¹ Polo ,ntumwa sa Yesu Kilishitu kutingila bwashima Ghongo Monia witu nu Yesu,ndemalilo situ, ² kuli Timote, mwana wani wa kwimbutila nu mu lukatisho;m weleshibwe mpanga'inene , lukogho nu boolo bikutuka kweli Ghongo Tata nu kweli Yesu Kilishitu Mukota witu! ³ Nakukengesha bu nakwanagha mu kwenda kwani ku Makedonia,gha nakushighagha ku Efeso,buno utende na bantu bamoyi tabeghe mango meghisha, ⁴ nu bikatililaghe ku ngani nu mighani sa bibuti bitakushila, bikulisha myango nu tabikwicha kulai mulimo wa Ghongo mu lukatisho . ⁵ Kitondo kinene cha lukakisho cheli lutundo lukutuka mu mutima musogha ,nu mulenganya musogha nu lukatisho lwa bulili. ⁶ Bamoi mukushigha ibyo bitondo,bashimila mu kutendatenda bingi bya tughutughu; ⁷ Bakushima babe beghisha ba milembe,nu tabekumana bi bekutenda ali bi bekweghesha. ⁸ Tatukweba buno mulembe weli musogha, ndi wauyanga bwatunganana , ⁹ mukumana buno mulembe tawabikilwe ku bantu ba bulili,tondo ku babibu nu bakwenegha Ghongo,ku babi nu ku bisabwaghi, betite indini,bakusambya bya Ghongo,bakupunda babuti babo,biti, ¹⁰ balimbya,bakukita bigha,bimbi ba bantu,beki ba manko,ba kulumbila bya bwisa,nu kinsayi kitalingimana na meghisha masogha, ¹¹ kuyangana na musaghu musogha wa lukumbu lwa Ghongo mukasanilwa ,musaghu musogha uneleshibwe. ¹² Nakasanila ghoso unkupa maghala, Yesu Kilishitu Mukota witu,bwankatile wa bulili, ¹³ mu nkumbika mu nkashi sa Ghongo,ine neneghagha kalayi Ghongo,nanubyagha,mutu mubibu.Tondo lelo, neleshibwe lukogho kubuno nakitagha bi nshikumana mu kusomba lukatisho; ¹⁴ nu mpang'inene sa Mukota sabinde ningi,ghamoyi na lukatisho nu lutundo lweli mu Yesu Kilishitu. ¹⁵ U kitondo cha bulili chemana kusekelwa,buno Yesu Kilishitu ashwile mu kisi buno onie bisa bwaghi,nw'ine u mutangi ku bo. ¹⁶ Tondo nakwilindwe lukogho buno Yesu Kilishitu aloshe chombo chaghe kuntingila ine musoki,buno nibe kalolesho ku babo bakamukatisha buno beleshibwe kalamo ka milyalya. ¹⁷ Kweli Mwami wa nkiko,ntanakwa,ntakumoneka ko,Ghongo w'inene,atatwe nu kweleshibwa lukumbu bindi binsai! Amena! ¹⁸ Lukakisho lunakwelesha,e Timote, mwana wani,kuyangana na bulenganya bwatendilwe kobe,buno kuyangana nabo,ulwane bita bisogha; ¹⁹ Mukukatilila lukatisho nu mulenganya musogha. Uso mulenganya ,bamoi baushimishishe,nu kwinamya lukatisho. ²⁰ Kubo kweli Himenia nu Likisandele, ba nashighilinde mu maboko ma Kahinga,inga tabeneghe lingo Ghongo.