¹ Bhatende ka bha monima bhaa bhu bhia a Yudeya bhu oka taa bha pagano dyokuto bhu udha livfia la Mbali. ² Ka dyaa Petelo ukena a Yelusalema, bha ngbega bha bha kame bhun'dyedya, ³ Na ivfia: ú lumila anga bha djudhe, ka udhia nabho. ⁴ Paulo ú andja ibha sowa bhodhe bhodhe iyo iyeta. ⁵ Avfia: ibhia á ndei ya dhene ya Yopa, ka dyaa ibhi vfema, ikuwa etutu ka ya ena bhiloti: ema titi, etungiane á mibhongo maao ta minai, iduluwa i esa á ikulu la nguvfa ka mpaka ku angami. ⁶ Madjo mabhone á ngombe eyo, ebhona ta tee, ka ya ena tumbu dja makulu ta manai dja kisi, tumbu dja muluwa, tumbu dja ilanda, ka na manoli ma ikulu la nguvfa. ⁷ Ka ya oka dyoi ta limoi lio lisowa: tema, Petelo, ola ka dhia. ⁸ Nge evfia: mbese, Bhwáná, ngo mbese ta emoi ya sulu ka na mbese ya tuu indjese mu tangane anganu na anyuwa. ⁹ Ka á mungo wa mavfili, dyoi la okana á ikulu la nguvfa: iyo Mbali ú vfia taa i tuu mbese iena toku i sulu. ¹⁰ Iyo iyokana mingo ta misaso; ka bhitopa bhineluta á ikulu la nguvfa. ¹¹ Ka enai: bhushe ta bha saso bha tumane anganu iesa á Kiaisalia, bhouwa wakatiwo kuuwo apele na mulango wa yavfulu iyo ibha. ¹² Mpumatima wa isowa ekeni nabho mbese i sita. bhano bhalume sita bhaa ebha nabho yakena nabho mulungo, ka ta lumila á yavfulu ya Koloneli. ¹³ Mushe atu sumula namuna eyo ú ena á yavfulu ese n'tambia üdji angese ka na ivfia: tuma á Yopa, ka un'bhisia Simoni, Petelo, ¹⁴ Undjo une souwe bhima bhio bhine bhikisie, owe ka na Bhwandja bhai bhutopa. ¹⁵ Dyaa ya andja ivfia, mpumatima wa kengo ú duluwa angabho, toku angasu á itatika. ¹⁶ Ka ya dji djulia na livfia liyo la Bhwáná: Yoani ú djinisia na malivfa, nge nuwe, nugwalie bha djinisie na mpumatima wa kengo. ¹⁷ Ngo, mungusa Mbali ubha owa liowa namuna ku emoi toku djuwe bhaa tu djelia anga Bhwáná Yesu Kilisito, epasie, emi, ikanganie na Mbali? ¹⁸ Ambusa na iyoka iyo, bha katana, ka bha biba Mbali na ivfia: Mbali kotiyo udjelia i esisia dyokuto djambi anga bha pagano, ambusa taa bha udhu ibhika. ¹⁹ Bhaa bhu bhia bha vfandjale na mpuli uwo ú idja á paki ya Setefano, bhukena mupaka á Foiniki, á semele na esanga ya Kipulo, ka á Atiokia; ikokolia livfia ku anga bha bhamo. ²⁰ Ibhia dyokuto angabho bhushe bhamo bha Kipulo ka bha kulene, bhaa, bha kiana á Atiokia, bha vfia dyokuto anga bha Giliki, ka na ibha kokolia livfia la likima la Bhwáná ubha nabho, ka bhushe bhagi bhu djelia ka bhune bhasia anga Bhwáná Yesu. ²¹ Obho wa Bhwáná ubha nabho, ka bhushe bhagi bhu djelia ka bhune bhasia anga Bhwáná. ²² Elunda ikiana á matoi ma bhushe bha kanisa ya Yelusalema, ka bhun'tuma Bhalanabha á Atiokia. ²³ Dyaa ukiana, ka uena lokowa la Mbali, ú séea, ka á bha komola bhatopa bha gwali na mpumatima tomoi nsime n'dungiane anga Bhwáná. ²⁴ Mungusa ubhia mushe n'kima, mu idjale na mpumatima wa kengo ka na idjelia. Ka dyombo ta dhene la bhushe la gbuku miana anga Bhwáná. ²⁵ Bhalanabha ukena kaamo á Talaso, ikon'vfungala Saulo; ²⁶ Ka, na ine n'gboka, an'disia á Atiokia. A edjo ku etubhu, bhu bhiku manakila á etulumilo ya kanisa, ka bhu bhigulusia bhushe ta bhagi. I bha á Atiokia iyo, mungo wa pikilie, bhatende bhubhia bha bhisiane bha Kilisito. ²⁷ A wakati uwo, bha kanga bhuesa á Yelusalema ikena á Atiokia. ²⁸ Omoi wabho, mbisiane Agabho, á tema, ka á kokolia na mpumatima wa kengo ta igwalie na egwa ta dhene á kisi n'topa. egwa eyo ikiana á masi ma n'kota Kolode. ²⁹ bhtende bhu dunga mwango wa ituma, kila mushe iyekana na iyo ú nao, musaadha anga bha wanyinya bhabho bhaa bhu bhia á Yudheya. ³⁰ Bhu bhakianisila bha gagulu iyetila mabho ma Bhalanabha ka Saulo.