¹ Neleshibwagha kamilali kasusa lukati mu kumbula:Imaluka,nu lingika numba sa kukumbamila sa Ghongo,kasasa,mu babo bakukumbamila mo. ² Tondo u lingikaghe mulungu wa kumbugha wa numba sa kukumbamila, kubuno weleshibwe bilongo,nu bakanantananta musumba wa sanana myeshi makumi manayi nw'imbili. ³ Nkelesha bateneneki bani babili bwangato bwa kusansa bulenganya, bashwalile kuniya bindi elefu emoyi nu maghana mabili nu makumi mutuba . ⁴ U misabibu imbili nu byanikilo bibili simalile mu miso ma Mukota wa kisi. ⁵ Ndi muntu alonda kubakita bubi,nti kaya katuka mu kanywa kabo nu kughisha baghini babo;nu ndi muntu alonda kubakitila mabi,emana kukwa ubo. ⁶ Bite bwangato bwa kukanda ighulu buno mbula silokaghe mubindi bya kusansa bulenganya bwabo,nu bite bwangato bwa kughalula masi mabe mikilha,nu kusambya bantu ba kisi byulu,mu nkungu sibashima. ⁷ Gha bakashila buteneneki bwabo,Nama s'i kutuka mu mushinga sikalwana nabo, kubakinda,nu kubita. ⁸ Nu bilunda byabo bikabikwa mu mulungu wa musumba munene,u kumanwa mu muusa buno Sodoma nu Misili, agho u gha kwilagha Mukota wabo ku musalaba. ⁹ Bantu ba bisi,bilongo,ba mitendeshi,nu bantu ba kisi kinsayi;bakamona ku bilunda byabo bindi bisatu nu nusu,nu tabak'imila buno bilunda byabo bi kundwe . ¹⁰ Nu kubushi bwabo beli mu kisi ba kababoghabogha nu kuba mu chelele,nu bakeleshana nkaso kubuno babo balenganya babili bayungyayungyagha bantu beli mu kisi. ¹¹ Kumbusa kwa bindi bisatu nu nusu,muusa umoi wa kalamo kutukila kwa Ghongo,wabingilagha mo,nu bikalilagha ku manshinshi mabo ;nu boba bunene bwakatile babo baba lolagha ko. ¹² Nu bongwagha ishuki likutuka kw'ighulu likubabula;Mubakame kuno!Babakamagha mw'ighulu mu lubhu;nu baghini babo babalolagha ko. ¹³ Mweso nkungu,mwatingagha kalingini kanene,nu emoyi ku ikumi lya musumba lyendukagha ;bantu elefu mutubakamo bakwagha na ko kalingini,nu bango bakwagha boba nu beleshagha Ghongo wa mw'ighulu lukumbu. ¹⁴ Kiswabo k'imbili chatingile.Lola,kiswabo k'isatu takikwindisha kushwa. ¹⁵ Mughenshi wa mutubakamo ipilagha tolompeta .Nu mw'ighulu mwatukagha mashuki manene matendagha:Bukota bwa kisi bweleshibwa Mukota witu nu Kilishitu waghe;nu akema nkiko nu nkiko. ¹⁶ Nu bakungu makumi mabili na banai babagha bikalile mu bishumbi byabo mu miso ma Ghongo,bakomagha mashwe nu kukumbamila Ghongo, ¹⁷ mu kutenda:Twakuboghelaboghelo Mukota Ghongo Nene maghala mansayi,weli gho,nu wabagha,kubuno,watolile bwangato bobe bunene nu weema. ¹⁸ Bilongo byashibukile ;nu mushibu wobe wabinde ,nu bindi bya kwaghya bakuyi bikile,nu kuligha bakiti bobe balenganya ,ba sanana nu babo bakukwa bobha ishina lyobe,bana nu bakulu,nu kushililisha babo bekubighya kisi. ¹⁹ Nu numba sa kukumbamila Ghongo mw'ighulu sighulwagha ,nu sanduku s' indaghi salolekagha ko mu numba saghe sa kukumbamila.Nu kwabagha nkenunkenu, mashuki,mikulumilo,kalingini,nu lubula lunene.