¹ Ku bitondo bya kushwa kwa Mukota witu,Yesu Kilishitu,nu kwikala ghamoi nawe, twabasegha ,bisakwitu, ² mwinshighililaghe mu milenganya sinu nsogha ,nu kwishighilila kuyungwayungwa aba kutingila bimukughanilila aba kutingila maluba manabulwa buno matuka kwitu, anga busi bwa Mukota bwika. ³ Muntu ntabengelelaghe mu nsila insai;buno bwatunganana mabi mamoneke ko tanga,nu muntu nene bwaghi amoneke ko tanga,we mwana wa kwabucha bantu, ⁴ mughini wimala kwighulu ku kinsai kikumanwa Ghongo,ali kinsai kikwelwa,kwikila kwikala mu numba sa kukumbamila sa Ghongo,kwimana winene Ghongo. ⁵ Tamunakengela buno nababulagha ibyo bitondo gha nabagha kwinu? ⁶ Nu lelo mwamana lelo ki cha mushibila,buno aloleke ko mu busi bwaghe. ⁷ Kubuno kindo cha bughini ki kukita nkashi ;kwikila whoso ucheli wamushibila ashimile tanga. ⁸ nu akapamuka whoso mubi, Mukota akamushililisha kutingila muusa mukutuka mu kanywa kaghe,nu akamunanta mu kwika kwaghe. ⁹ Kupamuka kw'oso mubi kukaba,kutingila bwangato bwa Kahinga,ghamoi na bitangalo binsai,tulolesho nu bighanaghana bya bwisa, ¹⁰ nu nsila insai sa kwengelela ku babo bakushimila bindile lutundo lwa bulili luna balamishe. ¹¹ Agho Ghongo ikabasingila maghala ma kubashimisha buno bakatishe mu bwisa, ¹² kubuno bansai batakatishagha mu bulili,tondo bimpotulagha mu bitaswagha, baghayibwe. ¹³ Ku muli ,bisakwitu nshimwa sa Mukota,twemana kukasanila Ghongo ku kabamba kinu,kubuno Ghongo abasombolile mu lonyo,nu tukila mwa kalayi,kutingila kusanana kwa Muusa nu kutingila lukatisho mu bulili. ¹⁴ Ku bibyo bimwamanilwe ko kutingila Musaghu musogha witu,buno mube na lukumbu lwa Mukota witu Yesu Kilishitu. ¹⁵ Nu ku bubo,bisakwitu,mwakokomeshagha,numukatilile meghisha ma mweleshibwe,kutingila bitondo bitu,ali kutingila maluba mitu. ¹⁶ Nu Mukota witu Yesu Kilishitu w'inene,nu Ghongo tata witu,watushimile,nu watukasile mpanga inene ,bubobelelo bwa milyalya nu malemalilo masogha, ¹⁷ ba bobeleshe mitima sinu,nu kubimika mu bitondo binsayi bisogha nu mu matenda mansayi masogha!