¹ Polo, mukiti wa Ghongo, nu ntumwa sa Yesu Kilishitu, mu lukatisho lwa basombolilwe na Ghongo, nu kumanilila bulili bweli anga bwasanana, ² bibyo byakatililwa mu malelamilo ma kalamo ka milyalya, kalaghilwe tukila bindi bya kalayi na Ghongo utakweka bwisa, ³ nu walimbulile kitondo chaghe mu bindi byacho, kutingila meghesha maneleshibwagha kuyangana na lukakisho lwa Ghongo monya witu, ⁴ Kweli Tito, mwana wani wa bulili mu lukatisho lumoyi ;weleshibwe mpang'inene nu boolo bikutuka kwa Ghongo Tata nu kweli Yesu Kilishitu Monia witu! ⁵ Na kushighagha ku Kelete, kubuno ulongomanye bya byashighala kukitwa, nu buno,kuyangana na meghesha mani, wimike bakungu mu musumba umoyi umoyi. ⁶ Ndi munasangwa mulume umoyi utana sungulwa ,mulume wa mukashi umoyi umpanga, wite bana bakatisha nu batana tekulwa mu malimbya ali mu batashima kwanwa. ⁷ Buno bwatunganana Pashitele abe muntu utanasungulwa, anga mulangi wa bya Ghongo; abaghe muntu wa kwitumbya, ali wa mishibu,ali washima maku, ali wa kalama, mutughu wa bikulo bya nsila mbi; ⁸ tondo abe wa kusekela bagheni, mwinda wa bakiti ba mponga,waswaghilwa na bite, wa bulili, wasanana,ukukita binsai na bwenge, ⁹ wikatilisha mu kitondo cha bulili anga bu chegheshibwagha, buno akoshe kwana kuyangana na meghisha ma bulili,nu kukobya bisa myango. ¹⁰ Bulili,kweli, tanga bamoyi ku bamonile,bantu bengi batashima kwanwa,bantu bakutenda bingibingi bya bulya nu bakwabucha bango, ¹¹ bemana kubakobya . Bakubulughanya bilongo,mu kweghesha,bushi bwa bikulo bya nsoni,bibyo bitanegheshibwa. ¹² Umoyi kubo, mulenganya wabo atendagha : Bantu ba ku Keleti beli beki ba ba bwisa, nama si kusugha,bashima indya,nu batambi. ¹³ Icho kitondo cheli cha bulili. Ku bo basughile bubibu,buno babe na lukatisho lwa bulili, ¹⁴ nu binkatilishaghe ku ngano sa Bayuda, nu ku nkakisho sa bantu bakushigha bulili. ¹⁵ Kinsayi cheli kisogha ku babo basanana; tondo taku kisogha,ku bantu babi nu batakatisha , kubuno mulenganya nu makengelo mabo mabigha. ¹⁶ Bakutenda buno bakumana Ghongo, tondo bakumunana kutingila bi bakukita,bakiti ba mabala,batashima kwana,nu batanakita kisogha.