¹ Uchasula twemana kwikatilisha ku bitondo bitongwagha ko,buno tunashwa kwekwa bulai nabyo. ² Buno ,ndi kitondo cha sanswagha na baghenshi chakitile nkashi,nu ndi mweneghana wa kitondo nu kwinda kongwa,byakasilwe indigho lyatunganana nabyo, ³ buni butunasoghonoka kwaghibwa ndi twenegha lonio lunene anga luno,lo,lwasambalwagha tanga na Mukota,lwakokomeshibwe kwitu na babo balongwagha ko tanga, ⁴ Ghongo mu kukokomesha buteneneki bwabo, kutingila tumanililo, bighanaghana nu bitangalo bingi,nu kutingila nkaso sa Muusa Musogha,sabeghanishibwe kuyangana na bwashima. ⁵ Bulili,ta baghenshi u beleshibwe na Ghongo kisi kikashwa kitukutenda. ⁶ Kubuno nu muntu umoyi atenenekile kungo buno :Muntu u nayi buno umukengele,nu mwana wa muntu buno umukumbilile? ⁷ Wamubikagha bindi bikeke kunsi kwa baghenshi,wamushwalikishe nkumbu sa lukumbu nu lwanso, ⁸ Wabikile binsayi kunsi na mashinshi maghe.Bulili,mu ku mwelesha binsayi, Ghongo ntashighile kikayi champa chatamweleshishe,tondo tatulola nenshi lelo ndi eleshibwe binsayi. ⁹ Tondo wabikwagha mu bindi bikeke kunsi kwa baghenshi, Yesu twamumona ko ite nkumbu sa lukumbu nu sa lwanso kubushi bwa lukwo lwamunubyagha, kubuno,kutingila mpanga inene sa Ghongo,anubila bansayi kwikila lukwo . ¹⁰ Bulili,bwaswagha ku olya wite binsayi nu binsayi byeli byaghe,nu washimagha kwicha mu lukumbu bengi ku bana baghe,imasha mu busanana kutingila minubo Mwami wa lonio lwabo. ¹¹ Kubuno olya ukusanania ,nu babo bakusananwa,batuka kweli muntu umoi.Uchasula ntite nsoni sa kubamana bisakwabo, ¹² gha kuba akutenda:Nkasansa ishina lyobe kweli bisakwitu,nkakumoghelamoghela mu musanganano. ¹³ Nu lingo:Nkishighilila muwe.Nu lingo ine ghono, ine nu bana baneleshagha Ghongo. ¹⁴ Kashi lino,kubuno bana basanginde mikilha nu nama,w'inene nuwe asanginde,kubuno,kutingila lukwo,anante ghoso wite bwangato bwa lukwo,ukutenda buno musumbu, ¹⁵ nu ukukandula babo bansayi,bakukwa lukwo boba,kalamo kabo kashibikwagha mu bukobe. ¹⁶ Buno bulili ,nta baghenshi u bakukasha, tondo kibuti cha Bulaimu. ¹⁷ Uchasulagha emanagha asusane na bisakwabo mu binsayi ,buno abe Mwami Nsakogha munene wa lukogho nu wa bulili ku nkashi sa Ghongo,buno ashimye bwaghi bwa bantu; ¹⁸ Buno,mu kuba winene alingikwagha mu kunuba,anakosha kukasha babo bakulingikwa.