¹ Polo, mukiti wa Yesu Kilishitu wamanwagha abe ntumwa, wasombolwagha asanse musaghu musogha wa Ghongo, ² walaghwagha kalayi na Ghongo kutingila balenganya baghe mu kitondo cha Ghongo, ³ chatenda ku Mwana waghe (wabutilwe mwa kibuti cha Daudi, mu mubili, ⁴ nu kumanwa Mwana wa Ghongo ku bwangato kuyangana na Muusa wa sanana,kutingila kutuka ku bakui kwaghe), Yesu Kilishitu Mukota witu, ⁵ ku 'we tweleshishwe mpang'inene nu butumangwa,buno twikile mwa mw'ishina lyaghe, mu kwimila busogha lukatisho lwa bilongo bansai, ⁶ nu kubyo benywe nubo mwamanilwe na Yesu Kilishitu-- ⁷ nu ku bansayi ku Loma,beli nshimwa sa Ghongo, bamanilwe babe basanana ; Mpang'inene nu boolo mweleshibwe byo na Ghongo Tata nu Mukota Yesu Kilishitu ! ⁸ Nakasanila tanga Ghongo wani kutingila Yesu Kilishitu ku benywe bansayi, kubuno lukatisho lwinu lwamanwa mu kisi kinsayi. ⁹ Ghongo, u nkukolela mu mutima wani mu musaghu musogha wa Mwana waghe,bya ntenenekela buno nshikwinda ku bakengela, ¹⁰ nkusegha mu masegho mani ma bindi binsayi, buno mu kushima kwaghe , nibe na mboghimboghi sa kwenda kwinu. ¹¹ kubuno,nkushima nibalole ko ,buno nibasambalile lukaso lwa sanana lwa Ghongo,buno mukokomeshe mu lukatisho, ¹² Ali tweleshibwe maghala,kutingila lukatisho lutwasangila ,benywe nw'ine. ¹³ Nshikushima mwinde kumana ,bisakwitu , buno nkubagha na mulenganya wa kwika kwinu.Buno nimone bisogha ku mweli,anga ku bingo bilongo; tondo nangilwa kwikila lelo. ¹⁴ Nite nkashi ku Bagiliki nu ku Bantu ba miyabuyabu, ku bantu ba milenganya ningi,nu ku batakulenganya. ¹⁵ Ubo nite nkasa inene sa kubasansila musaghu musogha, ku benywe beli ku Loma. ¹⁶ Kubuno nshikukwila musaghu musogha nsoni; bweli bwangato bwa Ghongo ku kalamo k'olya wakatisha,ku Bayuda tanga, nu ku Bagiliki nubo. ¹⁷ Kubuno muwe u mwalimbulindwe kw'isanana kwa Ghongo kutingila lukatisho nu nkatisho, anga bu bwatililwe: Wasanana akimala mu lukatisho. ¹⁸ Mishibu sa Ghongo sa limbulwa kw'ighulu ku bwaghi nu kubitasanana bya bantu,bakubisa bulili, ¹⁹ kubuno bi tunamana ku Ghongo ,byalimbulwa bwasi kubo, Ghongo mu kubalosha byo. ²⁰ Ubo bintu bisogha bya Ghongo bitekumoneka ko , nu bwangato bya milyalya nu bu Ghongo bwaghe,bikumoneka ko kulingila kubumbwa kwa kisi,mu kulola ku binsai byakitile. Ta binendela myango, ²¹ mu kumana Ghongo,tabamutatile anga Ghongo,nu tabamukasaninde;tondo bashiminde mu milenganya sabo,nu mutima wabo utekulenganya winginde mu bulimaswa. ²² Kwitata buno beli balenganya, baghalukile bashile; ²³ Nu baghalukishe lukumbu lwa Ghongo utakakwa , mu bilimelime bya muntu u kakwa,tusoni,mu nama sa maghulu manai,nu mu nama sakwendela ku nda. ²⁴ Uchasulile Ghongo abashighilinde mu bwaghi ,kulembana na nkasa sa mitima sabo;nu ba benga bo binene mibili sabo. ²⁵ Bo,baghalulile bulili bwa Ghongo kuba bwisa, nu bakumbaminde nu kukitila milimo kintu kughimba Ghongo,wa kasanilwa mu milyalya .Amina! ²⁶ Uchasulagha Ghongo abashighilinde mu nkasa sa bibi;kubuno bakashi babo bashighile bu bakuyamagha na balume nu kughalula butanakitwa mukashi. ²⁷ Nu balume babo nubo bashighile nsila sa bakashi, bingilinde kulimbyana balume binene kubo binene. Babo bakitile ubo, beleshibwe indigho lya bulasalasa bwabo. ²⁸ Tabite mulenganya wa kumana Ghongo, Ghongo abashighilinde mu nsila sabo sa bushimishi, buno bakite bitondo bitaswagha . ²⁹ Bisalana na mabi mansayi,kukalama,butughu, bwenge bubi, kushima bya bene, bwiti, nsaki, bwengelelo, ³⁰ kusomba, batulanya,bakutenda bubi,bakunana Ghongo,bisa nsaki, bakwindola,bisa kw'itata,bashingi ba bitondo,bisa kanywa, bisa kwitumbya, mighansanga, bakiti ba mabi, baghini ku babuti babo, ³¹ batite milenganya,ba kughalukaghaluka,banani ba bilongo,tabite lukogho. ³² Nu banaba bakumana lughayo lwa Ghongo, bakukita ibyo bemana kukwa,ta buno bakubikita umpanga,tondo beli na lwango lumoyi na babo bakubikita.