¹ Mughenshi wa batano ipilagha tolompeta .Nu namonagha kambalumbalu kamoyi katuka kw'ighulu nu kukolokela mu kisi.Eleshibwa batoto ba mushinga munene, ² nu ighulagha mushinga .Nu mu mushinga mwatukagha muuki,anga muki wa muthula munene;nu musi nu chengeshi binagha na muuki wa mutulha. ³ Mu muuki mwatukagha mande misashagha kisi;nu beleshibwagha bwangato,anga bwangato bwite nkutu mu kisi. ⁴ Babulwagha buno bakitaghe bubi ku kisughu cheli mu kisi,ali ku nsamba,ali ku miti,tondo ku bantu betite kamanililo ka Ghongo ku malanga . ⁵ Babulwagha ,ta babitaghe,tondo babanubye myeshi etano; nu mbabasho sibabe naso sibaghe anga lubabasho lwa nkutu ndi satwa muntu. ⁶ Mwebyo bindi bantu bakalonda lukwo, nu tabakeleshibwa lo; bakalonda kukwa,nu lukwo lukabatina. ⁷ Amo mande masusagha mpunda sa bikilwa kulwana;Ku matwe maso kwabagha nkumbu sa susana nolo,nu malanga mabo mabagha anga malanga ma bantu. ⁸ Babagha na nshuli anga sa bakashi,nu mino mabo mabagha anga ma mbunga. ⁹ Babagha na ngabo sa ku bukuba seli anga chuma,nu lwayo lwa byubi byabo anga lyayo lwa mpunda ningi sikwenda ku bita. ¹⁰ Babagha na mikila sasusana nkutu nu sa nshinge,nu mu mikila sabo u mwabagha bwangato ma kukitila bantu bubi myeshi etano. ¹¹ Babagha na mwami wabo mughenshi wa mushinga,ukumanwa mu kiebulania Abandoni nu mu kigiliki Apolioni. ¹² Musambo mutangi watingile.Lola,kumbusa kwa gho,kwashwa misambo imbili . ¹³ Mughenshi wa mutuba ipilagha tolompeta.Nu nongwagha ishuki lyatuka ku ndenge inayi sa kasasa ka nolo keli ku miso ma Ghongo, ¹⁴ nu kubula mughenshi wa mutuba wabagha na tolompeta:Shighilila baghenshi banayi bakandilwe ku lusi lunene lwa Furati. ¹⁵ Nu baghenshi banayi babinde balongomana busogha mu nkungu,busi,mweshi,nu mwaka,bakandulwagha buno bite umoyi ku bisatu ba bantu. ¹⁶ Mughanso wa ndwani sa beli ghantata na mpunda wabagha tutanda tubili tutanaghanshwa;nongwagha mughanso. ¹⁷ Nu namonagha mpunda mu ndoshi,nu babo beli ghantata naso,bite ngabo sasusa kaya, anga ikoyi lya mukusa nu buusa.Matwe ma mpunda mabagha anga matwe ma mbunga;nu mu kanywa kabo mwatukagha kaya,muuki ,nu buusa. ¹⁸ Omoyi ku basatu ba bantu iitwagha lulame neso biswabo bisatu,na kaya,na muuki nu na buusa,bya tukagha mu kanywa kabo. ¹⁹ Kubuno maghala ma mpunda mabagha mu kanywa kabo nu mu mikila sabo;mikila sabo sasusanagha malighi mite matwe,nu ghamoyi namo ubakitagha bubi. ²⁰ Babo bantu bitwagha nw'ibyo biswabo,tabisungulagha ku mikolo sa maboko mabo,mu kwinda kushigha kwela basumbu,kwela byeko bya nolo,bya bikulo, nu bya nsubi,b'ikoi nu bya miti , bitana kosha kulola,ali kwongwa nu kwenda; ²¹ nu tabisungule mu bwiti bwabo ,ali mu bughanga bwabo,ali mu malimbya mabo ali bwimbi bwabo.