¹ Hôô mushe, ugwali mbiai neni, owe undjo ú okumue, úna ukumu la mbese iibha, mungusa, na i ukumua bhamo,udji okumuwe ku bhanene, mungusa owe undjo wa ukumuwa, uküe namuna kutemoi. ² Tudjibhie, na eyo, taa okumu la Mbali anga bhaa bha küe bhima toku bhio, ka iyekana na angili. ³ Ka uwazie, hôô mushe, undjo ú okumuwe bhaa bha küe bhima toku bhino, ka bha bhaküe, taa ubhikie á úkúmu la Mbali? ⁴ Ao wasinuwa bhugumia bha bhukima bhese, ibhelia lese, ka na ebhelia lese la mpumatima muta, na mbese idjibha taa bhukima bha Mbali bhunetumuwe á idjibhasia? ⁵ Nge, na mpumatima wai wa kpingbi ka na mpumatima wai wa mbese bhukuku, wadji avfisia lito la bhusungu dyulu la bhusi bha bhusungu na ienikiana la bhu endji bhwa okumu la Mbali, ⁶ Iyo ya ouwe anga kila mushe iyekana na mekambo mese; ⁷ Na iyavfisia ibhika la masi kumatopa angabhaa na ibhelia a ikia ekima, avfungalie esima, obibo ka na mbese iúgwa; ⁸ Nge linya ka na bhusungu anga bhaa, na mpumatima wa mbiko, bhandje esimiabho selia ka bha onduwe iyo indjese selia. ⁹ Meyeye ka na mipuli á mpumatima wa mushe ntopa undjo ú kue bhubhi, pikilie anga bhayuda, ambusa anga bha Giliki! ¹⁰ Obibo, esima ka bhuguwe anga ntopa undjo uküe ekima pikilie anga bhayuda, ambusa anga bha Giliki! ¹¹ Mungusa apele na Mbali indjese na idjeliana. ¹² Bhatopa bhaa bhukia djambi na mbese selia bha oguwe dyokuto mbese selia, ka bhatopa bhaa bhukia djambi na selia, bha ukumuanie na selia. ¹³ Na eyo, indjese bhaa ba okie selia bhaa bha endjini á pele na Mbali, nge ibhaa bha ikambisie bha gwalie bha bhandan. ¹⁴ Ani bha pagano, bhaa bhandje djibhiabho selia, bha küe iyo ikpaluana á selia, bhaa, bhandje abho na selia yabho ku bhanene; ¹⁵ Bha vfanisie taa mokambo wa selia un'kpaluane á mipumatima mabho, dyoi la mpumatima myabho na kü bhusamboli, ka mawazo mabho misitakianie oa mitikilanie mungo na mungo. ¹⁶ I iyo idjanilie á bhusi bhuwo, iyekana na livfia lami la Mbali, Mbali ú okunuwe na Yesu Kilisito mekambo mamikobhane ma bhushe. ¹⁷ Owe undjo udjiouwe linya la muyuda, undjo umugwale á selia, owe undjo udji bibisie anga Mbali, ¹⁸ Undjo udjibhie iyonda lese, undjo udjibhie mekambo mese ma mikima, na igwala mugulusiane na selia; ¹⁹ Owe undjo undji vfetakie ta udjibhi iluvfusia bhushe bha bhutiti, pena wa bhaa bha á livfuwe, ²⁰ Munganga wa dhene wa bha ewiyawiya, mweli wabha edudu, mungusa ú, á selia paki ya otinga ka ya angili. ²¹ Owe kotiyo, undjo ugulie bhaamo, undje djigulusiai owe mukulu aao! owe undjo ukokolie ta mbese iteiya, wa teiya! ²² Owe undjo undjo usikisie makanyi, wa kena makanyi! owe undjo usikisia iabuduwa mesilo, wa abuduwa mesilo! ²³ Owe undjo ukúe obibo la selia, wa sika ine mesimia Mbali na iluvfa kuvfikuvfi na selia! ²⁴ Mungusa linya la Mbali dyulu lanu ili sesaka anga bha pagano, toku iyo iekpaluane. ²⁵ Dhudha lu lukima, ani wa esemia aao, nge aniwaluvfa kuvf kuvfi na selia aao, dhudhalai lindje ta ese dhudha. ²⁶ Ani kotiyo n'djudhe á esimia lúúsa la selia ya dhudha, bhudjudhe bhese bhundje gwaliese toku dhudha? ²⁷ N'djudhe wa ibhutala, undjo á esimia selia, andjene okumuese owe undjo uluvfue kuvfi kuvfi, na igwala n'djebhe selia ya dhudha? ²⁸ Muyuda, indjese undjo ú an'bhongo na selia ka dhudha, indjese luwo lu luenekane á mobhi, ²⁹ Nge muyuda i undjo ú asemele na selia, ka dhudha i iyo ya mpumatima; iyekana na mawazo ka mbese na makpalua. Djumbo dja obibo dja bhayuda djindjese dja bhushe, nge dja Mbali.