¹ Ku bindi bikeke, Yesu akulukagha mu Kapelenaumu. Mu kwongwa buno eli mu numba, ² kikembe kitanaghanswa cha bantu cha kulumanilagha gha kitiko.Abegheshagha kitondo cha Ghongo. ³ Bantu bamwekelagha , muntu wabensekile bighansa wekilwe na bantu banai. ⁴ Anga bubatakoshagha kumwicha bwighi na Yesu kubushi bwa kikembe,babakamagha ghantata gha numba,nu kumukumbya gh'itengu na mughu waghe. ⁵ Kumona ku lukatisho lwabo ,Yesu abulagha wabensekile bighansa: " Mwana wani, bwaghi bobe bwashighililwa ." ⁶ Ghabagha agho basanshi, bikalile ghansi,nu bakwitendya : ⁷ Buni bwatend'ono muntu ? Enegha Ghongo .Nai unashighilila bwaghi ndi ta Ghongo w'inene? ⁸ Yesu, gha managha bibekulenganya, ababulagha : Buni bumwite eso milenganya mu mitima sinu ? ⁹ Ki kisogha ,kubula wabensekile buno bwaghi bobe bwashighililwa ali kutenda : Imaluka, tola mughu wobe nu tabanga ? ¹⁰ Tondo mumane buno Mwana wa muntu ite bwangato mu kisi bwa kushighilila bwaghi. ¹¹ Nakubula,imaluka,tola mughu wobe nu nda kobe . ¹² Nu mwako kaluma ,imalukagha ,atolagha mughu waghe , nu kukukuka nu bansai bakulola, babagha mu kughanaghana ,nu kutata Ghongo ,mu kutenda : Tatulolagha ku buno. ¹³ Yesu endagha lingo ku leshilya kwa kitatenge. Musanganano munene wamuyangagha, nu abegheshagha. ¹⁴ Mu kutinga,amomagha ku Lawi ,mwana wa Lufayo ,ikalile ku numba sa kulighya mpalata. Amubulagha : Njange . Lawi imalukagha, nu kumuyanga . ¹⁵ Bwabagha Yesu ekulya mu numba sa Lawi,bantu ba tughutughu nu bantu ba bwaghi balyagha ghamoi nawe nu begheshibwa baghe;kubuno babagha bengi bamuyangagha. ¹⁶ Basanshi nu Bafalisayo ,kulola bwakulya na bantu ba tughutughu nu bisa bwaghi, babushagha begheshibwa baghe : Buni bwakulya nu kunywa na bantu ba tughutughu nu bisa bwaghi ? ¹⁷ Yesu mu kwongwa k'obo, ababulagha : Ta bankambwe u bakulondagha musakishi,tondo basambi .Nshashwile kumana basanana tondo bisa bwaghi. ¹⁸ Busi bumoi,begheshibwa ba Yoani nu Bafalisayo binanyishe indya kubushi bwa masegho. Bashwagha kubusha Yesu : Ki kikusula begheshibwa ba Yoani nu Bafalisayo bekw'inany'indya tondo bobe tabekwinanya ? ¹⁹ Yesu abakulagha : Binda ba nen'isonga ba ninanyia indya nu becheli ghamoi nawe ?Bu becheli nawe taba n'inany'indya ²⁰ Bindi bikashwa nen'isonga ntakaba nabo ,nw'agho ubo busi tabakalya. ²¹ Taku muntu unakulumanya nshulu nsogha nu sindisha ,kubuno nshulu nsogha nti salelemula s'indisha,nu kiboto nti cha tanuka. ²² Nu taku muntu unabika maku masogha mu malegha mindisha,mu kukita ubo,nti maku masogha nti mata malegha mindisha ,nu maku masogha nu malegha nti byakwa tughu ;Tondo bwatunganana maku masogha kubikwa mu malegha masogha. ²³ Bwabagha busi bumoi bwa sabato,Yesu atingagha mu maswa ma ngano.Mu lughendo,begheshibwa baghe bakokolagha ngano. ²⁴ Bafalisayo bamubushagha : Lola, buni bubakita bitanakitwa busi bwa sabato? ²⁵ Yesu abasubishagha: Tamusomagha byakitagha Daudi gha katwagha na nsala,we nu babo babagha nabo? ²⁶ Bu bingilagha mu numba sa Ghongo,mu bindi bya sankogha munene Abiata ,nu alyagha tumpampa twa kuloshibwa,tatunalibwa na ute sankogha, nu eleshagha bansai babagha ghamoi nawe ! ²⁷ Ababulagha lingo : Sabato sabikilwe kubushi bwa muntu ,ta muntu ku sabato, ²⁸ tondo,Mwana wa muntu u Mukota wa sabato.