¹ Paulo, n'kambia wa Yesu Kilisito, mubhisiane taa agwali n'tende, bhum'minula taa á kokolia livfia la Mbali, ² Undjo ubhia mu lakane tangia ngbe na Mbali na paki ya bhatende bhese á makpaluwa ma kengo, ³ Ka iyo ibhonie mona wese m'bhutale á libhoti la Dawidi, iyekana na mobhi, ⁴ Ka nuvfanisiane mona wa Mbali na lokulu, iyekana na mpumatima wa bhukengo, á iumuwa anga bhaa bha ogwa, Yesu Kilisito Bhwáná wasu, ⁵ Angese tu udha lokowa ka bhutende, dyula la ikenisia na linya lese á iesimia idjelia, la bha pagano, ⁶ A semele nabho nu dyokuto, nuwe bhaa nubhisiana na Yesu Kilisito. ⁷ Anga bhatopa bhaa, á Loma, bha bhaondusia bha Mbali, bha bhisiane igwala bha kengo: kia lokowa ka bhuguwe bhugwali bhu owane na Mbali idja wasu ka anga Bhwáná wasu Yesu Kilisito. ⁸ Ya iganisia pikilie djokowa anga Mbali wami ma ietila anga Yesu Kilisito, dyulu lanu bhatopa, na dyito idjelia lanu i edjibhikiane á kisi ku n'tubhu. ⁹ Mbali, undjo in'kambilie á mpumatima wami á livfia la mona wese, ú n'samboli wami wa iyo inekpoliye masi kumatopa, ¹⁰ Na ivfema mingo na mingo lanu anga Mbali na iudha ambusa nao, na iyonda lese, bhukima bha ikena angese. ¹¹ Ngo yonduwe ene eni, dyulu la inesowa nuwe zawadi la mpumatima, ambusa taa nu gwali bha kame. ¹² Ao dyokuto, mungusa tu gwali na n'vfevfene djuwe bhatopa á idjelia iyo itubhonie djuwe bhatopa, anganu ka na angami. ¹³ Indje onduani inetikila nuwe á mbese idjibha, bhamonima, bha mingo migi ibha waza ikena ikonenyunya ambusa taa epati puma anganu, toku á bhikita bhimo; nge si pate ami namuna ya ikena. ¹⁴ Ina mungusa na bha Giliki, ka na bha Epala, bhaa bha na otinga ka bhaa bha na mabhela. ¹⁵ Na eto, ina kulu egi ya inekokolia nuwe, dyokuto livfia la Mbali, nuwe bhaa nu á Loma. ¹⁶ Mungusa indje ami na bhutshoni á livfia la Mbali: i lokulu la Mbali á ibhika la n'topa undjo adjelia, bha yudha pikiliye ka bha Giliki, ¹⁷ Mungusa angese i ienikiane bhu endjini bha Mbali á idjilia ka dyulu la idjelia. ¹⁸ Bhusungu bha Mbali bhu bhuenisiane á ikulu la nguvfa na bhaa bhutomoka bhatopa ka na bhu mbese endjini bha bhushe bhaa bha sigilie angili mbese koko, ¹⁹ Mungusa iyo opasie idjibha taa i ya Mbali i enikianie nabho, Mbali ubha vfanisia. ²⁰ Na eyo, bhima bha mbese ienikana bha Mbali, lokulu lese la masi matopa ka bhu Mbali bhese, bhienikanie na madjo, tangia dyaa kisi ú kiana, iyekana na mekambo mese. Bhandje abho kotiyo na isameana, ²¹ Mungusa na inedjibha Mbali, bham'bibe abho toku Mbali, ka bha miganisie abho lokowa; nge bhubhola á mawazo mabho, ka mipumatima mabho ma mbese otinga mibhia á livfue. ²² Na idji ena taa bha bhatumba, bhu ouwa na tombe; ²³ Ka bhu basia obibo la Mbali la mbese bhubhi á akuvfe wa mushe undjo ú m'bhibhi, manoli, tumbu dja makutu ta manai ka na dja idhadha. ²⁴ I na eyo Mbali ú bhatikilisia á bhusulu, eyekana na kulu ya mipumatima mabho: taa mebhi mabho ku bhanene migwali mbese esima: ²⁵ Ibho, bhaa bhu bhasia angili wa Mbali á ebhela, ka bhaa bhu abuduwa ka ikambila iyo ikiana á egula ya undjo ú kia, undjo ubhalikiya masi kumatopa. Innôô!! ²⁶ I dyulu la eyo Mbali ú bhatikisia á kulu dja sulu: mungusa bhali bhabho bhu bhasia hali ya ibhutala á iyo i ietane na hali ya ibhutala; ²⁷ Ka inamuna ku emoi bhalume, bhutikila hali la ibhutala la mwali, bhadji owa á kulu djabho ibho ngungu, na ikia bhalume na bhalume bhima bha bhusulu, ka na ipata ibho bhakulu bhaao musaala uwo ú muengimane na mekambo wabho. ²⁸ Toku bhabhabho na kulu wa inedjibha Mbali, Mbali ú bhatikilisia á hali djabho dja dji bhibhi, dyulu la ikia bhima bha bhi bhi bhi, ²⁹ Na igwala bha idjale na tumba etopa ya bhima bha mbese endjini, bha idjale na kulu, dja iyola, dja mbiko, dja bhuswele, dja ikombana; ³⁰ Aba ebhela, mushe wa ebhela, mushe wa bhusulu, mushe wa malonda, mushe wa ivfenyuwa, mushe wa inedyabha, bhaa bha bhaidjale na bhubhi, bhaa bhandje esimie abho bha bhutia bhabho, bhaa bhandje abho na otinga, ³¹ Bhaa bha esimie selia, bhaa bhana bhuondusia bha ibhutala, na bhukuku. ³² Ka imbi toku bha djibhie okumu la Mbali, iyo ivfie taa bha oguwe, bhaa bha kiie bhima toku bhiyo, mbese kúu toku bha bhi kiie, bha bha okane nana bhaa bhabhi kiie.