Kikando 1
1
Bantu bengi binginde mu kutila ngano sa bitondo bya kitilwe munkatighi na beshwe,
2
kutingila bitwasambalindwe na bateneneki kulingila ku ndingililo nu babinde bakiti ba kitondo,
3
bwanswaghilagha n'ine, gha nashilagha kutitika bulili bwa bibyo bitondo binsai ku ndingilo sabyo nu kukwikisha byo na mitilo buno biyangililwe busogha mweme Teofilo,
4
nu umane bulili bwa meghisha ma weleshibwagha.
5
Mu bindi bya Helode, mwami wa Yudea,kwabagha Sankogha umoi ishina lyaghe Sakalia,wa mu kikanga cha Abiya ;mughole waghe abagha umoyi mu bakinga ba Haluni, wamanaghwa Elisabeti.
6
Bo babili babagha basanana mu miso na Ghongo,bakatililagha butanasungulwa nkakisho nu mibiko insayi sa Mukota.
7
Ta babagha na bana , kubuno Elisabeti abagha mughumba ;Nubo babili babagha bakungugha.
8
Nu, mu kuba akukita milimo saghe mu miso ma Ghongo, anga bwasombolwagha ,
9
bwikala myanya sa bisankogha,kwingila mu numba sa kukumbamila sa Mukota kwa kutula bwagha.
10
Kikembe kinsayi chabagha ghambugha ki kusegha,mu nkungu sa kubanja bwagha.
11
Agho mughenshi wa Mukota apamukilagha Sakalia,nu kwimala kw'indume lya kasasa ka bwagha.
12
Inga Sakalia aghanaghanagha mwa mu kumumona ko,nu kukwa boba.
13
Tondo mughenshi amubulagha : Ntukwe boba Sakalia ; kubuno isegho lyobe lyongwilwe. Mughole wobe Elisabeti akakubutila mwana,nu ukamwanik'ishina lya Yoani.
14
Akaba ku weli,mweme wa mboghimboghi nu kyelele,nu bengi bakasekela mu kubutwa kwaghe.
15
Kubuno akaba mukulu munene mu miso ma Mukota.Ntakanywa maku makusugha,nu akisalilana na Muusa Musogha kutukila munda sa nina;
16
Akakulucha bana bengi ba Isilaeli kuli Mukota ,Ghongo wabo;
17
Akatabanga ghabusho na Ghongo ghamoi na muusa nu maghala ma Eliya, mwa mu kukulucha mitima sa batata ku bana ,nu bahuni ku bulenganya bwa basanana,buno alongomanishile Mukota bantu batunganana.
18
Sakalia abulagha mughenshi : Ku kiki kunkamanila ibyo? Kubuno nili mukungu,nu mughole wani akungugha.
19
Mughenshi amwakulagha : Ine u Kabuliele,nimala mu miso ma Ghongo ; nasingilwe nitende nowe,nu kukusambalila musaghu musogha.
20
Nu lola, wabe kalumbu,nu ukatenda busi bukakuka ibyo bitondo, kubuno ntwakatishe ku bitondo byani, bikabelelela ku bindi byabyo.
21
Nwagho, bantu ba babagha bakulindila Sakalia ,baangamile kubuno indisha mu numba sa kukumbamila.
22
Mwa mu kukukuka,ntakoshagha lingo kutenda nabo,nu bamanagha buno amonile ku bilengi mu numba sa kukumbamila ; atendandagha nabo mu tushinga nw'ashighalagha kalumbu.
23
Gha binde bindi byaghe bya mulimo byashila, iendelagha kwaghe.
24
Kumbusa kwibyo bindi ,Elisabeti,mughole waghe ,ekagh'ishimi . Imbisagha myeshi itano,mwa mukutenda :
25
U mpang'inene sankitila Mukota,andola ko,nu kuntucha nsoni mu kantighi na bantu.
26
Mu mweshi wa mutuba,mughenshi Kabulieli asingwagha na Ghongo mu musumba umoi wa Galilaya,ukumanwa Nasaleti ,
27
kweli mukinga umoi utemana balume,wandilwe na mulume umoi wa kikanga cha Daudi, ukumanwa Yosefu. Ishina lya ghoso mukinga u Malia.
28
Mughenshi ingilagha mweli nu kutenda : Samba ,uwe wite mpang'inene ; Mukota eli ghamoi nowe.
29
Mu kughanaghana nwicho kitondo, Malia imbushagha buni bwatenda eno samba .
30
Mughenshi amubulagha : ntukwe boba Malia kubuno wite mpang'inene ku miso ma Ghongo.
31
Nu lola,wek'ishimi,nu kubuta mwana,nu wamwanik'ishina lyaghe Yesu.
32
Akaba munene, nu akamanwa Mwana wa Nene_kw'ighulu,nu Mukota Ghongo akamwelesha kishumbi k'ise Daudi.
33
Akimalila milyalya mu numba insai sa Yakobo,nu bukota bwaghe tabukashila.
34
Malia abulagha mughenshi:Buni bukaba ubo,kubuno nshimana nenshi mulume ?
35
Mugheshi amwakulagha : Muusa Musogha ashwe ku weli,nu maghala manene ma Nen'ighulu ma kakubukila na kilimelime chaghe.Uchasula mwana wasanana ukabuta akamanwa Mwana wa Ghongo.
