¹ Nkwana lingo ,ghabusho na bitondo binsai,kukita masegho,nkukokomesha mu kwema,kuseghela bango,nu kukasanila bikitilwe bantu bansayi, ² ku bami, nu ku bansai bimikwa mu kwangata,buno twikale mu boolo nu koleshi mwa mu kusanana nu kulingimana. ³ U busogha nu bwaboghyaboghya Ghongo Monia witu, ⁴ ukushima bantu bansai bone nu bikile kumanilila bulili. ⁵ Kubuno kuli Ghongo umoyi tughu nu mukulumanya umoyi ghasambana Ghongo nu bantu,u Yesu Kilishitu muntu, ⁶ winkitile kinsasa cha bansayi.Agho u gheli u buteneneki bwa bindi byaghe, ⁷ nu kubo nabikilwe Musanshi nu Ntumwa, Nkutenda bulili,nu nshi kweka bwisa,_wabikwa kweghesha ba bilongo mu lukatisho nu bulili. ⁸ Nkushima lino buno balume baseghe nako nako, mu kwimalucha mighombo sa sanana,ta na mushibu ali milenganya mbi. ⁹ Nkushima buno bakashi nubo ,kushwala bwatunganana nu ta byakwitya nsoni,ta bitonde ali kushukwa nshuli, nu kushwala nolo ku mubili, ali tutungwa,ali nshulu s'imbei lingi, ¹⁰ Tondo bitonde na myanya nsogha,anga bwatunganana ku bakashi be kukita mulimo wa Ghongo. ¹¹ Nu mukashi ongwilile mano mu ku koba ghamoyi na kwikumbya. ¹² Nshikwimila mukashi egheshe,ali kwikalila munache ; tondo ikale mu kwongwilila. ¹³ Kubuno Adamu u'wabumbwagha mutangi , Eva kumbusa kwaghe; ¹⁴ nu ta Adamu u'wengelelwagha , tondo mukashi mu kwengelelwa imbikile mwaghi . ¹⁵ Tondo onile kutingila kubuta, ndi aba na myanya nsogha mu lukatisho, mu lutundo, nu mu kusanana.