¹ Kwabagha munkatighi na bantu balenganya ba bwisa ,nu kukaba mu nkatighi na benywe ngatu sa bwisa,si keghesha meghesha ma kwabucha bantu,nubo,mukunana Mukota wabaghulile,bak'imbulutila nsusu s'ighilighili. ² Bengi bakabayanga mu kwabuka kwabo, nu nsila sa bulili sik'eneghwa kubushi bwabo. ³ Mu butughu bakabatingila mo na bitondo byabo bya kwengelela,bo kwaghibwa kwabo kwabikilwe kalayi,nu nsusu sabo tasikashila. ⁴ Kubuno,ndi Ghongo ntindagha kwaghya baghenshi bakitagha bwaghi,tondo abalekelagha mu mishinga sa bulimaswa balindile kwaghibwa; ⁵ Ndi ntashighililagha kisi kitangi, tondo oniagha Nowa, we wa munani,wabagha musanshi wa bulili,ghichagha mu kisi cha bakiti ba bwaghi,kiswabo cha masi; ⁶ ndi aghayagha misumba sa Sodoma nu Gomola kusighalucha ito,buno sibe kalolesho ku babo bakakita bwaghi, ⁷ nu ndi alamyagha muntu wa bulili Loti,wonganagha na myanya sa bantu ku bubi bwabo, ⁸ (buno ghoso muntu wabulili wikalagha mu nkatighi nabo,abagha na bongwa mu mutima waghe bindi binsayi mu kumona bitondo byabo bibi bya kwita) ; ⁹ Mukota akumana kutucha bantu basogha mu malingiko,nu kubabikila babo bete ba bulili buno banube mu kindi kishinda cha kwaghibwa, ¹⁰ Tanga babo beli mu nkasa mbi sa mubili nu bakwenegha bimalila bango.Bakwindola,nu bakwitata,tabakukwa boba kutuka bite nkumbu, ¹¹ tondo baghenshi bite maghala manene ,tabakubenegha ku miso ma Mukota. ¹² Tondo bo beli anga nama sinshighilila mu bibashima,babutilwe buno bakatwe nu kushighilila,bakutenda bya bilingano ,nu bakakwa mu bwaghi bwabo, ¹³ mu kweleshibwa indigho lya bubi bwabo.Bakuboghela kosala mu mabi mabo;kuloleka ko kweli nsoni gha mukusangila nabo indya nu bekubengelela. ¹⁴ Bite miso misala matensha nu tabakikuta bwaghi ;bakwabucha mitima sitakokomela ;bite mutima wa butughu,beli bana bashulilwa. ¹⁵ Mu kushigha nsila nsogha,babukile mu kuyanga nsila sa Balamu,mwana wa Beoli washimagha indigho lya bwaghi, ¹⁶ tondo asughindwe ku bwaghi bwaghe: mpunda sa kalumbu ,mu kutenda anga muntu,imashagha ishile lya ghoso mulenganya. ¹⁷ Abo bantu beli bishiba bitite masi, lubhu lukwenda na lumpumpu;babikindwe bulimaswa . ¹⁸ Ghamoyi na bitondo bingi bya kwitata,nu nkasa sabo sa bya nsoni,bakubuluta bantu babagha bintucha mu kikembe cha babo bashima mabi; ¹⁹ Bakubalagha kushighililwa , nu bo binene beli bakandwa mu mabi,nawe kubo eli mukobe ku bya byeli mo. ²⁰ Bulili,ndi mu kushila kwitucha mu mabi ma kisi,kutingila kumana Mukota nu Monia Yesu Kilishitu ndi binkatilisha lingo mumo nu bakindwa ,nti bubi bwabo bushinda bwaghimba bwa butangi. ²¹ Bunabinde busogha bamanaghe nsila sa bulili,kughimba kusishigha lingo,mu lukakisho lusogha lu mweleshibwagha. ²² Bikindwe na kicho chatendwa mu mukili wa bulili:Mbwa sakulukila bisashi byaghe, nu ngulube soghagha,simpotulha mu bisogho.