¹ Nsima ya nkolo, Yesu akulaka kye tokolele baekosi bee o mokukulu nwa maa ma Tiberiade. Yabaka bobo: ² Simo Petelo, na Toma okobangye be, Nwana owa Zaa, na Natanaele moto wa mokyisi nwa Kana o Galileya, na bana ba bampele ba Zebede, na baekosi baayoko ba Yesu, babaka na be. ³ Simo Petelo aesi ya wo na bebi ne, yokye: Nakye lobo. Be, bekye: Na banga, tokye na we. Bobele, baesi ya kye kpela o vato, babuto ikye miolo. Baosi mokolo mokolo, sa zwa ekpele. ⁴ Waa limbi limbi, Yesu aesi ya teme o mokukulu nwa maa. Mena baekosi sa eba obotshe eli yo. ⁵ Yesu aesi ya wo na be, yokye: Banzenga, ozwe nwana ekpele? Bee, bekye: Phe. ⁶ Iyo, yokye: Vaka bondendi mbale ya vato eya boloo, wamozwa. Bobele, baesi ya vaka mbale me. Tebakulaka koka ibenda bondendi pho phatondaka na swe bobo nono owo. ⁷ Moekosi owabaka Yesu kazingye, aesi ya wo na Petelo, yokye: Mena, eli Nkolo, Petelo amanyaka etobu pho ya ivaka bondendi. Waoka yo obotshe mena eli Nkolo, aesi ya lata etobu me. Amba ya mivaka o maa. ⁸ Bebi ne baesi ya kye na bona vato. Babuto iongo bondendi me, botondi na swe. Baikalaka na mokukulu phenephe matambe mukama. ⁹ Waabwa bee o mokukulu, baesi ya wene nwenya wamo, batumbi swe i nwango, na mapa malangyi. ¹⁰ Yesu aesi ya wo na be, yokye: Yaka na swe mii zwe be. ¹¹ Simo Petelo aesi ya kye kpela o vato. Aesi ya abola bondendi, botondi na swe inene na iinene, munkama monomo mbuka makoo matano na iyato. Na bo watondaka bondendi me na swe nzikye babona, tephaikaka kakwa. ¹² Yesu, yokye: Bee, yaka, ya ze. Moekosi nono monomo taikaka meka imotuna obotshe: Iwe oli nza? pho baebaka obotshe eli yo Nkolo! ¹³ Bobele, Yesu aesi ya susinya waali be. Abuto ibakabela mapa me mamana na swe me mena. ¹⁴ Eye, eli mbala eya iyato eyakulaka Yesu tokolele baekosi be, wakundwa yo. ¹⁵ Waunva bee iza, Yesu amba ya tuna Simo Petelo, yokye: Simo, nwana wa Yoane, oli nwebi na nga ileka bebi baba. Iyo, yokye: Nkolo, koebe obotshe nali ekamba yawe. Yesu yokye: Obabanzakye bana ba mampate manga. ¹⁶ akuli motuna mbala eya ibale, yokye: Simo, nwana wa Yoane, oli nwebi nanga? Iyo, yokye: Iyo, Nkolo, koebe obokye nali ekamba ya we. Obanzakye mampate ma nga. ¹⁷ Akuli ya motuna mbala eya iyato, yokye: Simo, nwana wa Yoane, oli ekamba ya nga? Waamotuna Yesu mbala eya iyato, obotshe oli ekamba ya nga, Petelo amiokaka ngongo. Amba ya mobuyisa, yokye: Nkolo, koebe pho inso, koebe obotshe nali ekamba ya we! Yesu, yokye: Obanzakye mampate manga. ¹⁸ Naewole nde phele: Wabaka we nwengye, we mampenza wabaka komilasa mokaba, wakyekye mbale enso ezingye we. Kasi wamobuywa we munganga, wamotandola maboko ma we, emba moto mosuuamoelasa mokaba. Emba amokye nawe mbale ewaa, eteyikyi we zinga. ¹⁹ Awoko mapho mamana obotshe aimole bo wamowa Petelo, na bo wamoweninya yo nkemo ya Nwaphongo. Bobele, Yesu yokye: Imbengye! ²⁰ Petelo aesi ya buya miyo o nsima, aweni moekosi, owabaka Yesu kazingye, kaya babenga. Eli yo moekosi owakoloko na Yesu mi itoo, wazaka be, yokye: Nkolo, moto me, owamoeyungya, nza? ²¹ Bobele, Petelo waamowene yo, aesi ya tuna Yesu, yokye: Kayo, Nkolo, lowoo ye laamokomela? ²² Yesu, yokye: Bo nazingye obotshe ataa ba o mokyisi nono mokolo mowaa, nwamoya nga, lowo me lokyekyi we? Kasi we, imbengye! ²³ Bobele, Simo yeesi nyangwa onte ya bebi obotshe moekosi me mona, etawe. Nzuka Yesu taikaka wo na Petelo bomo babona. Awoko nde ne, yokye: Bo na zingyi obotshe abe o mokyisi nono mokolo mowaa nwamoya nga, lowo me lokyekyi we? ²⁴ Eli moekosi me mona, ooloimosi maphoo me mamana. Amakoma o Buku bobo. Toebe na obotshe maphoo, maaloimosi yo mali phele. ²⁵ Yesu akulaka kyela maphoo masuu maikye. Bobamakomaka lowoo lonolo na lonolo o Buku, naumunya obotshe mokyisi mobimba nde te mokokakyi pho ya ibomba babuku baunvaka bee koma.