¹ Dyaa mwango idungiana ta tukenie á Italia, ta muwa n'dumanga wa dyombho la bhasudha Augusito, na linya la Yulio, Paulo na bhamo bhushe bha mu dyalolo. ² Tudjamila á kúkú wa Adalamiti, undjo úbhia taa úkpangbi Azia, ka ta kena, tubhia dyaa na Alisitaliko, mushe wa Makedonia ma Tesalonika. ³ A'puma aaó, ta kiana á Sidona. Yulio, úndjo úbhi ingbela Paulo ekima, á luusia Paulo akeni anga bha mbèni bhese ka bhako udhu liboi labho. ⁴ Ta ésa dyaa, ta nanula á ésanga ya Kipulo mungusa movfuvfu útusigila. ⁵ Ambusa na ikalia dyabha la dhene lio la idaa malivfa á Kilikia ka na Pamufulia, ta kiana á Mila ya Lukia. ⁶ Ka dyaa, n'dumanga wa bhasudha, á kpoka kúkú tomoi wa Alesandulia undjo ubhi kena á Italia, ta djamila. ⁷ Dyaa masi tamagi tu idjaka bhodhe bhodhe, ka ibhia na matata dyaa tu ko óuwa á Kinido, dyaa movfuvfu si idji la esanga ya Kelete, ani-bhongo wa Salumoni. ⁸ Ta linga na mpuli, ka ta kiana á égu la iyo libhisiana liko la likima, tshékédhé na dyaa ibhia ndei ya dhène ya Lasea. ⁹ Evfumbu ta eta ya eta, ka iluvfa na kuku dyouwa tshisi, ngo masi dyokuto ya ifunga mubhia imo ma eta. ¹⁰ Na dyito Paulo á kpetia bha amo, na ivfia: hôô bhalume, ya ena taa iluvfa lino lindje kandièse matata, ka mbese ibholisia bhima. Indjese ku dyulu la bhakumbo ka na kúkú, nge kaamo dyulu la bhushe bhású. ¹¹ N'dumanga wa bhasudha, úbha óka bhó kú aluvfusia kúkú ka na mukula kúkú, sa ókèèse navfia ma Paulo. ¹² Ka toku liko libiese likima dyulu la masi ma lugwe, bhaamo bha onda bha esi na ikena á Foiniki, liko la Kelese lio libhona opasika la idji la idjakoko ka na opasika la ikulu la idjakolo, dyaa bha djumanie ietisia masi ma lugwe. ¹³ Movfuvfu wa mbèse lokulu wa vfumba, bha tubhula sindiko ka bha kpangba an'kpangba wa esanga ya Kelete, na ikpaa taa bhaudha selia yabho. ¹⁴ Nge ketetino movfuvfu wa lokulu, uwo bha bhisie taa Eulakilo, wa vfumbha á esanga. ¹⁵ Kúkú ágiana na movfuvfu, mbese ta ése itoka ikambana na movfuvfu, ka teneti kilisia ikena tititi. ¹⁶ Tuéta i idji sa sisanga tasi moi na linya la Kahuda ka ta ena mpuli na ikena ánga mweli wa Salupa; ¹⁷ Ambusa na ine n'tubhula kuku, bha vfungala namna ya ibha vfulia na ititia kuku, ka na iondua taa bhaneko ukame á iseke la Siliti, bha dulusia ngombe djio djibhia toku mápupa makuku. Na dyito, bhane tikisia, bha geiyana na movfuvfu. ¹⁸ Toku tubhia bha bhitilane ta egi na movfuvfu, kapuma aao ta kulia bha kumbo a'obhingi la dhene. ¹⁹ Ka bhusi bha masaso ta tua na mabho masu ku bhanene bhima bha kuku. ²⁰ Dyuvfa ka na bha dhaduwa bhiéni kianiése masi ta maghi, ka movfuvfu ubhia na lokulu la ituéta djuwe túbholisia ikpalia litopa la itu bhikisia. ²¹ Tubha tasu mbese idhia evfumbu ta eta. Ngo Paulo, a'tema a' bholigogo bhabho a'bhasowa: hôô bhalume, ibhia ekpie nuindoki ka mbese djue iésa a'Kelete, amba tuku maniasu na mpuli uno ka