¹ Mwebyo bindi,Kaisali Ogishito atuchagha lukakisho,kukitwe lughanso lwa bantu ba kisi kinsai. ² Lughanso lusoki lwakitilwe nti Kulino u mukulu wa musumba wa Sulia. ³ Bansai bendagha kughanswa,na muntu mu musumba waghe. ⁴ Yosefu nuwe abakamagha kutuka ku Galilaya mu musumba wa Nasaleti nu kwenda ku Yudea,musumba wa Daudi ,ukumanwa Betelehemu, kubuno abagha wa mukikanga cha Daudi , ⁵ buno ende kughanswa ghamoi na Malia wandilwe nawe, wabagha mwemeshu. ⁶ Gha babagha uko ,bindi bya Malia bya kubuta bikagha , ⁷ nu abutagha nkulha saghe. Amughondagha mu bileshi nu kumuyamicha mu mulinga , kubuno bindagha kishiki mu numba sa bagheni. ⁸ Mwicho kibe cha kisi kwa bagha bangele bakutinga mu maswa mu kubila kwa busi mu kulanga ntuko sabo. ⁹ Nu lola mughenshi umoi wa Mukota abapamukilagha ,nu lukumbu lwa Mukota lwasanagha mu ntungo sabo. Bakatwagha na boba bunene . ¹⁰ Tondo mugenshi ababulagha : Mukwaghe boba ; Kubuno nabasambalila musaghu musogha , ukaba wa mboghimboghi ku bantu bansayi: ¹¹ buno busi mu musumba wa Daudi, abutwa kwinu , Mwonya , u Kilishitu , Mukota. ¹² Nu lola kamanililo ka mwamumanilile ko : Mwasange mwana aghondilwe mu bileshi nu ayamile mu mulinga. ¹³ Nu mwako kaluma ,kikembe kingi cha kw'ighulu chaswanagha n'oso mughenshi, mu kutata Ghongo nu kutenda : ¹⁴ Lukumbu kweli Ghongo mu bishiki byeli ghantata n'ighulu,nu boolo gha kisi ku bantu ba bashimwa ! ¹⁵ Gha kulukagha baghenshi kw'ighulu, ba mingele batendagha gha basambana : Twende ku Betelehemu,nu tulole chabinde uko,kitwabulilwe na Mukota. ¹⁶ Batibitilagha ko, nu basangagha Malia nu Yosefu,nu kalenge kayamile mu mulinga. ¹⁷ Mu kushila kumumona ko,baghanikishagha ki babulwagha kubushi bwa kako kalenge. ¹⁸ Bo bansayi bongwagha bukutenda mingele, baghanaghanagha . ¹⁹ Malia alangile ibyo bitondo binsayi nu ku bighanilila mu mutima waghe. ²⁰ Nu mingele sakulukagha mu kughanula nu kutata Ghongo, ku binsayi bi bongwagha nu kulola ko , byalingimana na bibabulwagha. ²¹ Ku bindi munane busi bwa kumonya mwana bwali bwa munganga , bamwanikagha ishina lya Yesu ,ishina lya loshwagha na mughenshi nu ishimi lya mwana talyekwa. ²² Nu ghen'inde bindi bya lwengyo lwabo,kuyangana na mulembe wa Musa, Yosefu nu Malia bekagha mwana ku Yelusalema , buno bamuloshe kweli Mukota, ²³ anga bu byatililwe mu mulembe wa Mukota : Nkulha insayi sa mwana wa mulume sikatulilwa Mukota , ²⁴ nu kusigha bilhuka bibili ali bilinga bibili bite buta, kuyangana na bwatililwe mu mulembe wa Mukota . ²⁵ Nu lola ,kwabagha mulume umoi ku Yelusalema ukumanwa Simeoni . Ghoso muntu abagha alongomana nu wasanana, alindilagha bongeleshi bwa Isilaeli, nu abagha na Muusa Musogha. ²⁶ Akengeleshwagha na Muusa Musogha,buno ntakakwa