¹ Nyowe enkomwa muli Mukama, ndikusaba mwikale ngoko kiheniimwe kwe mwayetirwe na Ruhanga. ² Mu tuure mu mwibitonzi n'obugumisirizi. Mulikugumisirizana mu mukwano. ³ Mugir'obwete mu kubonereza obumweza bw'Omutima mu kikibo ky'obwikiriza. ⁴ Halih'omubiri gumu n'Omutima gumu, ngoko namwe mwabaga mwayetirwe mu buhamirizi bw'obwisige bumweza bw'okwetwa kwenyu. ⁵ Kandi hanalih'Omukama omweza, obwemezi bumwe, orubatizo rumwe, ⁶ na Ruhang' omweza, ise wa boona. Iitwe ali h'igulu ya vyoona, na muli vyoona na muna ya vyoona. ⁷ Habwokuba bul'omweza wetu yaherwe obubasa kukuratana n'orulengo ly'obubas bwa Kristu. ⁸ Ningokw'ebihandiiko kigambire:'' yatebwe h'igulu, yayebember'enkomwa mu bulheetwa. Yatanga ebichonsho mu bantu''. ⁹ ''Yatebe h'igulu '' kirikumenyesa-ki? kutarikugira ngo yasumire kandi mu mbazu hanhansi mw'ihanga? ¹⁰ Iiwe ayasumire niniwe muntu ayatungamire hale h'igulu y'Igulu lyoona. Yakolire kuti kugira okubaho-kwe kube mu biintu vyoona. ¹¹ Kristu yatangire ebichonsho nk'ebi: abakwenda, abaraguzi, abahanuuzi, abasuumba, n'abegeesa. ¹² Yakolire kuti kubabasisa abikiriza habw'emilimo y'obuyambi, habw'okuhiimba omubiri gwa Kristu. ¹³ Yakolechi kugira iitwe twena kuhike ha bwiire bw'obumweza bw'obwikiriza n'obwenge bw'omwana wa Ruhanga. Yakolechi kuhikya ahoturabasiza kukura nkabo bamalire kuhika mu kyegeera kya Kristu. ¹⁴ Echi n'okugira ngo tutasuba kuba nk'abaana, tuta guruchwa-guruchwa oku n'akuli. Kugira ngo tutatwarwa na buli mulingo gw'omuyaga gw'enyegeso, mu bwiira bwa bantu mu budyadya bw'obubehi obwrekirwe. ¹⁵ Mumwanya gw'echo, turaganira mu mazima mumukwano n'okuba mu mihanda yona mul-iiwe aliwe omutwe, Kristu.. ¹⁶ Kristu yabuganisize, kutahamwe , omubiri gwena gw'abikiriza. gwa kwatanisizwe hamwe na buli ngingo kugira omubiri gwena gubeho kandi gwihimbe gwenka mu mukwano. ¹⁷ Habwekyo nagamb'echi, nabasaba muli mukama: mutasuba kwikwaata nk'abantu ba mahaanga ngoko bagendaga mu bushe bw'obwenge bwabo. ¹⁸ Baterw'omwirima mu bitekateko byabo. Babingirwe mu kruga mu buhangaazi bwa Ruhanga habw'obusema bubalimu habw'okugumya emitima yabo. ¹⁹ Tafafag'esoni. Bahiyere ibobenka mu buligira mu bikorwa bibi, mu mulingo gwena gw'obusuma. ²⁰ Alikwe, kuti talikwe mwayegire muli Kristu. ²¹ Ndagira ngo mwahulira ebimukwatireho. Ndagira ngo mwabaga mulikwegesibwa muli-we, nk'amazima agali muli Yesu kusa. ²² Mhenibwe kwizwarura byona ebikwatene n'emigendere yenyu ya kale, obuntu bya kale. N'obuntu bwa kale obuzundire habw'obuligira bw'amabehi. ²³ Muzwarure obuntu bwenyu bwa kale kugira ngo mukorwe bashasha mu mutima gw'obwenge bwenyu. ²⁴ Mukorage kuti kugira mubase kuzwar'obuntu bushasha, obulikugenderana na Ruhanga. Bwahangirwe mu mazima n'obwikiriire bw'amazima. ²⁵ Habwekyo, biika hale obubehi. '' muganiirage mu mazima, buly'omweza na mutahi-we'', habwokuba turabahindani buly'omweza hali mugenzi-we. ²⁶ Mutunture alikwe mutakor'ekibi,'' Izoba litalhenga mukyatundwiire. ²⁷ Mutaha Ibilisi omwanya. ²⁸ Buly'omwe ayibaga, atasuba kwiiba. Mumwanya gw'okwiiba, ahenibwe akole omulimo. Akole omulimo gw'omughaso mu mikono-ye, kugira abase kuyamba omuntu alikwitenga obuyambi. ²⁹ Igambo libi litaruga mu kanwa kenyu. Huubwe, mu kannwa kenyu harugemu amagambo g'okughasira abalikwitenga, kuh'amagoba abalikuhulikiza. ³⁰ Kandi mutatuntuz'omutima mwikiriire gwa Ruhanga. Habwe niho mwabikiirwe ekimenyeso k'ekiro ky'oburokozi. ³¹ Muheniibwe kubika hale obusasi bwena, iitima, ekinigha, oburwani n'amazimwe hamwe na buli mulingo gwena gw'ekibi. Mube abantu barungi iimwe ha liimwe. ³² Mugiriran'embabazi. Musasirane imwe ha liimwe, ngoko Ruhanga muli Kristu yabasasire iimwe.