¹ Bene besu bune bekpekpemani beopasa bedha koboboko a baboboko, bekeopasa ebeba sisasu. ² Kila n'ka subi'anu aopasa an'pendeze dake kagea ane kema anja, kanyongoo an'kakamisa. ³ Kanyongoo ata Klisto kaya efulaisi'ake sisake. Alakini, ayatu tondo bene bayaandeki, " Efhoti a buno baoefhota aomogulia." ⁴ Kanyongoo kema buli ne bayaandeki kala bayaandeki kanyongo a fundisa'asu kagea kanyene vumilia na kanyenea kakamana a maandeko beopasa ba na mosenda. ⁵ Bene Mokonga a vumilia na a kakamana anofhe ka mawazo no mochi na badanu sawa na Yeso Klisto. ⁶ Afhanye bene kanyongoo ka mawazo imochi oopasa n'dhokomisa Mokonga na Abake na Bosomwa nasu Yeso Klisto na efhe'enoko mochi. ⁷ Kabene sese'nani, bene goto Yeso aonosesea, ka bodoko a Mokonga. ⁸ Kanyongo nenongodei gea Klisto aya ebisi n'kpa a mokambo a balue kanyongo a dhoni a Mokonga, kagea aonise boagi ne aya ebofhi ba tatasu, ⁹ na mutaa baka a mokonda ka n'dokomisa Mokonga ka ngomi nake. Bene bayaandeki, " Kabene nekobebaae subia bakpa a mokonda na na beba inaako ka lembo." ¹⁰ Negii goto, " Fulaiani, benu bakpa a mokonda na bakpa nake." ¹¹ Angboo goto, N'bebani Bosomwa benu bobu bakpa a mokonda; bakpa bobu ba'nbebe." ¹² Isaya agii, goto, " Miigi a Yese abikaae, n'mbo a seneka ku abaae mokota gua bakpa a mokonda; bakpa a mokonda babaae na mosenda subi'ake." ¹³ Mokonga a mosenda anotumise na fulaa buli na bonjanja ka belekea, kagea ka bokuu a Loo Motakatifo botume subia mosenda. ¹⁴ Eme sisani neubi guanu, badani. Neubi gea botumi sisanu na bonjanja, botumi na ubafha. Neubi gea boopasa fundisana sisanu. Alakini neandeki ka bojeme mutanu gua kema moch kagee neekumbuse goto, kanyongo a ngoola ne Mokonga aya mofhi. ¹⁶ Ngoola ne ayatu gea neto pasi nebe n'kpa a mokambo a Klisto Yeso bamoteki mutaa bakpa a mokonda, efholea ubate koani enjeli a Mokonga, ka gea fhela a bakpa a mokonda babelekee u, sokosa na Loo Motakatifo. ¹⁷ Neopasa nee bebe subia Yeso Klisto ka mokambo namo mutaa Mokonga. ¹⁸ Kanyongoo ke kengeae yonga ka kema tondo n'ne Klisto aonisi mutamo ka esima a bakpa a mokonda. N'ne ane kema ne aonekani ka yonga na ka mokambo, ¹⁹ ka bokuu na alama na ban'pa, na bokuu a Loo a Mokonga. N'ne ayatu gea kpanga ka Yelusalema, na timba dhanga koni na Iliriko, nebedhe ka n'tanga enjili a Klisto. ²⁰ Ka afhe ne, siki namo a ubilia enjili, alakini n'na oma ne baouba ina a Yeso, kanyongo keopasa ne fheke ka miigi a n'kpa ongboo. ²¹ Ane bene bayaandeki: " Muta buno baka na mbino nake bamoonaae, na ka buno bakaya mooki baubaae." ²² Kabene baya kpemi mala asii nebike mutanu. ²³ Alakini bene, ketoke ku nepate oma imochi ka mosomba ne, na neyetuo konda ka mwaka asii nebike mutanu. ²⁴ Neokonda nenoone saa ne nenyena ku fua ka tamba namo agaa ka Isipania, bomobedhee ka tamba namo fua, saa ne neofulai negee na benu ka saa aboa. ²⁵ Alakini neoga na Yelusalema, etomikia bakpa anja a Mokonga. ²⁶ Kanyongo atu anja mutaa bakpa a Makedonia na Akaya bandondanise n'kumba mutaa ba masikini subia bakpa anja a Mokonga bune baiki na Yelusalema. ²⁷ EYa, ayatu ekondi nab'o, na bayagii u mutaab'o. Kanyongo kabe bakpa a mokonda baya gabi kema nabo a loo, bayagii u mutaa Bayaudi etomikia na n'kumba nab'o. ²⁸ Kabene, saa ne ngobha ku mokambo ne na uba anja gea bapati n'kumba buli n'ne baya dondanisi, negaa na Isipania na eona ka afhe. ²⁹ Neubi gea saa ne nebiki mutanu nebikaae na netumi na kalamo a Klisto. ³⁰ Neno dhengemisi, badani, ka Bosomwa nasu Yeso Klisto, na ka ekondi a Loo, gea jigani na eme ka mema nanu mutaa Mokonga kanyongo'ani. ³¹ Memani kagea ne lame mutaa buno baka na esima subia Yudea, na gea mokambo namo ka Yelusalema aokekane mutaa bakpa anja a Mokonga. ³² Memani kagea nebike mutanu ka fulaa kanyenea ekondi a Mokonga, na gea nedondane na benu, neumbie. ³³ Mokonga a bonja ab'e na benu bobu. Amina.