¹ . Teofile,natendagha mu kitabo chani kisoki,ku binsayi byakitagha Yesu nu kweghesha kulingila ndingililo, ² kwikila busi bwatolwagha kw'ighulu,gha shilagha kwelesha ntumwa sa sombolagha mibiko ,kutingila Muusa Musogha. ³ Gha shilagha kunuba,indoshagha mughimaghima ku beli,nu kubelesha tumanililo twingi,nu kwindosha ku beli ku bindi makumi manayi,nu kubabula ku bitondo bya bukota bwa Ghongo. ⁴ Ubo bwabagha nabo,abakakishagha bendaghe bulayi na Yelusalema,tondo balindile indaghi l'Ise,lyababulagha ko,u bwa babulile; ⁵ Kubuno Yoani apatishagha na masi,tondo benywe,mu bindi bikeke,mukapatishibwa ku Muusa Musogha. ⁶ Agho ntumwa sa kulumanagha nu kumubusha:Mukota,ndi mu bino bindi u muukimika bukota bwa Isilaeli? ⁷ Abakulagha:Ta kanshi sinu kumana bindi ali nkungu sabikilwe na Tata mu bwangato bwaghe. ⁸ Tondo, mukasekela mpumba,Muusa Musogha kwika kwinu,nu mukaba bateneneki bani mu Yelusalema,mu Yudea insayi,mu Samaliya,nu kwika kushinda kisi. ⁹ Mu kushila kutenda ubo,atolwagha nu bakulola,nu lubhu lwa mubukilagha . ¹⁰ Nu bu babagha bakughalamila kw'ighulu nuwe ekwenda,lola,balume babili bashwalile nshulu senga babapamukilagha, ¹¹ nu kutenda :Bantu ba Galilaya,buni bumwindisha mukwengelesha kw'ighulu?Ghoso Yesu,watolwa kw'ighulu mukantighi na benywe,akashwa ubo bumwamulola ko ekwenda kw'ighulu. ¹² Agho bakulukagha ku Yelusalema, ku mwinduko ukumanwa Miseituni,bwighi na Yelusalema mu lughendo ta lulayi. ¹³ Gha bikagha ,babakamagha mu chumba cha kuntata mu bendagha bikala; babagha Petelo,Yoani,Yakobo,Andele,Filipo,Toma,Matoloma,Matayo,Yakobo musikila wa Lufayo,Simoni wamanagwa mu Seloti nu Yuda musikila wa Yakobo. ¹⁴ Bansayi mu lwango lumoyi bikalagha mu masegho,ghamoyi na bakashi,nu Malia nina wa Yesu,nu ghamoyi na bisakwabo na Yesu. ¹⁵ Ubo busi,Petelo imalagha mu kantighi na bisakwabo,babagha anga bantu ighana nu makumi mabili.Nu'ingatenda: ¹⁶ Bisakwitu,bweli busogha bi belelele byatendwagha mu Kitondo cha Ghongo na Muusa Musogha kutingila kanywa ka Daudi,ku kitondo cha Yuda,olya wasondelagha ba bakatagha Yesu nsila. ¹⁷ Abagha umoyi ku beshwe,nu abagha na kibhu mweno nkashi. ¹⁸ Ghoso muntu,kushila kughula iswa na bikulo lya mabi,awagha,nu kuketuka ngendw'imbili,nu misolo saghe sa sandabanagha. ¹⁹ Icho kitondo cha managhwa na bantu bansayi ba Yelusalema buno ilw'iswa lyamanwa mu mutendeshi wabo Hakaladama,u kutenda buno iswa lya mikilha. ²⁰ Ibyo byatilwa mu kitabo cha nembo:Kishiki chaghe kighaluke kalula,nu muntu ntikale mwicho! Nu'ungo atole kishumbi chaghe! ²¹ Bwaswagha,umoyi ba twatabangagha nabo mu bindi bitwabagha na Mukota Yesu, ²² kulingila lupatisho lwa Yoani kwikila busi bwatolwagha mu nkatighi na beshwe,kube umoyi wakughanswa na beshwe wabe muteneneki wa kutuka ku bakuyi bwa Yesu. ²³ Bimikagha bantu babili:Yosefu wamanaghwa Baliseba lingw'ishina lyaghe Yusuto,nu Matiya. ²⁴ Agho,baseghagha:Mukota,uwe ukumana mitima sa bansayi,tuloshe ku bano babili olya u wasombola, ²⁵ buno abe na kibhu mu ghuno mulimo nu nkashi nsogha,sashighwagha na Yuda mu kwenda mu kishiki chaghe. ²⁶ balasagha mbale ,nu saloshagha Matia,aghanswagha mu ntumwa ikumi n'emoyi.