¹ N'dumanga wa bhakoli avfuya: bhima bhino bhu dyito? ² Setefano á kpetaniya: bhamonima bha bhalume ká bha Tita, okayi! Mbali wa lobibo un'djánila idjá wasú Abhalayama, dyaa manga ubhiya á Mezopotania, ápele na idjé iko djumaná á Halani; ká an'sowa: ³ Tika ékita yáyi ká libhoti layi, ká kena á ékita iyo énevfanisiye. ⁴ Aésàa vfele kotiyo á ikita yabha Kaladayo, ká áko djamana á Halani. Dyàa ám'búsa na ligwa lá idjidje, Mbali ún'kenisia á ékita iyo nu bhadjumané masi máno; ⁵ Sá núwe ése mamuláká ta mámoyi á ekita iyo, imbi tàa egula ya iyavfisiya okulu, ngé á laká iné nuwá mamuláká, ká na libhoti lésé ambusa nàná, imbi toku sa bhiese na móna. ⁶ Mbali uvfiya dyitaa: libhoti lésé liko gwaliye á ekita ya bhakeni bhá énisianiye mpuli ká bha tesekiyèe bhidjo miya ta inyayi. ⁷ Ngé á ekita iyo bha énisianie mpuli i émi undjo undjo éyi okunuwe, Mbali avfiya. Ambusa na, dyàa, bhá vfundúwe, ká bhá nikambiliye á egula á yoku iyo. ⁸ Ká amo Mbali á muwa Abhalayama iyokana dyúlú la dhúdha; ká na dyàa, Abhalayama na ine bhuta Isaka, an'tisiya dhúdha kisa masi munáne; Isaka an'bhuta Yakobho á bhúta bhinyangulu ta bhúú na bhamo ta bhavfili. ⁹ Bhinyangúlú bhàa, bhá mugwa Yosefu liya bhú n'kulisiya ká bhá n'kenisiya á Edjipito. ¹⁰ Ngé Mbali úbhiya nàná ká ú mesisiya á mipuli miyo mitopa; ú múwá bhutumba ká á udhá lokówa ápele na Falao, nikota wa Edjipito, undjo ú mavfisiyá Guvelenele wa Edjipito ká wa yavfulu yésé etopá. ¹¹ Egwa ta dhéne i kiana á Edjipito etopa, ká kuna á Kanana. Monyényo ubhiyá ta dhéne á ndeyi; ká bhatitá bhásu bhapate abho namuna ya idhiya. ¹² Yakobho á óká táa ibhiya na ngáno v Edjipito, ká abhá tumábha Tita bhasu mungo wa kwánza. ¹³ Ká á mungo wa mávfili, Yosefu udji bhikiyana na bhawanyinya bhèsé ká Falao udjibha libhóti lèsé. ¹⁴ Ká, Yosefu ú tuma bhá kongeyá idje wesé Yakobho ká na libhoti lèsé litopa, liyo libhiya na bhushe makomo sabha na táno. ¹⁵ Yakobho úkiana á Edjipito, dyàa úko ogwa, na bha idje bhásu; ¹⁶ Ká bhubha vfevfá mupáka á Shekemu ká na ibha óna á madjako màa Abhalayama ú kùlà, na likoli ta likáli, anga bhána bhá Amuli, Tita wa Shekemu. ¹⁷ Evfumbu ya óúwa tshekedhé iyo ibhiya yá akisiana iláki lá Mbali anga Abhalayama ta ligi á Abhalayama lá bhutilá ta ligi á Edjipito, ¹⁸ Mpáka dyokaa n'kota undjomo úko énikáná, undjo san'djibhé ta ése Yosefu. ¹⁹ Nkota úndjo, ubha na liyá na kabhila yasu, na ibhá énisiya mpúli bhatita bhasu ká na ilúusiya táa bhabhá túú ká na ibhá óla bhána bhá bhasú, mungusá bhané kenilé na ibhútala. ²⁰ Á evfumbu iyo, ibhútala Musa, undjo úbhiya n'kima