¹ Á evfumbu iyo, nkota Helode ándja ienisia mpuli bhamó bhushe bha kanisa, ² Ka á mula na asobho Yakobo, wanya wa Yoani. ³ Na iyena taa iyo ibhia ekima anga Bhayuda, un'dunga kaamo Petelo. Ibhia masi ma mekati mbese tivfo. ⁴ Ambusa na ine dunga ka, inekúlia á mudyalóló, á mavfisia un'ngbele na bhasudha ékumbhu tabhinai iyo ibhá na bhasudhá ta bhanai, nakulu ya iné sambisia á pele na bhushe ambusa na pasaka. ⁵ Paulo kotiyo ùbhá ngbelé á mudyalolo; ka kanisa sitiki lèse ivfenia anga Mbali dyulu lèse. ⁶ Bhotio bhúo bhubhia á pele na bhusi bhúò Helode úbhata un'sambisie, Petelo, n'sangilane na mudyalolo ta nuvfili, úbhia n'lalé á bholigógó la bhasudha ta bhavfili; ka bhasindili bha ngbelé á ékusé ya mudyalolo. ⁷ Ka éna, n'tambia tomoi wa Bhwáná á djanilá, ka mpená wa èni kianá á semele na mudyalolo. N'tambia an'susumúa Petelo, na ine mogbelangba! Medyalóló na sangulana á mabho mèse. ⁸ Ka n'tambia ansowa: sálá mokabha wai ka na bhilóló bhai. Ka á kia dyokúto. N'tambia an'sowá kaamó únékúmba na kotiyai, ka indika. ⁹ Petelo ávfundua ká n'tambia, na mbese idjibha taa iyo n'tambia úbhikia ibhia angili ká úkpalia taa ibhiloti. ¹⁰ Dyaa bhú étá égula éyo ya bhasundili ya pikilie ambusa ya mavfili, bha óuwá á pele nàbho; bhavfundua ka kèná á mokobha toomoi. Dyokáa n'tambia an'tika. ¹¹ Adjigboka idje mukulu áaó, Petelo ávfia: ya énà kotiyo namuna ya ángili taa Bhwáná an'túmà n'tambia wèse, ka undjo indesisia á òbhó wa Helode ka na bhitopa bhio Bhayuda bhúbhá sibhaka. ¹² Ambusa na idje iwazá, á kéná á yavfulu ya Malia, inya wa Yoani, úndjo úbhisiana ta Malako, dyóowá bhushe ta bhagi bhubhia bhakumanilé ká na ivfema. ¹³ Á kokúlà mulangó, ka mushe wa mokambo tomoi wa mwali, na linya la Lodha ábhqmbá ihokamila á mulángò. ¹⁴ Áné dyulia taa idyoi lá Petelo; ka, na iseiyà lèse, égulá ya taa á égulá mulangó, á kèná mavfi ikokókólia taa Petelo ú á pele na mulángó. ¹⁵ Bhan'sówá: únà tómbé. Nge ákenilá na ivfia taa iyo ivfie i angili. ¹⁶ Ka bha vfia: in'tambiá wèse. Dyaa Petelo sukuné kena na ikókula mulango. Bha égulá, ka bhúbhia bha sangalé na iné ménà. ¹⁷ Petelo, ábhá kia évfaniko na óbhó ta bhá kataná, ábhasumula namuna éyo Bhwáná am'biya á mudyalolo, ka ávfia: am'biyá á mudyalolo, ka avfia: úbhá djibhisiai Yakobho ka na bha wanyinya. Ambusa ávfundua ka á kená á égulá iyomó. ¹⁸ Dyaa bhùsi bhú giyá, bhasudhá bhubhia na ilelúà ta dhène, dyulu la idjibha taa Petelo ubha titàni. ¹⁹ Helode, á andja ine n'vfungalá ka sindili, ka aowá lúúsa ta bhabháowá a zabho. Kaamó á kéná á Yudeya ya Kaisalia, ikoósalá. ²⁰ helodhe udunga miango ma mibhibhi mio mibhonie bhushe bha Tilo ka bha Sidhona. Nge á kobha gboka na mawazo ku mamoi; ka, ambusa na igwala na bhu mbeni na Bhalasito, mongbeli yavfulu ya Helodhe, bha vfungala bhu guwe mungusa etuko yabho ibhia ebhike na bhima bha idhia ya bha ndei ya n'kota. ²¹ Bhusi ta bhumoi bha kiana, Helodhe, n'sale ngombe djese dja bhukota, ka á djumana á agima wese wa bhukota á bhasowa á pele na bhushe. ²² Bhushe bha dyoma: dyoi la mbali, mbése la mushe! ²³ Wakati wa ókuuwo, ntambia tomoi wa Bhwáná á movfula, mungusa sa óndéèse ine biba Mbali. Atina mpumatima, bha idi bhan'dhia. ²⁴ Nadyokaa livfia la Mbali la vfandjala mingo na mingo, ka ésábho ya bhatende ya gbukumiana. ²⁵ Bhalanabha ka na Saulo, ambusa na imala igulusia, bha kpudha á Yelusalema, bha idja mulungo na bha Yohane, undjo úbhisiana Malako.