¹ Bimalukagha bansayi,nu kwenda na Yesu kweli Pilato. ² Bamutalikilagha mu kutenda : Twasangagha ghono muntu ekulhuta kilongo kitu ku bita ,kunania bantu balighaghe mpalata, nu akw'imana Kilishitu,Mwami. ³ Pilato amubushagha : Ndi uwe Mwami wa Bayuda ? Yesu amwakulagha : Uwe watenda. ⁴ Pilato abulagha bisankoka banene nu kikembe : Nshamona kitondo kibi kw'ono muntu kinasula akwa. ⁵ Tondo bakokomeshagha nu kutenda : Ekulhuta bantu,nu kw'eghisha Yudea insayi,kulingila ku Galilaya nu kwikila g'hano. ⁶ Ghongwagha Pilato ku bya ku Galilaya,ik'abusha ndi'uso muntu eli mu Galilaya ; ⁷ nu ghamanagha buno eli wa kisi cha Helode, amusingagha kweli Helode, wabagha mu Yelusalema mwibyo bindi . ⁸ Gha monagha Helode ku Yesu,aboghaghabogha; Kubuno bindi bingi ashimagha amulole ko,ku byongwagha bikutendwa kuwe,nu alelamilagha kumona ku bitangalo bye kukita. ⁹ Amubushagha bingi ; tondo Yesu tamwakulagha. ¹⁰ Bisankogha banene nu basanshi babagha agho,nu kumutalikilagha bubibu. ¹¹ Helode ghamoi na balangi baghe ,bamweneghagha ; nu kushila ku musekelela nu kumushwalicha nshulhu sengenga, amukuluchagha kweli Pilato. ¹² Ubo busi,Pilato nu Helode baghalukagha binda,babagha baghini mwa kalai. ¹³ Pilato akulumanyagha basankogha banene,basushi ba bantu,ababulalagha : ¹⁴ Mwanekinde muntu ghono anga mulubhi wa bantu.Nu ,lola,namubusha gha mweli,nu nshasangile kitondo kibi ku bi mwa mutalikila ; ¹⁵ Helode nuwe,kubuno amukuluchagha kwani,nu lola,muntu ghono ntakitile kena kinasula akwa. ¹⁶ Na musunule kashi,gha nashile ku mupunda na tuti. ¹⁷ Mu kisaghulo kinsayi mukandwa umoyi emanwagha kukandulwa. ¹⁸ Bansai bakughagha : Itya ghono,nu tukandulile Balaba. ¹⁹ Ghoso muntu akandwagha ku lwayo lwatingagha mu musumba nu kwita muntu. ²⁰ Pilato ababulagha lingo,mu kushima akandule Yesu. ²¹ Nu bakughagha ,itwe ku musalaba,itwe ku musalaba . ²² Pilato ababulagha lya ngend'isatu;Bubi ki u bwakitile? Nshamonile muwe kinasula akwa .Namukandule kashi gha nashile kumupundya na tuti. ²³ Tondo bakokomeshagha na nkugho 'nene,mu kusegha buno akwe ku musalaba. Nu nkugho sabo similwagha : ²⁴ Pilato imilagha bibe'ubo . ²⁵ Akandulagha ghoso wakandwagha mu lwayo nu kwita muntu anga bu bashimagha;nu esanagha Yesu . ²⁶ Gha babagha bekwenda nawe,bakatagha mulume umoi Simoni wa Kulene,wabagha akutuka ku maswa, nu bamwechagha musalaba,buno ekegho kumbusa kwa Yesu. ²⁷ ayangwagha na kikembe kinene cha bantu,nu bakashi bakwingomba bukuba nu kwighanisha kubushi bwaghe. ²⁸ Yesu aghalukilagha ku beli,nu kubabula : Bakinga ba Yelusalema mundililaghe ; tondo mwindilile nu kulilila bana binu. ²⁹ Kubuno, bindi bikashwa nu bakatenda : Lukasano ku baghumba, lukasano ku nd'a sitabutile,nu mabele metemomya. ³⁰ Nu agho bakabula minduko: Mutwendukile ! Nu ntulungu mutubukile ! ³¹ Kubuno ndi bakita ibyo binsayi ku miti mbisi,kiki kikaba kweso sa kama ? ³² Babagha na bisungu bibili,bya kukwa ghamoyi na Yesu. ³³ Gha bikagha gha kishiki kikumanwa Lukungu, bamwindagha agho ku musalaba,nu ibyo bisungu bibili ,umoyi kw'indume ,n'ungo kw'ikashi. ³⁴ Yesu atendagha : Tata,bashighilile bwaghi,kubuno tabakumana bibakukita. Babeghanyagha nshulu saghe mu kusiesela mbale . ³⁵ Bantu babagha bimalile agho,nu bakulola.Basushi basekelelagha Yesu,mu kutenda : Onyagha bango ;iyonie w'inene,ndi we u Kilishitu,musombolwa wa Ghongo ! ³⁶ Basula nubo bamusekelelagha, kushighelela nu kumwelesha masi meli anga ma ndimu, ³⁷ mu kumubula: Ndi uwe mwami wa Bayuda,w'iyonie uwe w'inene ! ³⁸ Gha ntonga n'itwe lyaghe ghabagha mutilo :Ghono u mwami wa Bayuda. ³⁹ Umoi kw'ibyo bisungu bya misalaba amutukagha ,mu kumubula : Towe u Kilishitu? Iyonie uw'inene,nu u tonie nu beshwe. ⁴⁰ Tondo olya ungo amusughila gha,nu kumubula : Ntukukwa Ghongo boba ,uwe watinga mulo lusungyo anga we ? ⁴¹ Kwitu beshwe,twalighwa mabi mitu; tondo ghono,ntakitile kibi. ⁴² Nu abulagha Yesu : Wankengelagha gha wike mu bukota bobe. ⁴³ Yesu amubulagha : Nakubula bulili,buno busi ukuba n'ine mu Paladiso. ⁴⁴ Kutukila saa mutuba, kwikila saa mwenda,kwabagha bulimaswa mu kisi kinsayi. ⁴⁵ Mu musi mwingilagha bulimaswa, nu nshulu sa numba sa ku kumbamila satikagha mu nkatighi. ⁴⁶ Yesu alekelagha mulenge bubibu: Tata,mu maboko mobe mu nabika mutima wani.Nu mu kutenda ubo amesagha mutima. ⁴⁷ Mukulu wa basula ,mu kulola kw'ibyo byatinga,a ghanulagha Ghongo nu kutenda: Bulili ,ghono muntu abagha wasanana. ⁴⁸ Nu'abo babagha mu kikembe ,gha bamonagha ku binsayi byatingile ,bakulukagha bakwingomba bukuba. ⁴⁹ Bisakwabo na Yesu,nu bakashi bamwelekeshagha kutukila ku Galilaya,bimalagha kulayi nu kulola bikutinga. ⁵⁰ Kwabagha mukungu umoyi,ukumanwa Yosefu, muntu musogha nu wasanana, ⁵¹ utabagha mu lwango nu mu bitondo bya banabo; abagha wa ku Alimetea,musumba wa Bayuda,nu alindilagha bukota bwa Ghongo ⁵² Ghoso mulume endagha kweli Pilato,nu kumusegha kilunda cha Yesu. ⁵³ Akituchagha ku musalaba,ku kibilinga mu malekani ,nu ku kibika mu nsinda satimwagha mw'ikoyi ,mwabagha ta mubikwa muntu wampa. ⁵⁴ Bwabagha busi bwa kulongomanya,nu sabato sabagha bwighi . ⁵⁵ Bakashi batukagha ku Galilaya ghamoyi na Yesu,belekeshagha Yosefu, balolagha nsinda nu buni bwabikwa mubili wa Yesu, ⁵⁶ nu,mu kukuluka ,balongomanyagha mwambo nu ngenge.Nu bomulwagha busi bwa sabato,kuyangana na mulembe.