á mádjo má Mbali. ubhiya mú isiye èsé ku méli ta misáso á yavfulu ya idjidje; ²¹ Ká, dyàa ubhiya mutuwáné, n'seké wa Falao úména ká an'geyá, ká an'kiká tóku móna wesé. ²² Musa úkikisiyana na asili wa bhá Edjipito, ká ubhiya na lokúlu á mavfiya ká á mekambo. ²³ Ubhá sá akisiya myáka makomo ta mánayi, dyáa upáta mawazo á mpumatima wèsé má iko nyunya bhá wanyinya bhèsé, bhána bhá Isalaeli. ²⁴ Aéná tomoyi súne énisiana mpuli, ká, an'vfamila, ká an'vfila undjo ubhá enisiana mpuli, ká am'bhudjv mu Edjipito undjo. ²⁵ Ukpáliya tàa bha wanya bhèsé bhá djibhie táa Mbali uha oúwe ibhika lábho á mabho mese; ngé bhá djibhé abhó. ²⁶ Kapúma aaó, abhá djánila dyàa bhubhásiana, ká abhá komólá bhá gwali na bhúgúwe: bhalúme, abhá sowá, nubha wanyinya; na éndje nu enisiniye mpúli núwe ngungu? ²⁷ Ngé undjo ubhi menisiya wanyaése mpuli á nuniká, na ivfiya taa: néni undjo úné avfisiya nkota ká n'tumbá wású? ²⁸ Ú ondúwe ini ndúla tóku wá mulá iloko mu Edjipito ²⁹ Na iyóka livfiya liyo Musa ákená màvfi ká ákena iko djumana á ékita ebhisiané Midiyani, dyàa ubhútá bhána bhá bhalume tábha vfili. ³⁰ Ambusa na myaka makomo ta má nayi n'tambiya tomoya an'djanilá, á n'talá wá mpená wá iseke wá Sinayi, á elámi yá isala liyo itshúwána á bhiti. ³¹ Musa,na iyéna iyo, á sangála toko iyo i enikianá á madjo mèse; ká toku ubhiya sú bhambiye iko éna, dyoyi lá Bhwáná lá okáná: ³² Émi Mbali wa bha idjé bhánú, Mbali wa Abhalayama, wa Isaaka, ká wa Yakobho. Ká Musa, na iyándja ibhilima, sá toké ta èsé ibhóna. ³³ Bhwáná an'sowó: bhiya bhiláto bháyi, mungusá egulá iyo owé ú n'témé, i egulá yá kéngo. ³⁴ I éna mpúli wá bhushe bhámi bhàa bhá á Edjipito, yá óká ndila djábhó ká ya éka iko bhá bhikisiya. ketétino, kèná, enétumúwe á Edjipito. ³⁵ I Musa idjokundjo, undjo bhú n'lambúlá, na ivfiya táa: néni undjo uné avfisiya nkota ká n'tumba? i undjo Mbali úntumá toku n'kotá ká m'bhikisiyá na lokulu lá ntambiya undjo un'djanilá á bhiti bhá isala. ³⁶ I idje undjo ubha lugusiyá á Edjipito, na ikiya ma adyábho ká bhikako á ékita ya Edjipito, á obhungi lá dhéne lá ngúla ngúla ká na á m'pena wa iseke, á bhidjo makómó ta manayi. ³⁷ I, i Musa undjo uvfia na bhána bhá Isalaeli: Mbali ú tubhuluwe ánganu n'kanga tomoyi toku emi. ³⁸ I idjé undjo, á etúlumilo lá mpéna wa iséke, úbhiya na n'tambiya undjo ubhi vfiya nàná á ntalá wá Sinayi ká na bhá idje bhásu, ú údha mavfiya má Mbali máa mu kolianá na bhakanga, dyúlú lá itú owá. ³⁹ Bha idjé bhasú bha óndé abhó iné mesimiya, bhúsi ka inémóka, ká mawazo má ikpudha á Edjipito mabhá gboká, ⁴⁰ Na ine sowa Aloni