¹ Mbusa a kema ne Yeso ao eonisa sisake goto mutaa banafuji ka oba a Tibelia. Bene ane namuna ne aya eonisi sisake: ² Simoni Petele ayatu kimochi na Tomasi bamoofhani Didimo, Natanaeli n'kpa a Kana subia Galilaya, bana Zebedeyo, na banafunji angboo ibee a Yeso. ³ Simoni Petele aoengodea, " Negee ka ofhaga." Baon'ngodea, " Na besu, begaae na ob'e." Baotoka na gaa ka ketange, alakini bakaya ofhi'ake kema kiifha buli. ⁴ Saa ne ayatu kan'bimba, Yeso ao mama ka motili, alakini banafunji bakaya ubi'ake gea ayatu Yeso. ⁵ Yeso aoengodea, " Baganda, bona kema a lea?" Baon'jibua, " N'na'ake." ⁶ Aoengodea, makani edo nanu njga a muuku a ketange, bapataae kuo." Baomaka edo nabo bakaya toki'ake bhoota u kanyongo basu bayatu asii. ⁷ Mwanafunji no ayan'kondi Yeso aon'ngodea Petele, " Ane Bosomwa." Saa ne Petele aya oki gea ayatu Bosomwa, ao boma gbutuka a ngombe (kanyongoo ayatu ndumbu), na emaka ka ob'a. ⁸ Banafunji angboo baobika subia ketange (kanyongo bakatu'ake danga na motili, bibia echinji mia ibee), bayatuo bota edo atumim na basu. ⁹ Saa ne bayagee kubi, bao ona eka a in'sa fua bao sumba bisoko kao, na n'bako. ¹⁰ Yeso aoengodea, " Bikani na bisoko aboa n'ne boto ofhi." ¹¹ Simoni Petele aoga na bota edo kubi, atumi na basu, basu 153 angbo kabo, alakini ataa bene bayatu asii edo kaya teneki'ake. ¹² Yeso aoengodea, " Bikani bolee elea." Tafho mwanafunji ne aya kengi uisia'ake, " Obe ani?" Baya ubi gea ayatu Bosomwa. ¹³ Yeso aobika, ao bedha n'bako, ao ebofha u, na bisoko. ¹⁴ N'ne ayatu saa a isalo n'ne Yeso aya eonisi sisake mutaa banafunji mbusa a fufuka toka mutaa baku. ¹⁵ Mbusa a lea elea, Yeso aon'ngodea Simoni Petele, " Simoni muna Yona, omokondi eme kon'nyena bune?" Petele aon'ngodea, " Eya Bosomwa, oubi gea neko kondi." Yeso aon'ngodea, " Elisa ba mogogo namo. ¹⁶ Aon'ngodea mala a pili, " Simoni muna Yona, omo kondi?" Petele aon'ngodea, Eya Bosomwa, oubi gea nekokondi." Yeso aon'ngodea elisa ba mogogo namo." ¹⁷ Aon'ngodea mala a isalo, " Simoni muna Yona, omo kondi?" Petele ao bela kanyongo Yeso ayan'ngodei mala isalo, " Omo kondi?" Aon'ngodea, " Bosomwa, oubi kema buli, oubi neko kondi." Yeso aon'ngodea, " Elisa ba mogogo namo. ¹⁸ Ka dhoni, ka dhoni, nekongodei, saa ne otu mono moganda, oto mono kolola n'tongo sisako na tamba oma ne otu mono'okonda, alakini alakini saa ne ofhomi osakuaae njaga nako n'kpa ongboo ako lolisaa n'tongo na kumba'ako oma ne kotuo konda ogee." ¹⁹ Yeso aya gii bene ka gea aonise okona a kukua sina Petele atuopaasa aon'dhokomise Mokonga. Mbusa ayonga bene, aon'ngodea Petele, bika mbusa'ani." ²⁰ Petele aotimba na n'lenga mwanafunji no Yeso ayatuon'konda abiki mbusa'abo, n'mbo ayatuo dhaa bibi'a Yeso oma a elea na n'mbo aya gii, : Bosomwa, " ani n'mbo akosombisa ku?" ²¹ Petele ao moona aon'ngodea Yeso, " Bosomwa, kema sina n'kpa ne agea ku?" ²² Yeso aon'ngodea, " Kabe nekondi ajige mopaka bene nebika ku, kema sina ane mutako? Bika mbusa'ani" ²³ Bolabi ne aofhanjekana mutaa banafunji, gea mwanafunji no kakue ku. Yeso kayan'ngodeake Petele gea mwanafunji no kakue ku, alaki, " Kabe nekondi ajige mopaka nebike, akogii eke?" ²⁴ N'ne aange mwanafunji no aya bisi osuudha gua kema ne, na n'mbo aya andeki kema ne, na beubi gea osuudha ne ane dhoni. ²⁵ Yeso ayagii kema asii angboo. Kabe baya andeki kila mochi, neubate gea ata mokonda kaya pasi'ake abise buuku ne baya pasi andeka.