ndi ntemona ku Kilishitu Mukota. ²⁷ Ekwagha na Muusa Musogha mu numba sa kukumbamila . Nu anga bwekagha babuti kalenge Yesu,mu kukucha bya tililwe mu mulembe , ²⁸ amukatagha mu maboko maghe kukasanila Ghongo nu kutenda : ²⁹ Mukota,shigha lino Mukiti ghobe iendele na boolo,anga bwatenda kitondo chobe. ³⁰ Kubuno miso mani malola lonio lobe, ³¹ lonio luwa longomanyagha ku bilongo binsayi, ³² Chengeshi cha kusanila bilongo ,nu lukumbu lwa kilongo chobe,Isilaeli. ³³ Ise nu nina babagha mu kwintangala na bitondo byatendwagha kuwe. ³⁴ Simeoni abakasanilagha, nu kubula Malia nina : "Lola , ghono mwana abikwa kwendula nu kwimasha bengi mu Isilaeli, nu akaba kamanililo ka kulhuta kwengukana." ³⁵ Nu kobe uw'inene , mwele ukakubhuya mutima , kubuno makengelo ma bengi malimbulwe. ³⁶ Kwa bagha ungo mulenganya umoi wa mukashi u Ana,mukinga wa Fanueli,wa mu kikanga cha Aselo. Abagha akungugha , nu akitagha ''na mulume waghe myaka mutubakamu kutukila bukinga bwaghe. ³⁷ Ashighinde musumbakashi wa myaka makumi munane nu inai ,ntatukile mu numba sa kukumbamila ,nu akukitila Ghongo mulimo,musi nu kindi mu kw'inany'indya nu mu masegho . ³⁸ Ghi kagha nuwe mweso nkungu ,atatile Ghongo, nu kusambala misaghu sa Yesu kwabo bansayi babagha bekulindila lukandulo lwa Yelusalema. ³⁹ Gha bagha bashila binsai byatilwagha mu mulembe wa Mukota ,Yosefu nu Malia bakulukagha ku Galilaya,mu musumba wabo Nasaleti . ⁴⁰ Kashi mwana akulagha nu kw'isala maghala . Isalilanagha na bulenganya,nu mpang'inene sa Ghongo sabagha nawe. ⁴¹ Mu mwaka,babuti ba Yesu bendagha benda ku Yelusalema mu kisaghulo cha pasaka . ⁴² Gha bagha ghoso mwana akucha myaka ikumi n'imbili,bendagha nawe ko kuyangana na ntungo sa kisaghulo. ⁴³ Nu,mu kushila kwa bindi,nu bakulukagha ,mwana Yesu ashighalagha ku Yelusalama . Ise nu nina tabamanagha . ⁴⁴ Mu kulenganya buno eli na banabo ba lughendo,bakitagha kindi kimoi cha lughendo,nu bamulondagha munkatighi na babuti nu binda babo. ⁴⁵ Tondo mu kwinda kumumona ko ,bakulukagha Yelusalema kumulonda. ⁴⁶ Ku bindi bisatu, bamusangagha mu numba sa kukumbamila,ikalile mu nkatighi sa ngatu mu kubongwilila nu kubabusha. ⁴⁷ Ba bansai babagha bakumwongwilila baghanaghanagha na mulenganya nu kwakula kwaghe . ⁴⁸ Babuti baghe mu kumumona ko, baghanaghana , nu nina 'amubulagha : Mwana wani buni buwatukitila u'bo ?Lola,so nu ine,twakulondagha na kabebe . ⁴⁹ Ababulagha: Ki chasulagha mwandonda ? Tamukumana buno nema kukita bitondo bya Tata ? ⁵⁰ Tondo tabongwagha bya babulagha. ⁵¹ Akumbagha nabo ku Nasaleti, nu imbotishe ku beli . Nina abikile ibyo bitondo binsai mu mutima waghe. ⁵² Nu Yesu akulile mu bulenganya ,nu mu kiima nu mu mpang'inene mu miso ma Ghongo nu ma bantu.