¹ Mulole tanga nshimwa sani,u maluba mani m'imbili manabatilila. Mu mamoyi nu mu ma mango nkulonda kubucha mulenganya winu musogha kutingila kubakengesha, ² buno mukengele bitondo bimwalingagha kubulwa na balenganya basanana,nu lukakisho lwa Mukota nu Monia, ³ bubo bumwegheshibwagha na Ntumwa sinu, mu kulinga kumana buno,mu bindi bishinda kukashwa bantu ba lupali ,bakutabanga buli nkasa sabo. ⁴ Nu mu kubusha:Kuni kw'ikila indaghi lya kwika kwaghe? Kubuno gha kwilagha batata , binsayi bicheli anga bwa bumbwagha kisi. ⁵ Bulili,bakulonda bebelele,buno, ighulu lyabinde kutingila kitondo cha Kalagha,nu itete lyatukile mu masi nu lya bumbilwe kutingila masi, ⁶ Nu kutingila icho kitondo kisi cha shikile mu kubukilwa na masi, ⁷ nu kutingila icho kitondo ighulu nu kisi bya bino bindi byalangwa nu kubikilwa kaya, mu kulindila kindi cha kwaghibwa nu cha munubo wa bantu babi. ⁸ Tondo kweli kitondo kimoyi, nshimwa sani,ki mutaninda kumana,buno mu miso ma Mukota, kindi kimoyi cheli anga myaka elefu emoyi nu myaka elefu emoyi anga kindi kimoyi. ⁹ Mukota ntakwindisha ku kucha indaghi ,anga bukulenganya bamoyi;tondo akulindila bwingi kubushi bwinu,mu kutashima umoyi winu ashimile,tondo mukushima bansayi bikile kwinsungula mu mitima. ¹⁰ Busi bwa Mukota bukika anga mwimbi ;mo bo busi ighulu likatinga ghamoyi na lukindo , bikayi bya kuya bikashililila,nu kisi ghamoyi na bikayi byaghe bikaya. ¹¹ Kubuno bikayi binsayi byemana kushililila, kashi mube basanana nu kwikatilisha mu Ghongo, ¹² tondo mu kushima nu mu kulindila busi bwa kushwa kwa Ghongo bwike ighilighili, kubushi ighulu lishililile nu bibumbwa binsayi bikasendekete ! ¹³ Tondo tukulindila kuyangana n'idaghi lyaghe, lingo ighulu nu kingo kisi ,u mukaba bulili. ¹⁴ Uchasula nshimwa sani,mu kulindila ibyo bitondo mwakokomeshagha buno musangwe nawe tamwite kaama kabi nu batanasughilwa nu beli mu boolo nawe . ¹⁵ Mukatilishe buno kulindila bubibu kwa Mukota witu u lonyo lwinu, anga bwa batilinde nuwe nshimwa situ Polo, kuyangana na bulenganya bweleshibwe. ¹⁶ U bwakukita mu maluba mansayi,mwa kutenda ibyo bitondo, mumo mweli bitondo bibibu kwongwa, nu bantu batakumana nu batakokomesha bashimisha mu bikutendwa anga bubakukita na bingo bitondo bisogha bya Ghongo,mu kushika kwabo. ¹⁷ Benywe lino,nshimwa ,benywe mwakengeshwa,mwikale busogha,munashwa kubulutwa na kushimila kwa bantu babi,tamwituche mu bumwakokomesha. ¹⁸ Tondo mukule mu mpang'inene nu mu kumanilila Mukota witu nu Monia Yesu Kilishitu.Kwaghe kube lukumbu,lelo nu bindi binsayi! Amina!