¹ Á wakati úwo, esabho ya bhatende igbukúmaná, bho Yunani bhú ngúngúmáká dyúlú lá bha Hebalania, múngusá bhali bhasiana bhabhó bhú bhiyo bhaénékáné bhúle á bhima bhiyo bhubhi vfakanakiya masi matopá, ² Bhaa tabhú na bhamo ta bhavfili, bhu bhisiya bhámo bhatende bhagi, ká bhúvfia: indjese ékima taa tutikilá livfia lá Mbali ká ikambila, méza. ³ Ina éto, bhamónimá, minuláyi á kati yanú bhushe sábha, bháa bhabha samboli ékima tàa bhá bhaidjalé na mpumátima wa kengo ká na bhútúmbá ká tu bha owa mokambo uwo. ⁴ Ka djúwe, tú keniliye na ivfema angá Mbali ká na mokambo wa livfia lese. ⁵ Mawazó màa má fulaisiya étulumilo ku étubhú. Bhú minula Setefano, mushe muidjale na idjeliya ká na mpumátima wa kéngo, Filipo, na Polokolo, na Nikanola, na Timoni, na Palemena, ka na Nikolao, undjo ú basiya Atiokiya. ⁶ Bhúbha vfanisiya ápele na bhatende, bhàa ambusa na ine vfema Mbali, bhu avfisiya mábhó mábhó á mituwe mábhó. ⁷ Livfiya la Mbali lidji liya ivfandjala, esabho ya bhatende ya ongezeka egi á Yelusalema, ká ali gàa wa dyombo dja bhakanga bhúésimiya idjeliya liyo. ⁸ Setefano, muidjále na lokówa ká na lokulu, ubha kiya ma adyabho ka na bhukako bha dhéné angá bhushe. ⁹ Bháamo bhushe bhá Sinagogi bha bhushiané Walibheletino, bhàa bhá Kulene ká bhàa bhá Walesanduliya, na bha Yuda bhá Kilikiya ká bhá Aziya, bhú andjá i iyàna na Setefano; ¹⁰ Ngé bhátoké abhó ibhéliyá á bhutúmbá ká á mpumátima úwo úbhi vfia naó. ¹¹ Na éyo bhúówa bhushe makókó má mabhibhi màa muvfiya: Tú n'óka súnevfiya mavfia má inésesaka Musa ká na Mbali. ¹² Bhú gbegbisiya bhushe, bhagagúlú ká bha kpalúwá, ká bhá n'kuliya á mobhi, bha n'dunga, ká bhankenisiya á n'túwá. ¹³ Bhan'samboliyá á bhubhi na ivfia: mushe úno andje tikiese isesáká égulá yá kéngo ká na seliya; ¹⁴ Múngusa ta móka ivfiya tàa Yesu, mushe wa Nazareti, útukúwe egula ino, ka ubhasiye asili iyo Musa utu owa. ¹⁵ Bhatopa bhaa bhu bhiya á semele na n'tuwá na inébhóna Setefano, bhú éna bhosiyo bhèse evfilane na wa n'tambiya.