¹ Uwe lino Mwana wani, wikokomeshagha mu mpang'inene seli mu Yesu Kilishitu. ² Nu biwongwagha ko ku neli mu miso ma bateneneki bengi,byeleshe bantu ba bulili , banakosha nubo kweghesha bango. ³ Nuba ghamoyi n'ine, anga sula musogha wa Yesu Kilishitu. ⁴ Takuli sula ukwikatilisha ku bitondo bya kalamo, ndi akushima aboghyeboghye olya wa mu managha ; ⁵ Nu mwenda lubilo ntanashwalichwa nkumbu ndi ntayanganagha na mubiko wa lubilo. ⁶ Mulimi emana tanga kulima inga amana kukana. ⁷ Wongwa bunkukubula, kubuno Mukota akakwelesha mulenganya mwebyo bitondo. ⁸ Kengela Yesu Kilishitu,wa kibuti cha Daudi, watukagha ku bakui,kuyangana na musaghu musogha wani, ⁹ Uwasula nkunuba kwikila ku kandwa anga mukiti wa mabi.Tondo kitondo cha Ghongo ta chakandwa. ¹⁰ Uchasula nimila binsayi , kubushi bwa basombolwa,buno nubo beleshibwe lonio lweli mu Yesu Kilishitu,ghamoyi na lukumbu lwa milyalya.. ¹¹ Kitondo kino kinimilwa: ndi twakwile ghamoi nawe, tukaba ghamoi nawe. ¹² Ndi twakokomesha,tukimalila bantu ghamoyi nawe,ndi twamunana n'uwe akatunana; ¹³ Ndi tatweli ba bulili ,we eli wabulili bindi binsayi,kubuno ntanakosha kwinana. ¹⁴ Bakengesha ibyo bitondo ,mu kubabulilila mu miso ma Ghongo,bashighe bitondo bya miango ,bi kushimisha babo bakwongwilila. ¹⁵ Windoshe kweli Ghongo anga muntu wimilwa nawe,mukiti utana shibuka ukweghesha bwatunganana kitondo cha bulili. ¹⁶ Shigha bitondo bingi bya tughutughu nu biteli bya Ghongo,kubuno babo bakukatilila byo bakwingila bukebuke mu mabi,nu kitondo chabo kikubigha anga chulu. ¹⁷ Mubo mweli Himenea nu Filote, ¹⁸ bo bashighile bulili,mu kutenda buno kutuka ku bakuyi kwatingile kalayi,nu bakughalula lukatisho lwa bamoyi. ¹⁹ Tondo,kitondo cha lukatisho mu Ghongo kimala,ghamoyi nebyo bitondo byeli kamanililo kaghe: Mukota akumana bantu baghe,olya unasa ishina lya Mukota, indekanuche tanga na bwaghi. ²⁰ Mu numb'inene, ta mukubagha tughu bikayi bya nolo ali bimbeyi linene, tondo mweli numo bya muti nu bitete .Bimoyi bikukatwa busogha nu bingo bikubengwa . ²¹ Ndi muntu imbika wa sanana,mu kwinanya ibyo bitondo,akaba kikai cha katwa busogha,cha sanana, chaswaghila mukobe wacho, cha tunganana mu milimo insayi. ²² Tina nkasa sa busikila,nu londa bulili, lukatisho, lutundo, boolo,ghamoyi na babo bakumana ishina lya Mukota na mutima wenga. ²³ Shighelesha bulayi myango sa bughasanga nu sa tughu tughu,mukumana buno sikulishagha nsaki. ²⁴ Buno tabwaswagha ku mukiti wa Mukota alonde nsaki; tondo emana kwimbotya ku bantu bansai,abe wa kweghesha,wa kongwilila bango; ²⁵ Emana kulosha baghini baghe nsila nsogha, mu malelamilo buno Ghongo akabasungula bikile nubo kumana bulili, ²⁶ nu buno,mu kuba na mulenganya musogha, bakiyonya mu tutegho twa Musumbu,w'imbikilagha bo buno bakite bya byashima.