¹ Ntumwa nu babo bansayi babagha ku Yudea bongwagha buno bingo bilongo basekinde kitondo cha Kalagha. ² Nu Petelo endagha ku Yelusalema,bakatisha ba Bayuda bamusughilagha,mu kumubula: ³ Winginde ku bantu batamonishwe,nu walile ghamoyi nabo. ⁴ Petelo abaghanikishagha busogha busogha binsayi byatingile. ⁵ Inga tenda:Nabagha mu musumba wa Yopa,nu ghanaba nkusegha,nakalikagha kalengwe na nabagha na kalolesho:Kikayi chasusa nshulu nene chakatilwe ku matwe manayi,chatukagha kw'ighulu nu kwika gha neli . ⁶ Mukwengelesha bubibu mweso nshulu, naghenshagha nu kulola ku nama sa maghulu manayi ,nama sa mbala ,nama sikwimbuluta,nu tusoni twa kw'ighulu. ⁷ Nu nongwagha ishuki linkumbula: Imaluka,Petelo,Ita nu lya. ⁸ Tondo natendagha :Aye,Mukota,kubuno kintu chabigha ali kibi takingila mu kanywa kani. ⁹ Nu lya ngendo imbili nongwagha kwelyo ishuki lya kw'ighulu. Chabalikwa na Ghongo kisogha,ukimane kibi. ¹⁰ Ebyo byatingagha ngendo esatu;nu kumbusa kwagho binsayi byatolwagha kw'ighulu. ¹¹ Nu Lola,agho,bantu basatu kutuka ku kaisalia basingwagha ku neli bikagha gha kitiko sa numba sinabagha mo. ¹² Muusa Musogha ambulagha ninanaghe nende ghamoyi nabo,babano balume mutuba bamukumona ko banelekishagha, nu twingilagha mu numba sa Kolonele. ¹³ Ghono mulume atughanikishagha bwa bikagha mughenshi mu numba saghe nu kumubula :Singa bantu ku Yopa,bashwe na Simoni ukumanwa Petelo, ukakubula biyondo kutingila byo ukona uwe nu numba sobe insayi. ¹⁵ Ghanabagha nkutenda,Muusa Musogha wakumbilagha ku bansayi anga ku beshwe mu ndingililo. ¹⁶ Nu nakengelagha kino kitondo cha Mukota :Yoani apatishagha na masi ,tondo benywe,mukapatishibwa na Muusa Musogha. ¹⁷ Buno, Ghongo abeleshishe nkaso anga sitweleshibwe beshwe bakatishagha Mukota Yesu Kilishitu,buni buninakosha ine kunana bya Kalagha? ¹⁸ Mu kushila kongwa k'obo bakobagha,nu baghanulagha Ghongo mu kutenda: Ghongo eleshishe bingo bilongo, kushighililwa kwa bwaghi buno babe nubo kalamo. ¹⁹ Ba basandabanagha mu lukwo lwa Setefano bendagha nu kwika ku Fenisia,ku kakishi ka Kipulo,nu ku Antokia,kusambalila Bayuda umpanga kitondo cha Ghongo. ²⁰ Kubo kwabagha balume bamoyi ba Kipulo ,nu ba Kulene,bendagha ku Antiokiya,batendagha na Bagiliki,nu kubasambalila nubo kitondo cha Mukota Yesu. ²¹ Kuboko kwa Mukota kwabagha ghamoyi nabo,nu bantu bengi bakatishagha nu baghalukilagha Mukota. ²² Ibyo bitondo byongwibwagha ko nabantu ba Kanisa ka Yelusalema,nu basingagha Balanaba kwenda ku Antiokia. ²³ Ghabinde ika ,nu kulola ku bisogha bya Ghongo,aboghaboghagha,nu abaseghagha babe na mutima umoyi wakayilila mu Mukota. ²⁴ Kubuno abagha muntu musogha wisalilana na Muusa Musogha nu lukatisho.Nu bantu bengi bikatilishagha mu Mukota. ²⁵ Balanaba endagha lingo ku Talaso kulonda Saulo; ²⁶ nu gha musangagha amwichagha ku Antiokia.Ku mwaka mughimaghima,bakulumanagha na misanganano sa Kanisa,nu begheshagha bantu bengi.Ku Antiokia u kwamanwagha litangi begheshibwa buno Bakilishitu. ²⁷ Mw'ibyo bindi,Balenganya batukagha Yelusalema kwenda ku Antiokia. ²⁸ Umoyi wabo babili ukumanwa Agabusi,imalukagha ,nu kusambala kutingila Muusa buno kwabe nsala mbibu ku kisi kinsayi.Sabagha mu bindi bya Mwami Kolode. ²⁹ Begheshibwa bimilagha kusinga mwolulo ku mibuto seli ku Yudea. ³⁰ Bikishagha so Bakungu kutukila maboko ma Balanaba nu Saulo.