¹ Namonagha,nu lola,Chana cha mbuli kikalile gha ntata na mwindiko wa Siona,nu ghamoyi nacho bantu ighana makumi manayi na banayi elefu , babagha n'ishina lyaghe nu'ishina l'ise lya tilwa ku malanga mabo. ² Nu nongwagha ishuki mw'ighulu,anga ku kubila masi mangi ,anga ishuki lya mukulumilo munene;nu ishuki linongwagha ko lyabagha anga lya baghombi ba kansambi bekughomba tunsambi twabo. ³ Nu babagha bekwemba lungo lwembo bwighi na kishumbi cha bukota,nu mu miso ma mbibumbwa binayi bili gho nu ma bakungu.Nu taku muntu unakoshishe kwegheshibwa olo lwembo,ndi ta babo ighana nu makumi manayi nu manayi elefu,babo baghulwa mu kisi. ⁴ U babo batimbighye na bakashi,kubuno u babo betetenshagha;bekuyanga Chana cha mbuli kunsayi ku kikwenda.Baghulilwe mu nkatighi na bantu,anga nkulha kweli Ghongo nu kweli Chana cha mbuli; ⁵ nu mu kanywa kabo,tamukutuka bitondo bya bwisa ,kubuno tabana sungulwa. ⁶ Namonagha ungo mughenshi wabagha ukulenga mu mpena,witu Musaghu musogha , buno ausambalile beli mu kisi,ku bisi binsayi,bilongo binsayi,ku mitendeshi insayi,nu ku bantu bansayi. ⁷ Abagha akutenda n'ishuki linene:Mukwe Ghongo boba,nu mumweleshe lukumbu,kubuno nkungu sa kwaghya kwaghe sika; nu mukumbamile ghoso wabumbagha ighulu,nu kisi,nu kitatenge,nu kukutukilagha masi. ⁸ Nu ungo umoyi mughenshi wa babili ikagha nu kutenda :Aghwa,aghwa Babiloni munene,ukunywishagha bisi binsayi maku na bulimbya bwaghe! ⁹ Nu ungo ,mughenshi wa basatu abayangagha,mwa mukutenda n'ishuki linene:Ndi muntu akumbamila Nama nu chaso chaghe nu abikwa kama kama ku malanga maghe ali mu kuboko kwaghe, ¹⁰ akanywa nuwe,maku ma mushibu wa Ghongo,mindilwe mu kaata ka mishubu waghe nu tameswanywa ,nu akatubwatubwa mu kaya nu mu buusa ,mu miso ma baghenshi basanana nu mu ma Chana cha Mbuli. ¹¹ Nu muki wa kubatubyatubya kwabo ukubakama nkiko nu nkiko;nu taba kwomulwa busi nu kindi,babo bakukumbamila Nama nu chaso chaghe,nu whoso wabikwa kama k'ishina lyaghe. ¹² Ghano lino u gheli kulindila kubibu kwa basanana ,nu bakukatilila nkakisho sa Ghongo nu lukatisho lwa Yesu. ¹³ Nu nongwagha ishuki mw'ighulu likutenda:Tilha:Kulingila lelo bakasanilwa babo ,bakukwa mu Mukota! Naki,bwatenda Muusa ,buno bomulilwe milimo sabo,kubuno mikolo sabo sabayanga. ¹⁴ Namonagha,nu lola,kwabagha lubhu lwenga,nu mulo mwabagha mwikalile umoyi wasusana Mwana wa muntu,wite kw'itwe lyaghe nkumbu sa nolo ,nu mu maboko maghe indoko likutwa . ¹⁵ Nu ungo mughenshi atukagha mu numba sa kukumbamila,akumana n'ishuki linene ghoso wikalile mu lubhu: Kata indoko lyobe ,nu ukane:kubuno nkungu sa kukana sika,kubuno byashikwagha mu kisi bya kula. ¹⁶ Nu ghoso wabagha ikalile mu lubhu alekelagha indoko lyaghe mu kisi.Nu kisi cha kanwagha. ¹⁷ Nu ungo mughenshi atukagha mu numba sa kukumbamila seli mw'ighulu,abagha nuwe n'indoko likutwa bubibu . ¹⁸ Nu ungo mughenshi wabagha na bwangato ku kaya,atukagha mu kasasa nu abulagha n'ishuki linene ghoso wabagha n'indoko likutwa,mu kumubula:Tola indoko lyobe likutwa,nu kala bighuma bya misabibu sa kisi,kubuno bighuma byela. ¹⁹ Nu mughenshi alekelagha indoko lyaghe mu kisi.Nu akalagha bighuma bya musabibu wa kisi,nu abikagha byakalwagha munda na kigholo cha mushibu wa Ghongo. ²⁰ Nu kigholo cha nantwanantwagha bulayi na musumba;nu mikilha sa tukagha mu kigholo,kw'ikila ku bushundo bwa mpunda, nu ku kishiki cha elefu emoyi maghana mutuba ma masomolelo.