¹ Indingilo lya Musaghu musogha wa Yesu -Kilishitu,Mwana wa Ghongo. ² Anga buwatililwe na mulenganya Isaya : Lola,nasinga ghabusho nowe mughenshi wani akalongomanya nsila sobe; ³ u mulenge wa muntu u kutandwa mu kalula : Mulongomanye nsila sa Mukota,mulingimanye byendeshi byaghe. ⁴ Yoani ashwagha, kupatisha mwa mu kalula, nu kusansa lupatisho lwa kwisungula mutima kwa kutucha myanya sa bwaghi. ⁵ Kisi kinsai cha Yudea nu bisa ku Yelusalema bendagha kweli ; nu, kutucha bwaghi bwabo, bendagha kupatishibwa nawe mu lusi lwa Yolodani. ⁶ Yoani ashwalagha nshulu sa myosa sa ngamia ,nu mutunda wa kikoba .Alyagha minkulha nu buki bwa mbala. ⁷ Asansagha mu kutenda : Ekushwa kumbusa kwani olya wantinga maghala , kubuno nshinakosha kukumbama nu kukandula mishighi sa bilato byaghe. ⁸ Ine nabapatishagha na masi ;we, akabapatisha na Muusa Musogha. ⁹ Nu mwebyo bindi ,Yesu atukagha ku Nasaleti sa Galilaya nu apatishibwagha na Yoani mu Yolodani . ¹⁰ Mu kutuka mu lusi,amonagha Ighulu l'ighuka, nu Muusa Musoga wamukumbilagha anga kilinga. ¹¹ Bitondo byongibwa ko mw'ishuki lya kutuka kw'ighulu : Uwe u Mwana wani shimwa sani. Mu 'we umunabika lutundo lwani lunsai. ¹² Kumbusa kwagho,Muusa enshagha Yesu mu kalula, ¹³ kwa kitagha bindi makumi manai,buno alingikwe na Kahinga. Abagha uko ghamoi na nama sa mbala,nu baghenshi bamukashagha. ¹⁴ Ghabinde Yoani akandwa,Yesu endagha ku Galilaya kusansa Musaghu Musogha wa Ghongo. ¹⁵ Atendagha: Bindi bika,nu bukota bwa Ghongo bwise bwighi. Mwinsungule ,nu mukatishe Musaghu musogha. ¹⁶ Bwabagha akutinga ku mutili wa kitatenge cha Galilaya ,amonagha ku Simoni nu Andele muto waghe,babagha bakulekela kakilha mu kitatenge ; kubuno babaga babhughi ba nshwe. ¹⁷ Yesu ababulagha: Munjange,nu nkabakita babughi ba bantu. ¹⁸ Agho,bashighagha tukila twabo,nu bamuyangagha. ¹⁹ .Gha bikagha kubusho,amonagha ku Yakobo musikila wa Sebedayo, nu Yoani muto waghe,nubo babagha mu bwato bekulanda tukila. ²⁰ Agho abamanagha ; nu bashighagha Ise wabo Sebedayo ghamoi na bakiti mu bwato,bamuyangagha. ²¹ Bendagha ku Kapelenaumu. Nu, busi bwa sabato ,Yesu ingilagha mu sinakoki nu kweghisha. ²² Baghanileghanile na meghisha maghe kubuno eghishagha na bwangato nu ta anga basanshi. ²³ Basangagha mu sinakoki muntu'moi wit'isumbu , nu walakagha : ²⁴ Ki cheli ghatusambana e Yesu wa Nasaleti? Washwile kutushimisha. Nkumana uwe nai; Musanana wa Ghongo. ²⁵ Yesu amusughilagha mu kutenda: Koba, nu tuka mw'oso muntu. ²⁶ Nu musumbu atukagha mw'oso muntu mwa mu kumutenja bubibu,nu kulekela mulenge munene. ²⁷ Bo bansai bakatwagha na nganingani, nu kwimbusha ,kiki kino ? Mango meghisha mano ! Ekukakisha basumbu nu be kumwongwa ! ²⁸ Nu lukumbu lwaghe lwenelagha ku Galilaya nu ku ntungo saghe. ²⁹ Mu kutuka mu sinakoki,bendagha na Yakobo nu Yoani mu numba sa Simoni nu Andele. ³⁰ Ninabyala wa Simoni abagha ayamile, akusamba kapulula;nu basambalilagha Yesu ibyo. ³¹ Mu kwika bwighi nawe,amukatagha kuboko nu kumwimalucha,nu alamagha.Ik'a abakitila nkashi. ³² Mw'igholigholo mu kuyama kwa musi, bamwekelagha basambi bansai nu bite basumbu. ³³ Nu musumba unsai wakulumaninde gha kitiko cha numba mwa beli. ³⁴ Alamyagha bantu bengi babagha na nsambo ningi ; atibitagha basumbu bengi nu ntashimagha buno basumbu batende, kubuno bamumanililagha. ³⁵ Mukucha kwa busi, mu lumbughembughe,imalukagha nu kwenda kusegha mu kisi cha kalula. ³⁶ Simoni nu bansai babagha nawe bendagha kumulonda ; ³⁷ Nu ghabamumonagha ko ,bamubulagha : Bantu bansai bakukulonda. ³⁸ Ababulagha : Twende kungo, ku myelo sa bwighibwighi kubuno neghishe ko;kubuno u binashwilinde ibyo . ³⁹ Nu endagha kweghisha mu ma sinakoki ,mu Galilaya insai, nu kutibita basumbu. ⁴⁰ Mubembi umoi ikagha kweli ;Akomagha mashwe nu kumulilila : Ndi washima,nengye. ⁴¹ Yesu amukwilagha lukogho ,alambyagha kuboko,kumukata ko, nu kutenda : Nashima ,lama. ⁴² Agho bubembi bwamutukagha ko ,nu alamagha. ⁴³ Agho Yesu amukuluchagha,amunaniagha nu kumubula : Ntusambalile muntu wampa; tondo nda windoshe kuli sankogha, ⁴⁴ Nu tucha lukaso lwa bwengyi bobe kuyangana na mutilo wa Musa,ube buteneneki kwabo. ⁴⁵ Tondo ghoso muntu endagha kwandabanya uso musaghu ,kubo Yesu ntanakoshishe kwingila lingo mw'oso musumba. Ikalagha mu tulula, nu bantu batukagha kunsai bashwagha kwaghe.