'djelia, Mbali, undjo oowa ibhika anga bhaa bhogwa, ka undjo ubhishie bhima bhio bhindese tuku taaa bhi bhiya. ¹⁸ Ikpalia imbiese tuku undjia ni ikpalia etopa, udjelia, mungusa taa agwali idje wa bhikita ta bhagi, iyekanaka liyo bhu n'sua mono: libhoti ligwali ta lugii. ¹⁹ Ka, sakata idjelia lese, sa juwese taa mobhi wese ubha sa doga, mungusa abha sa akishia bhidjo mia temoi, ka na taa Sala sabha tese a evfumbu ya ibhuta bhana. ²⁰ Sabha ese na madjidji, isua likanda idjelia, dyulu la ilaki la Mbali; nge idjelia lese imua lokulu, na ine lombishia Mbali. ²¹ Ka abha na idjelia angili na taa eyo alaka ikini dyukuito. ²² Isua lao la lombishia bhwendjini angese. ²³ Nge mbese ni isua lese ku kalese ikpaluana na taa iyo ilombi angese; ²⁴ Idyukuito kamo ni isua lasu, eyo ilombi angasu, a djuwe bhaa ta djelia undjo umumushia anga bhaa bhogwa Yesu Bhwáná bhasu, ²⁵ ka omua isua tudjikiana bhushé bha endjini.