na ibholisia bhima. ²² Ketetino yane komola nuwe gwalai na mbese iondua; ta ómoi wanu andje eni tèsè mpuli, ka indje gwali ta èse na ibholisia bhima ku bhokubhio bha kúkú tèsè. ²³ N'tambia wa Mbali undjo enáná ka na undjo ekambilie, i idjanila bhotio bhuno, ²⁴ Ka isowa: Paulo, mbese iondua; ekpie taa ò sambi á pele na Kaisala, ka ena, Mbali uneowa patopa bhaa unabho, á kúkú. ²⁵ Na isowa dyito, hôô bhalume djeliai, ngo ena ikpalia anga Mbali taa égwalie tókù bhi isowa mono. ²⁶ Nge tu ukamie á esanga ta emoi. ²⁷ A'bhotio bha masi taa bhúú na mamo ta manai, dyaa tubhi ikena na ivfitavfita á dyabha la Adiliatiko, bhushe bha mokambo ya kuku, á katikati wa bhotio bha ena ta bhaandja ibhambha á misia. ²⁸ Na ikulia kipimo, bha gboka phipimo ta mavfili; dhomu ta bhua, á kulia kepimo kaamo, á gboka bhepimo ta bhúú na bhimo ta efu. ²⁹ Na bhuwa taa bhanekotu tale na bhigulu, bha kulia sindiko ta inyai a' bhobha bha kúkú, ka bhasi bha ka bhusi igiya. ³⁰ Nge toku bhushe bha mokambo wa kúkú bhu vfungala bha kenila kúkú mavfi, ka bhúsangula kúkú wa bhuwa naisowa taa bhane kulia Sindiko á bhusindo bha kúkú, ³¹ Paulo ávfia na n'dumanga wa bhasudha ka na bhasudha: ani bhushe bháno bhatikaleabhó dyokaa á kúkú ano, nundje gwalianu bha bhike. ³² Ngo bhasudha bha tina miniki ma kúkú wa bhuwá, ka bhatila ikua. ³³ Ápéle na bhùsi igia, Paulo àbha komola bhatopa bha dhü, na ivfia: ibhusibhuno bha ta bhúu na màmó tamanai iyo nubhi si bhaka ka na núwe ikama na mbese idhia. ³⁴ Yane bhisia kotio nuwe nú dhü, ngo iyo iekpie dyulu la ibhika lánú, ka indje gwaliese na úndjo úbholisie longbilièse lan'tuwe. ³⁵ Na ivfia éto, ágéya mokati, ka ambusa na iiganisia lokowa anga Mbali á pele na bhatopa, á úbhuna, ka á andja idhia. ³⁶ Ka bhatopa bhapata lokulu kaamó, bha dhia! ³⁷ Tubhia, á semele na kúkú, bhushe mia ta épili makomo sabha na sità. ³⁸ Dyaa bha óguta, bha tuwa bhakumbo ka na ngano á obhingi. ³⁹ Dyaa bhusi bhúgia, bha éné ta abhó misia; nge bha ena ta dhomú n'tungu na iseke, bha dhunga mwango wa iyenika kúkú, ani bhubhi tóká. ⁴⁰ Bha sangula bhasindiko dyulu bhatikila bhikeni á obhingi la dhène ka bha sàngila dyo kuto á sàà yoku iyo bhio bhibhia bhiliané na n'kai ambusa bha témia ngombé ya mápúpa makúkú ka bha kéna á mibhongo. ⁴¹ Nge bha kulu manila na libhoi la malivfa ma tü dyaa bhú kàmba na kúkú; ka bho sindo bha kúkú bhú kpatana, bha tikala mbese idhigà, na dyaa bhòbha bha bhúnia na lokulu la kesúkúwá. ⁴² Hhasudhá bha ókáná bhaólu bhushe bha mudyalolo na bhúá bha tàà ta omoi wabho anéàté na mòdhi. ⁴³ Nge n'dumanga na bhasudhá, úndjo úóndá inebhikisia Paulo ábhasikisia taa mbèse ibho ikia mawazo maa. A lúlúsia bhàà bhúdjibhá modhi bhanekilia ámalivfa dyulu lá ikiana á misia, ⁴⁴ Ka anga bháàmó bhá gwali ükulu lá mbao ao á bhima bhimó bha kúkú. Ka na étò bhatopa bhakiana á mùngé bha bhiké.