¹ Polo,ntumwa sa Yesu Kilishitu kutingila kushima kwa Ghongo buno asanse indaghi lya kalamo keli mu Yesu Kilishitu , ² Kweli Timote mwana wani unashima;weleshibwe mpang'inene,lukogho nu boolo bikutuka kweli Ghongo Tata nu kweli Yesu Kilishitu Mukota witu! ³ Nakasanila Ghongo wakitilwagha milimo na batatangulu , nu unkukitila na mutima musogha, kubuno musi nu kindi nkukukengela mu masegho mani . ⁴ Nkukengela bitengetenge byobe nu nkushima nikumone ko, kubuno nibe na mboghimboghi, ⁵ mu kulanga makengelo ma lukatisho lwa bulili luwite,lwabagha tanga na nokongulu Loisi nu noko Euniki, nu nkumana bulili buno wite lo. ⁶ Uchasula nkukwana bucha lukaso lwa Ghongo luweleshibwagha mu kubikilwa maboko mani. ⁷ Buno ta mutima wa boba u watweleshishe Ghongo,tondo mutima wa maghala,lutundo nu lwa bwenge. ⁸ Ukwaghe nsoni kutenenekela Mukota witu ,ali ine mukandwa waghe.Tondo nuba ghamoyi n'ine kubushi bwa musaghu musogha, ⁹ kutingila bwangato bwa Ghongo watulamyagha ,nu watumanagha,ta buno ku mikolo situ,tondo bwalenganyagha kalayi,nu kutingila mpanga'inene sitweleshibwe mu Yesu Kilishitu kulingila milyalya, ¹⁰ salolekagha ko mu kwika kwa Mukota witu Yesu Kilishitu,washililishagha lukwo nu kwimika kalamo katanashila kutingila musaghu musogha. ¹¹ Ku ghoso musaghu musogha ukunabikwagha Musanshi nu Ntumwa ,buno negheshe bilongo. ¹² Kwibyo uchasula n'kunuba;tondo nshikukwa nsoni ,kubuno nkumana olya u nakatishishe,nu nkumanilila bulili buno ite maghala ma kulanga bya byeli mu mutima wani kwikila ubo busi. ¹³ Katilila mu lukatisho nu mu lutundo byeli mu Yesu Kilishitu, meghesha mani masogha. ¹⁴ Langa bisogha biwite mu mutima,kutingila Muusa Musogha u twite. ¹⁵ Ukumana buno bansayi beli ku Asia ban'shighile,anga Fijelo nu Helemojene. ¹⁶ Lukogho lwa Mukota lube nu numba sa Onesifolo,buno ambomboleshishe,nu nta kwilinde nsoni miyololo sani ; ¹⁷ Tondo, ghikagha ku Loma andondagha bubibhu ,inga'nimona ko. ¹⁸ Nu Mukota amukwile lukogho ubo busi , u'kumana busogha nkashi ningi sankitilagha kuko ku Efeso.