¹ Bulimbulilo bwa Yesu Kilishitu,bweleshibwagha na Ghongo buno aloshe bakiti baghe bitondo byemana kwika,byaloshishe,kutingila kusingwa kwa mughenshi waghe ,kweli mukiti waghe Yoani, ² we u watenenekile kitondo cha Ghongo nu buteneneki bwa Yesu Kilishitu,binsayi byalolagha ko. ³ Akasanilwe ghoso wasoma nu babo bongwa bitondo bya bulenganya, nu balanga bitondo bya tilwa mo! Kubuno bindi byeli bwighi. ⁴ Yoani ku Tunisa mutubakamo tuli ku Asia; mweleshibwe mpang' inene nu boolo kutukila ghoso weli,wabagha,nu washa,nu kutukila myusa mutubakamo seli mu ntungo na kishumbi cha bukota bwaghe. ⁵ Nu kutuka kweli Yesu Kilishitu Muteteneki wa bulili,nkulya sa batukile ku bakuyi,nu Mwami wa bami ba kisi! Kweli ghoso watushima nu watutukishe mu bwaghi kutingila mikilha saghe, ⁶ nu watukitile bantu ba bukota, bisankogha ba Ghongo Ise,kweli kube lukumbu,nu bwangato, mu nkiko nu nkiko!Amina! ⁷ Lola ,ashwa ghamoyi na nubhu.Na liso linsayi likamumona ko,aba babo bamushumitagha;nu bilongo binsayi bya kisi bakinshushuma kubushi bwaghe.Naki.Amena! ⁸ Ine mutangi nu mushinda,bwatenda Mukota Ghongo,olya weli gho,wabagha nu ukushwa,Nene maghala. ⁹ Ine Yoani,mwisakwinu ,nu wite kibhu ghamoyi na benywe mu munubo nu mu bukota nu mu kulindila bubibu Yesu,nabagha mu kakishi ka kumanwa Patimo,kubushi bwa kitondo cha Ghongo nu buteneneki bwa Yesu. ¹⁰ Nakatwagha na Muusa busi bwa Mukota,nu nongwagha kumbusa kwani ishuki linene, anga ku kughombwa tolompeta ¹¹ watendagha:Bino biwamona ko ,bitile mu kitabo, nu singa byo ku Tunisa mutubakamo,ku Efeso,ku Silimuna,ku Pelegamu,ku Twatila,ku Saladi,ku Filadelefia,nu ku Laodekiya. ¹² Nakebatukile buno nimane ishuki ki likutenda n'ine.Nu ,kushila kukebatuka,namonagha ku byanikilo mutubakamo bya nolo, ¹³ nu munkatighi mwebyo byanikilo mutubakamo,umoyi wasusana Mwana wa muntu,washwalile lopo lulayi,nu ite mutunda wa nolo mu bukuba . ¹⁴ Itwe lyaghe nu nshuli byabagha byenga anga nshulu nsogha senga, anga bighuma bya lubula;miso maghe mabagha anga lwembe lwa kaya; ¹⁵ manshinshi maghe mabagha masusa anga nsubi sikutuka mu kaya, sikutuka mu mutulha wa kaya;nu ishuki lyaghe anga masi mengi ma chela ; ¹⁶ Abagha ite tumbalumbalu mutubakamo mu kuboko kwaghe kw'indume.Mu kanywa kaghe mwatukagha mwele ukutwa bubibu ,wa bibe bi bili;nu malanga maghe mabagha anga musi wasugha bubibu. ¹⁷ Mu kumumona ko,nawilagha ku manshinshi maghe anga wakwile. Ankatagha na kuboko kwaghe kw'indume mu kutenda :Ntukwaghe boba! ¹⁸ Ine mutangi nu mushinda ,nu neli gho .Nakwagha,nu lola neli gho nkiko nu nkiko.Nakatila batoto ba lukwo nu kishiki cha bakuyi. ¹⁹ Tila lino bitondo biwamona ko,nu byeli gho ,nu byemane kwika kumbusa kwabyo, ²⁰ kindo cha tumbalumbalu mutubakamo tuwamonagha ko mu kuboko kwani kw'indume,nu byanikilo mutubakamo bya nolo.Tumbalumbalu mutubakamu u tweli Baghenshi ba Tunisa mutubakamo,nu byanikilo mutubakamo u Tunisa mutubakamo.