táa: útu kiliya tú mbali tuwo tú gwalie ápele nàsú; mungusa Musa únó undjo útú bhiyá á Edjipito, túndjé djibhiye ta asu ani óuwá neni. ⁴¹ Ka, á masi màa, bhú múla móna wa ngombé, bha owá sa dháka á mosilo, ká bhá séeá na makambo má mabhó mabhó. ⁴² Ngo Mbali abhá tuliyá nkongo, ká abhátikilá mungusa bhú abúdúwá ká abha owá kotino á mábhó má bhasudhá bhá ikulu lá nguvfá iyekana toku ikpáluwáná á malubhá má bhakanga: nu induwá liowá lá libhiké ká liowa lángá Mbali á bhidjo makómó ta nayi á mpéna wá iseke, Eee yavfulu ya Isalaeli? ⁴³ Nuvfévfa étanda ya Moloki ká na aduwáduwá wa simbali sánú Lafaniya, bha ákuvfé bhàa nú kambá dyúlú lv núwe i abuduwá! Dyokúto iné kenisiye núwe i éta Bhabhilona ⁴⁴ Bha idjé bhásu bhubhá á mpena wá iséke, na etandá ya bhusamboli, túko ú lúusiya undjo unsowá Musa tàa akii iyekana na háli iyo ú éná. ⁴⁵ Ká bha idje bhásu bhún'dha ka bhali tangánisiya mulungo na Yosuwa á ndeyi dja bhikita bhiyo,ká Mbali ú bhá ságá ápele na bha idje bhásu mpáka ku á masi má Dhaudha. ⁴⁶ Dhaudha ú údhá lokowa anga MBali ká uvfemá taa ákpeli Kanisa ya Mbali wa Yakobho, ⁴⁷ Ká ibhá Solomono undjo ú kpela kanisa iyo. ⁴⁸ Ngé Mbali andjé gwagwaliese á semele na yavfulu iyo ikpeláná na mabhó má bhushe, toku nkangv úvfiyá: ⁴⁹ I kulu lá nguvfá i egulá ya iyavfisia mákulu mámi. indje yavfulu iyo nu ikpeliye; Bhwáná avfia, ká egulá ya niya iyo igwaliye yá iyama lámi? ⁵⁰ Indjèsé mabho mámi màa nú kambá bhima bhino bhitopá? ⁵¹ Nuwe bhàa nusiká idjeliya, bhadjudhe bhá mipumátima ká bhá matoyi! Núwe bhàa nu bhatuwá nganyi á mpumatima wa kéngo. Núwe nú tóku bha idje bhánú. ⁵² Bhatende ha niya bhaa bha énisianéabhó mpuli na bha idjé bhánú? Bhubhá óla úndjo wa éndjini, undjo nú mulusiyá máno masi, ká i núwe bhàa nu mulá, ⁵³ Nuwe bhaa nu udhá seliya iyekaná na ukumu lá bha tambiya, ká nuli ngbélé anú! ⁵⁴ Na iyóka mavfia màa, bhubhiya na bhusungu á mipumatima myabhó ká bhú máta bhandjiki dyulu lèsé. ⁵⁵ Ngé Setefano, mu idjalé na mpumatima wa kéngo, ká nubhóné á ikulu lá nguvfá, ú éná obibo lá Mbali. ⁵⁶ Ka avfiya: énáyi, ya éna ikulú lá nguvfá li ogulané, ká móna wa mushe nutemé á ilúme lá Mbali. ⁵⁷ Bhúvfá màta ikpé, na isiga matoyi mábhó, ká bhatopá bhá n'kenila, ⁵⁸ Bhan'lutá á bhovfó na ndeyi ya dhéne, ká na ine móvfula mambúwo. Bha samboli bhú avfisiya ngombé djabhó á makulu má n'nongo tomoyi mubhisiané Saulo. ⁵⁹ Ká bhú movfúla Setefano mambúwo, undjo ubhá n'vfema Mbali ká na ivfia tàa: Bhwáná Yesu, pokéya mpumatima wámi! ⁶⁰ Ká á tshumá malú avfámá na dyóyi djabhó! ká ambúsa na mavfiya màa, idje ilálà.