1 Kanyongo bakpa asii babisi nja'abo ka bongisa mbino a nyongo ne ayaonekani mutaasu. 2 Beno baya sofhi kpanga kala basuuda a iso na bakpa a mokambo a Yonga. 3 Neoni anja kanyongo neyebii nyongo a dhoni buli kpanga mosa, kaandekea'ko boke boke mokichwa Teofile. 4 Kanyongo bepate uba dhoni a yonga ne otofundisi. 5 Ka matu a Herode, mwame a Yudea n,mbe ayatu na koani nake mochi ina'ake Zakaria, a okombo a Abiya. Nkake aya toki mutaa n'seka a Aruni, ina'ake Elizabeti. 6 Bobu babee bayatu bakpa'a dhoni mosa'a Mokonga bayatambi kanga lambe ka amuli buli na Yonga a Bosomwa. 7 Alakini bayatu kanga michi, kanyongo Elizabe atu mono ngomba, na bobu babee baya fhomi ka wakati no. 8 Saa ne Zakaria aya mami mosa a Mokonga, ao laba nyongo a bakoani subia kitabo nake. 9 Sawa na desituli nabo a n'somboa koani sina aenei a toboe ngale, baon'sombua kisa maka sembe kanyongoo angie subia ekalo a Bosomwa. 10 Bakpa buli baya jigi ka n'senge saa a toboa ngale. 11 Malaika a Bosomwa ao seneka ka njaga a muuku a mazabao a toboa ngale. 12 Zakaria ao yayama saa ne aya mooni malaika, ao gea a tee. 13 Alakini malaika ao gea, " Kotee mbe Zakaria, kanyongo mema nako aokekani. N'kako Elizabeti ako bokoteae michi. Inaake abae Yoani. 14 Obae na fulaa na teba, na bakpa asii bafulaiae ka bokotana nake. 15 Kanyongoo abae mokota mosa a iso a Bosomwa. Koteke ku anoe makana akpe, atumaae na Loo Motakatifo subia sofho a amake. 16 Na bakpa asii a Isilaeli bagaekanaae mutaa Bosomwa Mokonga nab'o. 17 Agaae mosa a Bosomwa subia Loo na bokpekpe a Elia, ageaku bene kanyongo a sikisa meema a baabe mutaa banichi, kabe baka bii u bagaae ka bokichwa a bakpa a dhoni. Ageae bene ka bisa tayali mutaa Bosomwa nasu n'mbe bayan'bongisi kanyongo nake." 18 Zakaria aon'ngodea malaika, "Neubaae namuna sina, kanyogoo eme na n'kani beye fhomi, ana mwaka asii amapita. 19 Malaika aon'ngodea aogea, Eme'ambe Gabuliele n'mbe ao mama mosa a Mokonga. Bato moteki neko ngodee mbino ne anja. 20 Lenga fho, obaae kaluma, oyongaae goto saa ne nyongo ne akidiana ku. Kanyongo koto belekiake yonga namo n'ne aonekanaae ka saa anja. 21 Saa ne bakpa bayatuo n'bondea Zakaria, bao yayama kanyongo aya lifhii saa asii subia ekalo. 22 Alakini saa ne aya toki subia ekalo, kaya labiake na bakpa. Bao uba geae ayaoni kema subia ekalo. Ao dakana aoyonga na njaga. 23 Saa ne esa nake a fundisa ayasi, aoga mutake. 24 Kisa matu ne, n'kake Elizabeti aokumba leme ao someana songe itano aogea, 25 " N'ne aange Mosomwa aya gii mutamo saa ne aya moenjei na ngomi kanyongo amofholee soni mosa a bakpa. 26 Ka songe a sita a leme a Elizabeti, Mokonga aon'ngodea Gabuliele gaa na nji a Galilaya n'ne baofhani Nazaleti. 27 Mutaa n'seka mochi n'mbe moko mochi inaake Yosefu aon'songa, n'mbe atoki ka okombo a Daudi, ina a n'seka no Malia. 28 Aobika mutake ao n'ngodea " Kalamo, opati ngoola angbo. Bosomwa a fulai na ob'e. 29 Alakini kaya oki ake yonga a malaika anja kayongo sina malaika aya yongi kalamo angbo mutake. 30 Malaika aongodea, " Kotee mbe mono Malia kanyongo opati ngoola mutaa Mokonga. 31 Lenga fho, okumbaae leme subia sofho nako, on'bokotaae michi moko inaake abae Yeso. 32 Abae Mokota ba moofhhanae Muna n'mbo aiki kegoo asii. Bosomwa mokonga amofhaae mbata a bwame a abake Daudi. 33 Abaae mwame ka okombo a Yakobo esa bui na bwame nake kasie ku. 34 Malia aongodea malaika," Namuna sina kema ne onyenaae kanyongoo kemuubi mbe moko ata mochi?" 35 Malaika aon'ngodea ao gea, " Loo Motakatifo akobumbiaae na bokuu a N'mbo a kegoo asii akobumbiaae. Na motakatifo no abokotanaae bamoofhanaae Muna Mokonga. 36 Lenga fho, mana'mako Elizabeti ana leme a songe sita kpanga bene aya kumbi leme, batuo moofana ngomba. 