36
Lola Elisabeti,mubyala wobe,nuwe it'ishimi lya myeshi mutuba ku bukungu bwaghe,olya wamanaghwa mughumba.
37
Kubuno takuli kinalibanwa na Ghongo.
38
Malia atendagha : Nili mukiti wa Mukota, bibe kwani anga buwatenda ! Nu mughenshi amushighagha.
39
Mwibyo bindi,Malia imalukagha,nu kutibitila ku minduko,sa musumba wa Yudea.
40
Ingilagha mu numba sa Sakalia,nu kukasha Elisabeti samba.
41
Elisabeti gho ngwagha ku samba sa Malia,mwana asaghalukagha munda saghe, nuwe isalilanagha na Muusa Musogha.
42
atendagha n'ishuki linene : Wakasanilwa munkatighi na bakashi bansai,nu imbuta lyobe lyakasanilwa.
43
Buni bunika ,nina wa Mukota wani ku neli ?
44
Kubuno lola, gha nongwagha wankesha , mwana asaghaluka munda sani.
45
Akasanilwe olya wakatisha ,kubuno bitondo byabulwagha na Mukota bikabelelela.
46
Nu Malia atendagha :Mutima wani waghanula Mukota,
47
nu muusa wani wa boghelaboghela Ghongo, Mukota wani.
48
Kubuno alolile kubota kwa mukiti waghe.Nu ngiso insai sikanimana mukasanilwa.
49
Kubuno,Nene maghala mansai ankitinde binene .Ishina lyaghe lya sanana.
50
Nu lukogho lwaghe luli lwa myaka nu myaka kubabo bakumukwa boba.
51
Aloshishe maghala ma kuboko kwaghe,asandabanishe babagha na makengelo mabi mu mutima.
52
Atukishe bisa maghala ku bukota bwabo,nu imashishe ba bota .
53
Ikutishe bite nsala, nu atibitile batumba bulya bulya.
54
Akenginde Isilaeli,mukiti waghe,nu mukukengela lukogho lwaghe,
55
anga bwabulagha batata,kweli Bulaimu nu kibuti chaghe bindi binsai.
56
Malia akitagha na Elisabeti kili anga myeshi esatu. Kushila'agho akulukagha kwaghe.
57
Ghe nelagha bindi bya kubuta, Elisabeti abutagha mwana wa mulume.
58
Banabo nu babuti baghe gha bongwagha buno Mukota amukitinde bya lukogho,ba boghaboghagha ghamoi nawe.
59
Ku bindi munane ,bendagha ku monya mwana,nu kumwanika Sakalia ishina l'ise.
60
Tondo nina atendagha : t'obo ,amanwe Yoani.
61
Bamubulagha: Mu mubuto wobe takuli muntu ukumanwa mwel'ishina .
62
Nu bashimilagha ise buno abaloshe buni bwashima mwana amanwe.
63
Sakalia aseghagha kibau ,nu kutila : Ishina lyaghe u Yoani.Nu bansai baghanaghanagha.
64
Mwako kaluma,kanywa kaghe kashibukagha,lulame lwa kandulwagha,nu atendagha , mu kukasanila Ghongo.
65
Bantu bansai ba mu ntungo bakwagha boba , nu mu mindiko insai sa Yudea, ibyo bitondo bya ghanikishibwagha.
66
Bansai bongwagha kwibyo,babikagha byo mu mitima, mu kutenda : Buni bukaba ghono mwana ? Nu kuboko kwa Mukota kwabagha ghamoi nawe.
67
Sakalia,ise isashwagha na Muusa Musogha,ik'atenda bya bulenganya,mu bino bitondo :
68
Akasanilwe Mukota,Ghongo wa Isilaeli. Kubuno atabanginde nu konya kilongo chaghe,
69
Nu atwikishe Mukota nene maghala mu numba sa Daudi,mukiti waghe.
70
Anga bubo bwatendagha mu kanywa ka balenganya basanana mwa mu bindi byatingile.
71
Mwonya u kututucha ku baghini bitu nu mu maboko ma'bo basombi bitu!
72
U bwekulosha lukogho lwaghe ku batata.Nu kukengela indaghi lyaghe lya sanana.
73
Kutingila kulumbila bwa kitagha na Bulaimu tata witu .
74
Atutuchagha mu maboko ma baghini bitu buno tube na boba bwa ku mukitila milimo.
75
Nu mu kutabanga mu miso maghe mu busanana nu mu bulingimanyi bindi bitu binsai.
76
Nu we mwana muto,ukamanwa mulenganya w'i Nen'ighulu; Kubuno ukatabanga mu miso ma Mukota buno ulongomanye nsila saghe.
77
Buno eleshe kilongo chaghe kumanilila lonyo kushighililwa bwaghi bwaghe.
78
Kubushi bwa lukogho lwa Ghongo witu.Musi u kusana watukile kw'ighulu nu kwika kwitu,
79
kwengesha babo beli mu bulimaswa bwa lukwo,nu kwensha maghulu mitu mu nsila sa boolo.
80
Nu mwana akulile , nu kwisashwa maghala mu muusa.Nu ikalagha mu tulula kwikila busi bwindoshagha ku Isilaeli.