¹ Agilipa avfia na Paulo: úna lúúsa la ivfia mavfia mai. Ka Paulo avfàná: ² Ya dji éna n'seye, nkota Agilipa, na igwala bhusi bhúno musambé ápele nai na bhima bhitopa bhio Bhayuda bha isitaka, ³ Ngo odjibhie ta ékima asili wabho ka na mika kanyi mabhó. Yané komola kotiyo wi indoki ta gúwé. ⁴ Ibhika lami, ku itatika bhivfumbu bha bhunongo bhwami, édjibhikianie na Bhayuda bhatopa mungusa bhwieta á Yelusalema á semele na étuko yami. ⁵ Bha djibhi tangia ngbé, ani bhaóndu ibhúvfia ta ébhia mufalisayo, iyekana na sili ya kpingbi ya Kanisa yàsú. ⁶ Ka ketetino ya avfisiana a'masambo mungusa émi ikpalia iakisiana la ilaki lio Mbali úkia anga bha idje bhasu, ⁷ Ka na eyo kabhila djasú ta bhúú na djimó ta épili dji kpalie, taa dji ikambila Mbali mbèse idhogá bhotiyo ka bhusi. Idyúlú li ikpalia lio hôô nkota, ka Bhayuda bhi isitaka! ⁸ Indje! úènie mbèse idjelia taa Mbali ú úmusie bhaa ba ogwa? ⁹ Angami angili, iwézékáná ekü mingusó kuvfikuvfi na linya la Yesu wa Nazaleti. ¹⁰ I iyò ikia á Yelusalema. Ekulia á mudjalolo bhaa bha kengo ta bhagi, na iyuda lokulu lúo anga bhadumanga bha bhakoli, ka, dyaa bhubha ola idjelia toku bhaamo. ¹¹ Ibha enisia Mpuli á bha Sinagogi bhatopa, ka ya bhásulutisia bhan'sesaka Mbali. Na ietisia lámi la bhusungu angabho, ibha dungusia imbiese a'ndei ya dhène ya bhakeni. ¹² Na isowa la bhio ikena á Damasiki, na lúúsà la bhadumanga bha bhakoli. ¹³ Na ivfakana lá bhùsi, hôôô nkota, iyena na paki mpena inikúmba ka na bhaa ebha nabho mulungo mpena toomoi idhulua ikulu la nguvfa, ka uyo úngala iyeta dyuvfa. ¹⁴ Takùá bhatopa á misia, ka ya oka dyoi lio livfia na luga la Kiebhalania: Saulo, Saulo mungusa wa endje windenisi mpuli? Igwalinai kpingbi itoka iluvfa ikulu la falasa. ¹⁵ Yamanyula: owe neni, Bhwáná? ka Bhwáná avfia:emi Yesu undjo uindenisie mpuli. ¹⁶ Nge téma, ka unedungila á makulu mai; ngo éné djanilá dyulu ya ine ávfisia mushe wami wa mokambo ka nsamboli wa bhima bhio obhièna ka na bhio ovfanisiani námi. ¹⁷ Ene minula á semele na bhushe bhanó ka á semele na bha Pagano, anga bhaa yanetuma, ¹⁸ Ambusa taa úbha ogula madjo, mungusa bha esi á livfue bha tangana á mpena ka ièsá á lokulu la mugu iouwa anga Mbali; dyulu bha udhu, na idjelia angami, bhukúkú bha djambi ka bhotiko na bhaa bhakengulana. ¹⁹ Na éyo, nkota Agilipa, sitoke ta ami ibhelia iénisiana la ikuku la nguvfá: ²⁰ Anga bhaa bha Damasiki mbani, ambusa à Yelusalema á semele na Yudeya etopa, ka na anga bha Pagano, ékókólia itika djambi ká na inebhasia anga Mbali, na ikia mekambo ma ikànà na itikila djambi. ²¹ Waéna maana màà Bhayuda bhu idunga á semele na ya vfulu ya Mbali, ka bha vfungala ta bha indulusia. ²² Nge lokówa la ivfuliana na Mbali, ekumu bhike mpaka bhusi bhúno, ya kia bhusamboli á pele na bha dadu ka bhadumanga, mbèse emi ièsa á eyo bha kanga ka Musa bhuvfia ièna iyo iidjie, ²³ Idjibha taa Kilisito úéni mpuli, ka taa úgwalie wapikilie iomua anga bhaa bhougwá, ú londolúwè mpena anga bhushe ka na á bhikita. ²⁴ Tókù úbhi vfia éto dyulu dya masambo mèse, Feseto úvfia ta ikpe: Paulo, una tombe! Idjibha lai la ligi lane gilibhuwa ntuwe. ²⁵ Indjami na tombe, muesi miwa mènè mènè Fesito, Paulo a'kpetia; ièse, ku kuvfi, mavfia má angili ka má bhusumba maa evfie. ²⁶ Nkota údjibie bhima bhino, ka yan'sawa na uhulu; ngo édjibhi taa andje sinuèse éma ta émoi, mungusa miyo mieta mibhiaese mikobhane. ²⁷ Nkota Agilipa, wa bha djelia bhakanga? edjibhi taa wa bha djelia. ²⁸ Ka Agilipa avfia na Paulo: wiidyedyi ketetino ekiana mu Kilisito! ²⁹ Paulo á kpetania: egwali ketetino ao egwali ambusa, igwali ekima anga Mbali taa mbèse kuowe mukulu aao, nge kaamo na bhatopa bhaa bhi indokie bhùsibhuno, nú óuwe toku etano, iésisia isangilana! ³⁰ Nkota, Guvelenele, Bhelenike, ka bhatopa bhaa bhubhia bhadjumané nabho bha téma, ³¹ Ka, na ine luta, bhavfiana ibho na bhamó: mushe úno sa kièse éma iyo ya énilé taa àógú ao mudyalolo. ³² Ka Agilipa ávfia na Fesito: mushe úno ubha taa átikilana, ibhá gwala mbèse Kaisala inébhisia.