37 Kanyongo kema buli ao wezekana mutaa Mokonga. 38 Malia aogea," Lenga nene n'ke a mokambo a Bosomwa. deketa anyene mutamo sawa na mbino nako." Malaika aon'deketa. 39 Malia ao mama kesa no aoga mbango kanji a mamba ka mosomba a Yudea. 40 Aoga kenju a Zakaria aon'sesea Elizabeti. 41 Saa ne Elizabeti aya oki samba a Malia, michi ao yala subia sofho nake, Elizabeti ao tuma na Loo Motakatifo. 42 Ao koga na eso angbo aogea, " Kalamo mutako subia bake, mbuka a ka sofho nako abe na kalamo. 43 Kanyongo sina amake na Bosomwa namo abiki mutam'o? 44 Lenga fho, kanyongo saa ne neto oki samba nako michi ao yala subiia sofho namo na fulaa. 45 Abe na kalamo n'ke no abelekei n'nde ao pasa oneka a kema no bayangodei toka mutaa Bosomwa. 46 Malia aogea, nafusi namo an'dokomisi Bosomwa. 48 Kanyongo alengi hali a edidisa a n'ke a mokambo nake . Kanyongo, kpanga keekee ne bamoofhanae n'ke a kalamo ka okombo buli. 49 Konnyongo n'mbo Atoki buli ayagii keme angbo mutam'o na inaake Motakatifo. 50 Ngoola ajige ka ebokoti na ebokoti mutaa buno baon'tea. 51 Aonisi bokpekpe ka njaga nake, aefanyi buno baya ebebi sisabo ka mawazo a meema nabo. 52 Aedidisi kaod'o banichi'a baame toka ka mbata nabo a bwame ao emamisa kegoo a buno bana hali a kusi. 53 Aya ekutisi buno bana n'nja na kema anja, alakini ao ebeaga bakpa a imona njaga jaai. 54 Aon'bedea Isilaeli n'ka'a mokambo nake, aon'kumbuka na kuia'ake ngomi 55 ( Beno ayagii mutaa ba abasu) mutaa Abulahamu na okombo nake esa bui." 56 Malia ao ika na Elizabeti songe isalo kisa aoja mutake. 57 Saa a bokota a Elizabeti aya enei, aon'bokota michi moko. 58 Ba muna'amake na badake baya oki bene Bosomwa aonisi ngomi nake angbo mutaake, bao fulaia naye oma kimochi. 59 Esa a monane baon'bika na michi kanyongo ban'guse kanja. Baya kondi mishi no aboe ina a abake "Zakaria," abea ina a abake. 60 Alakini amake aoyonga aogea, " N'naake. Bamoofhanaae Yoani." 61 Bon'ngodea, "Tafho n'kpa mochi subia ba muna'amako n'mbe bao moofhana kina ne." 62 Baomuisia abake ka alama kanyongoo baube ina sina bamofh'e michi. 63 Abake ao mema kibao aandeke kao kisa ao andeka, "Inaake ane Yoani." Bobu baoyayama ka kema ne. 64 Mala imochi ebombo na edaka nake ao ukukana. Aoyonga na n'beba Mokonga. 65 Bakpa bubuli bune baya ikiki bibiabo na sokanaga. Kema ne buli ao fhanjekana ka nji bui a Yudea. 66 Buno babu baya oki kema no baobisa u subia meema nabo, bogea, " Mini ne abae namuna sina?" Kanyongoo njaga a Bosomwa aiki naye. 67 Abake Zakaria ao tuma na Loo Motakatifo, ao fholea unabii, aogea, 68 " Obebo mutaa Bosomwa, Mokonga a Isilaeli, kanyongo abiki ka saidia na onisa ukombosi a bakpa nake. 69 Aya mamisi ndeka a lama kanyongo nasu kenju a n'kpa'a mokambo na Daudi 70 (bene aya toki ka ebombo a banabi nake batakatifo kpanga kala), 71 lama kanjaga a baadui nasu na kanjaga a buno bakaoso konda. 72 Ageae bene ka onisa ngomi mutaa baabasu na kumbuka agano nake motakatifo, 73 Bobake ne aya lapi mutaa abasu Abulahamu. 74 Aya lapi geae baopasa n'tumikia kanga tea, kiisa lama ka njaga a baadui nasu 75 Ka botakatifo nake na dhoni mosa'ake esa nasu bui. 76 Eya, na ob'e, michi, bakoofhanaae nabi a n'mbo aiki kegoo asii, kanyongo ogaae mosa a endondo a Bosomwa ka tayalisa afhe, na tayalisa bakpa ka bika nake, 77 Ebofha bakpa ubafha a lama mutaa bakpa nake ka osamee a jambi nab'o. 78 N'nde a nyenaae kanyongo a ngomi anja a Mokonga nasu, kanyongo a n'mbo mani ajuanaae kegoo abikaae koso bedea, 79 ka onisa buno baiki subia kadifhio na subia maenge a kukua. Ageae bene ka ongoza echinji nasu ka afhe a kalamo." Michi aomota ao kpekpemana ka loo, ao gija ka ndula mopaka bene aya onekani mutaa Usilaeli ka n'tanga.