¹ Chashighala,bisakwitu, mutuseghele, buno kitondo cha Mukota kike bulai nu kitatwe anga bucheli kwinu, ² nu kubuno tutuke mu maboko ma bantu babi nu ba kushimisha;kubuno bansai tabite lukatisho. ³ Tondo Mukota eli wa bulili nta nengelela muntu, akabimika busogha busogha nu akalanga na whoso mubi. ⁴ Twite malelamilo kwinu mu Mukota,buno mukukita nu mukakita bitondo bitukubabula mukite. ⁵ Nu Mukota aloshe mitima sinu nsila mu kushima Ghongo nu mu kulindila Kilishitu! ⁶ Twababula byakukita ,bisakwitu,mw'ishina lya Mukota witu Yesu Kilishitu mwindekanuche na mwisakwitu unsai wikala mu mabi,nu ta mukuyangana na meghisha matwabeleshagha. ⁷ Mukumana benywe binene buni bumunakita bitukukita , kubuno tatwikalagha ku mweli mu bitaswagha. ⁸ Tatwalyagha bulya kampampa ka muntu ; tondo, mu mulimo nu mu munubo, twakitagha nkashi musi nu kindi buno tushitoghelaghe umoi ku benywe. ⁹ Tabuno twananilwagha kulya, tondo twashimagha tubaloshe nsila sa kukita bitukukita . ¹⁰ Kubuno,ghatwabagha kwinu,twababulagha bwasibwasi:olya utashima kukita mulimo , nu alyaghe. ¹¹ Kubuno, tukongwa buno bamoi ku benywe bekukita bitaswagha,tabakukita milimo ,tondo bakulila mu maghala ma bango. ¹² Twabula abo bantu nu twabasegha kutingila Mukota Yesu Kilishitu, balye india maghala mabo,mu kukita nkashi busogha. ¹³ Kubenywe, bisakwitu, mukutwaghe na kukita busogha. ¹⁴ Nu ndi mutu umoi ku benywe anana kongwa ku bi twatenda mumano maluba,mwamwengeleshagha busogha,nu musangilaghe ghamoi nawe,buno akwe nsoni. ¹⁵ Mumukataghe anga mughini; tondo mwamukalaghulagha anga mwisakwinu. ¹⁶ Nu Mukota wa boolo abeleshe w'inene boolo bindi binsai nu mu nsila insai ! Nu Mukota ikale ghamoi na benywe bansai! ¹⁷ Ine Polo, na kuboko kwani nabakasha samba.Nu ghuno u mutilo wani mu maluba mani mansai;bubo u bunkwenda natilha. ¹⁸ Mpang'inene sa Mukota witu Yesu Kilishitu sibe ghamoi na benywe bansai.