¹ Ku we, tenda bitondo bya lingimana na meghesha masogha. ² Tenda buno bakungu ba balume babaghe batughu,babe ba bulili,bashima bibite, basanana mu lukatisho, mu lutundo, nu kulindila bwingi. ³ Tenda na bakungu ba bakashi,baloleke ko na myanya nsogha sa lingimana na kusanana,babaghe bakushinga bantu bitondo; ali bashima maku; bemana kweghesha bisogha, ⁴ buno begheshe bakashi baghunsa bashime banachabo nu bana babo, ⁵ bendaghe lubilolubilo na bitondo,balange mibili sabo,bakiti ba milimo mu mashumba mabo, basogha,bakongwilila banachabo, kubuno kitondo cha Ghongo kinashwa kweneghwa. ⁶ Ana nu basikila bashime bibite, ⁷ mu kwindosha uw'inene kunsayi kalolesho ka myanya nsogha, nu mu kwesana meghesha ma bulili ,matunganana, ⁸ kitondo kisogha kitanakulwa,kubuno mughini akwe nsoni,inde bya kututekula. ⁹ Ana bakiti bimbotye kweli bakota babo,mu kubaboghyaboghya mu binsayi,babaghe ba kukalaghula, ¹⁰ bimbaghe kena, tondo baloshe bindi binsayi myanya nsogha, kubuno meghesha ma Ghongo monia witu matatwe. ¹¹ Kubuno Mpang'inene sa Ghongo,u ndingililo sa lonio kweli bantu bansayi samonekile ko. ¹² Satweghesha kushigha mabi nu nkasa mbi sa kisi ,nu kwikala mu bino bindi na bwenge ,bulili nu busanana, ¹³ mu kulindila malelamilo masogha, nu kumoneka ko lukumbu lunene lwa Ghongo nu Monia witu Yesu Kilishitu, ¹⁴ wiyesanile winene kubushi bwitu buno atutuche mu bubi bunsayi, nu kwikitila kilongo chaghe,chengishibwa nawe nu cha saghalukila milimo nsogha. ¹⁵ Tenda ibyo bitondo,ana , nu kalaghula ghamoyi na bukulu bunsayi. Muntu ntakubengaghe.